Choobu 3:1-26
3 Mɛɛ sɔɔŋ muŋ yɔŋnuŋ, mi Choobu kandu suɛi. Nduyɛ mbo mɛna* paale o veluŋ ndeŋ.
2 Mi Choobu dimi aa:
3 “Maa paale ya veluŋ ndeŋ le huŋ ndɛ le fɔ,Nduyɛ, maa nyumma waŋndo dimi aa: ‘Wana pɔnɔɔ veluŋ’ ndaŋ ma huŋ ndɛ le fɔ!
4 Maa paale leŋ le simnuŋ nyumndaŋ.
Maa Mɛlɛka puɛɛnuŋ a paale leŋ okɔɔ.Maa nyɛ teŋgaa wa o paale leŋ choo le.
5 Maa nyumma bɛndu bɛnduaŋ ma tol o paale leŋ choo.
Maa choo piimiaa mbo kumbu paale leŋ fɔ.
Maa nyɛ o nyɛ piimiɛi kumbu nyɛ teŋgaa paale leŋ fɔ.
6 Maa nyumma tiŋgisiima bɛnduaŋ ma chɔɔlu tolɔɔ ichɔl koŋ.Maa kɔl kɛndɛ wa o paale leŋ choo o wɔsioo niŋ te fɔ,Nduyɛ maa paale leŋ le wa le chɔmnaŋ o paŋgoŋ tɛɛŋ te.
7 Ndoo wa bɔɔ ikɛndɛ wana ndoo viluŋ ichɔl koŋ te.Maa wana ndoo deŋi choo choo a nyaale ichɔl koŋ te.
8 Maa wanaa handu paale leŋ sendioo choo wa, a handu leŋ sendioo choo,Wanaa nɔla Liviaataŋ* tindi wa.
9 Maa looŋ fula idii yoŋ ŋ piimiaa fɔ.Maa nyɛ teŋgaa wa o nyumma maŋ choo le fɔ,Nduyɛ maa nyumma maŋ ma cha nyɛ wawoŋ paale siaaleŋ te.
10 Mɛɛ kala nuu velu ya o paale leŋ choo,Sɔɔŋ palaŋ kposoŋ cho ya komallo ni.
11 Le yɛɛnɛ I vi paale nda wa ya violɔɔ leŋ te?
Le yɛɛnɛ kpeekpei I sɔla tambei boondii kala nuu velu ya ve le?
12 Le yɛɛnɛ nda bii yɛ ya o lawu,Nduyɛ ma wɛsi ya?
13 Te yaa vi pɛ a teleŋ koŋ, I wa waŋnɔŋ ihini, nyɛ o nyɛ ve ya paaliaŋ te.Nduyɛ, I wa waŋnɔŋ o luaŋ yikpi o pɛŋgioo niŋ,
14 I wa waŋnɔŋ a masaa keeku o lɛŋndeŋ choo wa vɛlɛ a wanaa ndaa silaa,A taŋgul fondaŋndaŋ mi la wa hau la tambɛilaŋ nda,
15 Ɔɔ a laŋgbaa kalla a ndaa nɔ kooliiyoŋ,Nduyɛ mi chiɛila ndalaŋ la wa la piaa cha cha a kaniŋ humboŋ nda.
16 Ndoo bɛnda bɔɔ mi kala nuu ndoo viikuu ya ndoo ve o sina choo le,Mɛɛ chuauwa apum a wu nuaa a chi nyɛ wawoŋndo le yɛ.
17 O sɛiyo niŋ ndu, wanaa dɛnɛ wɔɔŋnda tosa lɛ yɔŋ wɔɔŋ te.Loŋ wanaa cho o saŋgaa niŋnda kua pɛŋgioo ni.
18 Loŋ ndu wanaa cho o biyɔɔ niŋnda bɛɛ, ma waŋnuŋ hɛnɛkɛ diompilɛ.A tuii lɛ waŋndo nda baŋɔɔ le wallo tosaa le.
19 Wana pɔmbɔ ni, wana bɛndu ni, nyɛpilɔɔ kpe nda cho loŋ ni,Nduyɛ mi chiaa sɔla baŋaŋndo wanaa ndaa banaa o ba.
20 Le yɛɛnɛ Mɛlɛka chɛllɛ mi wana cho o saŋgaa niŋndo che nyɛ teŋgaa,Nduyɛ mi wanaa cho o nyɛpalaa* niŋnda wa yoomu?
21 Le yɛɛnɛ nda yeema yɛ piɔmndo, kɛ o hiŋ te?
Ma nuuviaa ndu mbo hiou bɛɛ mɛɛ nda nuuviaa nyɛm baa kalaŋ yɛ.
22 Mi waŋnda wa a kɔl kɛndɛ tau,Nduyɛ ma dɔɔnuŋ nyaale te a hiŋ pɛ le wuoo ma kuɛ o sɛiyo niŋ.
23 Le yɛɛnɛ Mɛlɛka chɛllɛ mi wana bendu nɛiyo mbo luusiaŋndo che nyɛ teŋgaa,O Mɛlɛka balu a kpakioo kpɔkɔsu o nɔ naa fulaa le wo?
24 Nyɛ nɛiyaa simnuŋ niŋ nyɛ ni diaa.Mɔnɛi ya cho biyɔɔ ve simnuŋ niŋ mɛɛ nda chuiŋi nuaa mɛŋndaŋ yɛ.
25 Nyɛ ya wa wuoo wo, ndu komal la hoo ni.Nduyɛ nyɛ ya wa siooŋii nduɛi yo, ndu tol la hoo choo ni.
26 I cho lɛ o kɔl nyulu niŋ te, I cho lɛ hɛnɛkɛ le, nduyɛ I cho lɛ o pɛŋgi niŋ te.Sɔɔŋ palaŋ tuŋ cho ya komallo ni.”
Tɛɛsiaalaŋ
^ Hibuluiye, “yei.”
^ Visioo hoo velaŋ a kuiyo ɔɔ visiaa bɛnduaa cheleŋ nɔ kpaayaa ma wa o peelo wa.
^ Ɔɔ “wanaa yoomu ndaa cho o nyɛ nɛiyaa.”
