Choobu 30:1-31
30 “Suŋ suŋ niŋ, I simnuŋ niŋ nyɛ mamaa,Le puaa feleŋguaa ya cho bɛndu wa.Finyaa ndaa ndaa suliŋ bɛɛ kposoŋ le wallo latulu a tuŋaa niaa,Le chɔluaa niaa mandaa le.
2 Puaa feleŋguaa ya chuu haa okɔɔ ma wa ya mamɔɔ wa,
A soliŋ kpaaya ndaa kpeku le ya solioo o nyɛpalaa nuu niŋ te.
3 Ma tambu labɛɛ le sɔla lepɛŋndo vɛlɛ a yiaaŋ.Nyɛm tambɛi muŋ wa o pollo niŋndoŋ,Muŋ ndaa kei chɔuviaa ni ma suam.
4 Mi ndaa keenduu pei yɔm ihɛllo yondoo niŋ,Nduyɛ puunduŋ yɔmnde wa nyɛ nda diaa ni.
5 Mi ndaa tou nda o tandaa niŋ,Mɛɛ nda wa nuaa viinɔɔ touwɔɔ ma deŋi ndu kɔɔli yɛ.
6 Fondaŋnda lɛɛnduŋ o kpoloŋndo choo laŋ,Sooŋnda cho lɛŋ ndaŋ vɛlɛ a o poutaŋ tɛɛŋ chalta ndalaŋ la wa ni.
7 Mi ndaa chaŋ choo choo kpeleŋ yondolaŋ niŋ,Nduyɛ mi ndaa diinuŋ naapilɛ o bil ŋyɔɔ tɛɛŋ.
8 Mi ndaa tou* nda o lɛŋndeŋ niŋ,Maa chuauwaa diɔmnda a wanaa nɔ la dio le wa.
9 Kɛ suŋ suŋ niŋ, hali o chonduŋ ndaŋ niŋ bɛɛ ma mam ya.I simnuŋ niŋ nyɛ mamaa* le nda.
10 A tul la leyɛ, nduyɛ a holnuŋ ndɛ ya le.Siooŋii bii nda pɛŋ le ya lɔluaŋ tufɔɔ o hɔl te.
11 Lɛ mɛɛ Mɛlɛka puu ya nyɛm chɔuwoŋ o ba* nduyɛ mbo tusi ya toolo yɛ,A nɔ lɛ isiooŋ le ya nyɛ o nyɛ tosal te.
12 Ma diinuŋ faŋga le ya simullo o di nuu choo.Ma tosa mi nyaanuŋ,Nduyɛ ma kɛsul la yaŋɔɔleŋ o nɛi le mi del o kpundɔɔ niŋ.
13 Ma hau nɛila nilaŋ kpou,Nduyɛ ma chɔɔlu ya dɛnɛ palaa tusi choo,Wana o wana ve le nda kpaa le.*
14 Mɛɛ puaa chɔuwa pial nuaa kpaki chioo ma hiou yɛ,Lende nda huŋ ya chiŋalaŋndo ni.
15 Siooŋii bɛnduei bii ya.Bɛɛle nileŋ le kuɛŋnuŋ mɛɛ hueiye kuaŋnuŋ nuaa a nyɔɔ yɛ.Nduyɛ, tiindaŋ yaa nɔ le pioŋɔɔ sɔlaa wo lo pɛ maa yumbu yumbu.
16 Piɔmndo ya hiŋ niŋ nuaa sɔlaa ni.Nduyɛ lepaa o lepaa, I cho o saŋgaa niŋ.
17 Ichɔl pii pii, o nyɛ nɛiyaa niŋ koni ya lɔl ni.*Nyɛ nɛiyaa cho ya wo chuu lɛ le.
18 Nyɛpalaa cho ya choo wo tosa mi nyɛla nilaŋ la siŋgaŋ ya lekɔɔ.*Nyɛla nilaŋ la saa ya niŋ kpiŋ, mɛɛ domaa ŋuau nuaa wana bololaŋ yɛ.
19 Mɛlɛka mal la o loolioo niŋ.I simnuŋ niŋ maa chundoo a pultaŋ.
20 Oo Mɛlɛka, I chaŋ naa num chua le malaa, kɛ a muli ya diom te.Mi sim mi piɛi o numndo, kɛ a saalaŋ ya le.
21 A mululaŋ ya ma tusi ya nyɛpalaa choo.A chiŋalaŋ ya, ma tusi ya dɛnɛpalaa choo a ba num kpaaya bɛndoo.
22 A chua ya ma viau ya o hueiye niŋ, mɛɛ hueiye kuaŋnuŋ nuaa a nyɔɔ yɛ.Nduyɛ ma wa ya hiŋndo, mɛɛ nyɔɔ wa nuaa hiŋnɔŋndo o hueiye niŋ yɛ.*
23 I sina maa a cho tosa mi sɔla piɔmndo,Nduyɛ mi kuɛ o fondaŋ wana o wana nɔ le mɛɛloo wo.
24 Wana cho hoo chaŋndo le malaa a teleŋ o cho o nyɛpalaa niŋndo wo,Wana o wana bii lɛ kɔllo mbo tosal ndu nyɛ le.
25 Mi yaa chaŋ le wanaa wa o nyɛpalaa niŋnda,*
Nduyɛ mi yaa bii mɔnɛi le wanaa bala fonduaa.
26 Sɔɔŋ kɛndɔŋ ya wa kɔl ni, kɛ mi ŋ wɔɔŋndoŋ komal la.I wa lehɔl le mi che paŋgeloo, kɛ nyumndaŋ koni ya cho chɔɔ ni.
27 Kɔl nuu cho bɔɔ o saŋgaa niŋ,Nduyɛ lepaa o lepaa, o nyɛ nɛiyaa niŋ koni ya cho ni.
28 O kɔl tambɛi bɛndoo niŋ koni ya cho niŋ balɔɔ ni, I nɔ lɛ tiindaŋ te.*
Mi sim faŋga bɛndoo tɛɛŋ mi chaŋ le malaa.
29 Naa tuŋaa yonduaa cho niŋ o wanayɛi niŋ ni,Nduyɛ youwaa ɔsiluichiiya, chuauwaa ndaa cho niŋ chaaŋaa niaa ni.
30 Dialloŋ piimiaa ya kpilo nduyɛ miŋ wa peeŋgɔŋndo.Naa nuu tosa niŋ mi paalaŋ la tuulu ya kpɛi.*
31 Le chonduŋ ŋmɔnɔŋ koni towa nuu cho niŋ ni,Nduyɛ, le wanaa cho chaŋndo wa sɛŋnde nileŋ bɛɛ le cho ni.
Tɛɛsiaalaŋ
^ Hibuluiye, “lɔɔ.”
^ Hibuluiye, “taloo.”
^ Hibuluiye, “timbi chiɔu nuu.”
^ Ɔɔ naapum, “Wana o wana ve le nda mala le.”
^ Hibuluiye, “Ichɔl pii pii nyɛ nɛiyaa cho ya o paalaŋ niŋ.”
^ Ɔɔ naapum, “Nyɛpalaa cho ya choo wo tosa mi siŋgaŋ kpou.”
^ Ɔɔ naapum, “ma tosa mi lo pɛ o hueiyii bɛnduei niŋ.”
^ Ɔɔ “wanaa sɔɔŋ muŋ kendu choo wa.”
^ Ɔɔ “I chi lɛ nyɛ teŋgaa lepalaa le.”
^ Ɔɔ naapum, “mi sɔla dialuŋ tuuwoŋ.”