Choobu 29:1-25
29 Mi Choobu hiau lachi a suɛi,* mbo dimi aa:
2 “Ndoo naŋ niŋ bɔɔ le mi yoomu nuu ndoo wa, mɛɛ o wa o paŋguŋ hiou woŋ niŋ yɛ.A teleŋ koŋ, Mɛlɛka wa ya malaa.
3 Mbo tosa mi lambui ndɔɔ wa ya diondɔɔ choo,Nduyɛ mi wa kɔlaŋ o nyumndaŋ niŋ sanaa a nyɛ ndɔ teŋgaa.
4 Teleŋ* ya wa feleŋgɔnɔ mi wa kpeŋgbeleŋ ndo,I wa o chaŋyɛi kɛndɛi niŋ a Mɛlɛka.
5 Teleŋ Mɛlɛka Kpaaya Kpou Kpou Wo wa a ya latulu wo,Chuauwaa* niaa kpou wa ya a balaa silɔ.
6 A boondii keŋ, mi chɔluaa niaa kpou ndaa ke ya milikiiyaŋ* tau.Nduyɛ o yɔŋ bɛɛ aa o poutaŋ tɛɛŋ, mi yɔmii nii ɔlifiive ndii naŋ tau nduyɛ mi ndii yɔŋgu chuɛiyaŋ.
7 Te yaa kuɛ pɛ o dio kpaki chioo,Nduyɛ mi kɔ chal naa waŋnda ndaa chuuŋgiaŋ nda,
8 Te puaa feleŋguaa ndaa che ya pɛ, a mel la fondaa.*Nduyɛ falaa yuuwa bɛɛ mi ndaa chɛŋ isisi, kanifuule ndaa nɔ bɛɛleŋ le ya.
9 Mi laŋgbaa kalla ndaa mei doŋ a suu le,Nduyɛ mi ndaa handuŋ balaŋ o sondo.
10 Puaa ndaa fula tɔɔ wa bɛɛ, ndaa suu le.Mi diɔɔmuleŋ lee lusul nda o sondo kpiliŋ.
11 Te wana o wana ndoo tuei ya suɛi pɛ, sɔɔŋ kɛndɔŋ o dimi a ya okɔɔ ni.Nduyɛ te waŋnda ndaa che ya pɛ, a chandu ya.
12 Mi yaa piŋi wana bala fondo wa chaŋndo le malaa wo,Nduyɛ mi yaa mala vɛlɛ chuaambuaa ndaa nɔ ŋfinya le wa, a wana o wana nɔ wana malaa le.
13 Te yaa mala pɛ wanaa ndaa huŋ le piɔmndo sɔlaa wa, mi ndaa mel la balikaa.Nduyɛ mi yaa tosa mi wana ndoo vii pɔnɔɔ wo dɔɔnuŋ nyaale.
14 Mi wounuŋ sakpoyɛi maa nyɛla nila chuɛɛnaŋ.Nduyɛ, sandei wa niŋ maa doma ni vilɛi* a mɔsil nuu.
15 Mi simnuŋ hɔltaŋ le wanaa sumɛiya,Nduyɛ mi simnuŋ peloŋ le wanaa bɛvɛiya.
16 Mi simnuŋ finyaa le wanaa bala fonduaa.Nduyɛ wanaa yaa sina le wa, mi yaa suŋgu le dila ndalaŋ.
17 Mi yaa tɛɛmbuu kpaaya wanaa dɛnɛ wɔɔŋnda,Nduyɛ mi piŋi wanaa nda wa nyɛpalaa tusioo choo wa nda o ba.
18 Mi yaa dimi aa, ‘I cho wu o ya lo chiɛiniŋ.*Nduyɛ palɛi ya cho wa yoomu ve, I cho wa i hɔbɛi mɛɛ siooŋnde cho yɛ.
19 I cho wa mɛɛ puunduŋ yɔmndo tual nuaa o mɛŋndaŋ bɛŋgu,Nduyɛ ichɔl pii pii, mi mɔmndo wa o lɛuwuŋ ndɔŋ choo yɛ.
20 Waŋnda cho hiouwɔɔ lachi a bɛɛleŋ nɔɔ le ya.Nduyɛ chiɔu cho ya o ba wo, I cho hiouwɔɔ lachi a ndu wuuwo.’
21 Te yaa wa pɛ waŋnda silaa,Mi ndaa mei doŋ, nduyɛ ma yaŋ nilaŋ yekeŋ.
22 Te yaa chii pɛ suɛi, ndaa nɔ lɛ nyɛ o nyɛ le dimi le.Nyɔɔ pila ndoo hɛnaŋ nda ni te ndaa wa pɛ diomnda nilaŋ tueiyɔɔ.*
23 Mi ndaa chal la chumndo, mɛɛ waŋnda chum nuaa piɔɔ le siaa yɛ.Nduyɛ mi ndaa chum le diomnda nilaŋ tueiyɔɔ, mɛɛ wana ichiɔɔ chum nuaa piɔɔ le siaa yɛ.
24 Te yaa mam pɛ muɛɛŋ o nda lo, mi ndaa che ndi ikala le laalaŋndo maa I naŋ kɔl a nda.Nduyɛ te yaa mulul nda pɛ hɔlla, mi hei ndii ke nda tiindaŋndo.
25 Mi yaa ke nda silaa maa wana cho nda chilaŋ ndo.I wa nda ko tɛɛŋ mɛɛ masaa wa nuaa sovɛiyaa nduaa tɛɛŋ yɛ.Nduyɛ, I wa ko maa wana dɛɛniaa wanaa kɔl tambɛiya kɔltaŋ ndo.
Tɛɛsiaalaŋ
^ Hibuluiye, “talelaŋ.”
^ Hibuluiye, “Palɛi.”
^ Ɔɔ “Buɛiyaa.”
^ Ɔɔ “nɔnɔɔ.”
^ Hibuluiye, “a veŋnuŋ.”
^ Ɔɔ “doma ni bala biŋgioo.”
^ Hibuluiye, “o waaŋnde nileŋ niŋ.”
^ Hibuluiye, “te diomnda nilaŋ laa wa nda pɛ delioo o lani.”
