Choobu 31:1-40
31 “I chii kpemaa yii a hɔlta nilaŋ,
Maa fɛɛŋ bɛɛ I tofa yufuaanɔɔ o nɛi bɛnda le wo choo le.
2 Te I tosa pɛ suɛi waa lende, vɛɛ Mɛlɛka cho o choo choo niŋndo cho yɛ ya biyɔɔ?Tɔnɔ yɛɛ ya cho yɛ sɔla Mɛlɛka Kpaaya Kpou Kpou Wo o ba?
3 Dɛnɛ palaa cho le wanaa tosa sɔɔŋ wɔɔŋndoŋ nda,Nduyɛ kpundɔɔ cho le wanaa bala ndalaŋ la cho o kaala wɔɔŋndaŋ niŋnda.
4 Mɛlɛka sina sɔɔŋ ya tosa woŋ kpou,Nduyɛ pelii kɛ kɛ ya chua pɛ, o sina.
5 Kani bɛɛ I dimi niŋ pa choolaŋ?*
Baa I hui niŋ pa wana o wana?
6 Maa Mɛlɛka handu ya o sekelei ndɔɔ choo,Okoŋ mbo sina mɛɛ kpɛ lo lechoo nuu cho yɛ.
7 Te o yɔŋ pɛ maa I faŋaŋ o nɛi ndɔɔ choo,Nduyɛ mi kɔl nuu hui ya mi wa tolɔɔ nyɛ hɔlta nilaŋ la cha wo kɔɔli,Ɔɔ te I luei pɛ balaŋ o sɔɔŋ nɔɔlɛiyoŋ niŋ,
8 Mɛɛ nyɛm ya saŋga le tɔlɔɔ woŋ, wanaa cheleŋnda dio muŋ tɔnɔ.Nduyɛ nyɛ o nyɛ ya tɔl, ma suuŋguu ndu.*
9 Te kɔllo del la pɛ le waa a wana lanɔ cheleŋ,Nduyɛ mi kandu nɛilaŋ nuuviaa le waa a lanɔ wana naŋ chiɛɛliaŋ ndo,
10 Mɛɛ laa nuu bɛɛndiaa nyɛdiaa le wana pɔnɔ cheleŋ,Nduyɛ mi waŋ piaanduaa cheleŋnda tosa hiniei a ndu.*
11 Suɛi lasiɔmbuei cho keŋ ni,I wanaa kilaa ŋyamaa tusi waŋndo nyɛpalaa choo ve.
12 Kaa suu waa nuaa cho ko mɛɛ yiŋndeŋ le tɛɛmbuu tɔlɔɔ,*Mbo lom ndu a puundoŋ* kpou yɛ.
13 Te I tosal pɛ buɛiyaa niaa piaanduaa ɔɔ a laanduaa kafalaŋ,Nduyɛ ma ŋɔɔchiaŋ a ya,*
14 Yɛɛ ya cho yɛ tosa te Mɛlɛka kilul la pɛ yamɛi?*
Vɛɛ ya cho yɛ ndu mulul te o nyuuniaa ya pɛ le sɔɔŋ ya tosa woŋ?
15 Wana toosiaa ya wo koni toosiaa nda ni.
Naa kpou ndu toosiaa naa ni.*
16 Te I kɛɛ pɛ le wana bala fondoo kioo nyɛm o hauba woŋ,Ɔɔ mi tosa wana vii pɔnɔɔ wo nɔ lɛ tiindaŋ te,*
17 Te I de pɛ nyɛdiaa nuu yapilɛ,Mi kɛɛ le viiya nyɛdiaa nuu kioo,
18 (Kanifuule chɔŋ o feleŋgɔyɛi nii niŋ, mi viiya haa chua ya maa finya nda.Nduyɛ chɔŋ o chuaambɔyɛi nii niŋ,* mi yaa mala wanaa vii piaanduaa wa.)
19 Te I che pɛ mi hueiye wa waŋndo paaliaŋndo le mɛɛ o nɔ fɛlioo yɛ,Ɔɔ mi che wana bala fondo nɔ nyɛ chuɛɛnaŋ te wo,
20 Mi ke nda nyɛla nda toosiaa a yiiŋii saa niaa laŋ,Ma wounuŋ ma sinaŋ lafuu, okoŋ ma mel la balikaa.
21 Te viiyo ndoo yeema ya pɛ malaa o ba o dio kpaki chioo,*Yaa tosal ndu suɛi wɔɔŋ te.
22 Te o yɔŋ pɛ maa o cho keŋ te yaa tosa le,Mɛɛ ba nuu suŋguŋ ya o choŋgu* mbo del, nduyɛ mi baa yom ya o duŋndo.*
23 Kanifuule, siooŋnde wa ya le kpundɛ Mɛlɛka ndoo tusi ya niŋ choo wo.Yaa nɔla niŋ mi sim tɔɔmayɛi nduɛi lachi le.
24 Te yaa dɔu pɛ tiindaŋ nuu o kooliiyoŋ niŋ,Ɔɔ mi yaa dimul koolii kɛndɛ kɛndɛi aa, ‘Num cho wana manda ya wo ni,’
25 Mi yaa dɔɔnuŋ nyaale le sul ni bɛndoo,A le nyɛm bɔɔbɔɔ ya sɔla woŋ,
26 Mi yaa che paaleŋ fulaa,*Nduyɛ mi yaa che naŋɔɔ bɛndu paŋgei naŋ ndo,
27 Okoŋ mi yaa kaala nyɔɔŋ muŋ sɔɔsɔɔ o kɔl niŋ,Mi sɔsa ba nuu le muŋ sooluuwo,
28 Mɛɛ haki wanaa kialaa ŋyamaa ndaa tusi ya nyɛpalaa choo wo wa koŋ wa ni.Mɛɛ chɔmndo ya wa koŋ ni maa I mulul Mɛlɛka tonyaa kɔɔ.
29 Kani bɛɛ I dɔɔnuŋ niŋ pa nyaale le mɛɛ yaamɔɔnɔ nuu sɔla tambei yɛ?Ɔɔ yaa naŋ pa kɔl le mɛɛ kpundɔɔ komal ndu yɛ?
30 Kani bɛɛ I piɛi yɔ le mi yaamɔɔnɔ nuu sɔla piɔmndo le.Le pilɛ bɛɛ I tosa wɔ haki waa lende le.
31 Mi wanaa wa o ya lo chiɛiniŋ nda ndaa dimi aa,‘Wana o wana hiŋ pɛ o Choobu lo chiɛiniŋ, mɛɛ mbo de nyɛdiaa* haaa mbo pim cha.’
32 Yaa chɛl mi mialla lɔl o bɛɛ le.Dio nuu wa o kumbiaa teleŋ o teleŋ le wanaa kelaa yiyaa.
33 Baa I tosa niŋ pa hakioo mi kindiŋ le ndu vioŋɔɔ mɛɛ waŋnda apum tosa yɛ?Baa I kindiŋ niŋ pa le biondɔŋnda nilaŋ vioŋɔɔ o yifɔ doma ni bɛndoo niŋ?
34 Baa siooŋnde bii ya niŋ pa le nyɛ faŋgaa cho ya tosal lo?Ɔɔ mi buulaŋ pa le yiyaŋ wɔɔŋ yuŋgula cheleŋndaŋ laa nɔ niŋ a ya okɔɔ wo?Nduyɛ mi hei kuuna ya pa suɛi, okoŋ mi siooŋnde bii ya le fulaa o bɛɛ?
35 Te ndoo yɔŋ pɛ kinɛi mi waŋndo ndoo yaŋ ya nilaŋ,
I wa diola nilaŋ poonyiaa* le chɔmndo maa ya dimi sɔɔŋ muŋ ni.
Maa Mɛlɛka Kpaaya Kpou Kpou Wo tuei ya diom,
O* hɛɛnduu ya sɔɔŋ muŋ choo, nduyɛ mbo poonyiaa muŋ o yau choo wo.
36 I wa ndu biyɔɔ o choŋgu mi balu a ndu,Nduyɛ mi wounuŋ ndu o lebol maa mɔsil lemasa.
37 I wa hiouwɔɔ lachi a ndu konaa dounɔŋndo le nyɛ o nyɛ ya tosa.I wa ndu lasisi o hɔl maa po masa, siooŋii ve ya wa le.
38 Te I soli pɛ waŋnda o kpelela nilaŋ niŋ, mi wanaa kaŋ wa balɔɔ chaŋndo a ya o sondo,Nduyɛ mi wanaa tosa mi kpelelaŋ la naŋ nda wa chaŋndo a ya o sondo,
39 Mi de nyɛm kuamaŋ o kpelela laŋ niŋ mi paawa le muŋ te,Ɔɔ mi tosa mi wanaa nɔ kpelela laŋ nda tambu kɔl,
40 Mɛɛ yɔɔŋ wul o kpele nuu niŋ sɔŋgɔ witiiyoŋ,Mi bil chuŋ wɔɔŋ wɔɔŋndo vil sɔŋgɔ baliiyoŋ.”
Nanuŋ Choobu mɛɛlu a suɛi ni.
Tɛɛsiaalaŋ
^ Ɔɔ naapum, “I balu niŋ pa a wanaa dimi choolaŋ nda?”
^ Ɔɔ “a diu wana o wana fula o pulale nileŋ choo.”
^ Hibuluiye, “baŋ ndu wulaŋ choo.”
^ Hibuluiye, “dia nuaa tɔlɔɔ haaa mbo tambu.”
^ Ɔɔ “Mbo suuŋguu puundoŋ.”
^ Ɔɔ “ma kuɛ a ya o lemasa.”
^ Hibuluiye, “simul la pɛ?”
^ Hibuluiye, “ndu toosiaa naa kalaa naa o la dembe ni.”
^ Hibuluiye, “chi lɛ le.”
^ Hibuluiye, “chɔŋ teleŋ ya wa kala nuu o dembe wo.”
^ Ɔɔ naapum, “Te yaa che pɛ maa I yɔŋgu tooloo o dio kpaki chioo.”
^ Ɔɔ “choŋgu tumndo.”
^ Ɔɔ “ba kpeŋndo.”
^ Hibuluiye, “nyɛ teŋgaa.”
^ Hibuluiye, “visioŋ.”
^ Ɔɔ “suei pila.”
^ Ɔɔ “Wanachiee.”
