Choobu 33:1-33
33 “Lelaŋ Choobu, yandii yaŋ nilaŋ,Ma tuei nyɛ o nyɛ ya cho num dimul.
2 Yandii, I nɔ mi soo!Kanifuule, I nɔ mi dimi nyɛ cho ya o kɔl lo.
3 Nyɛ ya nɔ le dimioo wo cho chɔm mɛɛ kpɛ ya sandu o kɔl nuu niŋ yɛ.Tonya ya sina wo kpeekpei ya cho num dimul ni.
4 Mɛlɛka Kpaaya Kpou Kpou Wo toosiaa ya ni,Mbo wou ya hueiyii nduɛi o miliŋ, mi wa yoomu.
5 Mulul la te a nɔla pɛ.Numpila soo ma chɔm ya nyɛ ŋ yiyaŋ ndo.
6 Naa ŋiɔɔŋ, nyɔɔ pilɛ kpe naŋ cho Mɛlɛka tonyaa o hɔl ni.Ya bɛɛ a puuloo o toosiaa ya ni.
7 Lelaŋ, siooŋii bii num le ya le,Nduyɛ luɛi o buulaŋndo niŋ le nyɛ ya cho num dimul lo le.
8 Diomnda ŋ dimi laŋ kpou, la del la o lani.Mi tuɛi num dimioo aa,
9 ‘I choŋnuŋ walaŋ, I nɔ haki le.I choŋnuŋ o diandaa, I nɔ biondɔŋ te.
10 Kɛ mi Mɛlɛka nuuviaa nɛilaŋ le mbo tul la leyɛ.Mbo chua ya pɛŋ maa yaamɔɔnɔ ndɔɔ ya cho ni.
11 Mbo baŋ ya peloŋ o kpiɔɔ,Mbo wa ya hɔlteŋ keeliaa kɔɔli le biondɔŋnda nilaŋ saalɔŋndo.’
12 Lelaŋ mi dimul num, a nɔ di kposoŋ le ma dimi lende le.
Mɛlɛka cho o bɛndu mbo hiau wanachioo.
13 Le yɛɛnɛ ŋ cho yɛ ŋɔɔchiaŋndo a Mɛlɛka?
Baa le mɛɛ o kɛɛ diomnda numndaŋ kpou mulioo yɛ?
14 Kanifuule mi Mɛlɛka soo le diiŋ diiŋ,Kɛ wana o wana yeŋ ndu lani le.
15 Mbo tosa hei o lɔma sɔlaŋ niŋ, o yilaŋnde niŋ ichɔl,Boondii wana o wana wa o kpele ndɔɔ choo,Mbo waŋnuŋ o luaŋ yikpi wo.
16 Mbo kumbi nda nilaŋ,Okoŋ mbo wou nda silala ndɔlaŋ o lani.
17 Mbo tosa mi waŋndo soli balaŋ o yɔŋ wɔɔŋndo niŋ,Nduyɛ mbo tosa ndu mbo mal yoŋgaa.
18 Mi Mɛlɛka chiindiaa yoomu ndɔɔ a dii ndu a muɛi faŋnde le,*Nduyɛ mbo tosa a sabu o kue o sɛiyo* niŋ te.
19 Waŋndo nɔla vɛlɛ mbo pɛɛku isɔɔ, te o wa pɛ nyɛ nɛiyaa sinaŋndo o kpele ndɔɔ choo,Nduyɛ mi nyɛ nɛiyaa wa vɛlɛ ndu o paalaŋ niŋ teleŋ o teleŋ.
20 Mi hei tosa mbo* tul nyɛdiaa* leyɛ,Nduyɛ mbo kɛɛ nyɛdiaa kɛndɛ kɛndɔɔ.
21 Okoŋ dialuŋ ndɔŋ cho lakɔŋnɔŋ kpou a nyauwo,Nduyɛ mbo simnuŋ paalaŋ kposoŋ.*
22 Mbo* sɔɔŋguu niko sɛiyo* ikɛi kpɛɛluŋ.Mi yoomu ndɔɔ wa niŋ wanaa dii waŋnda wa o ba.
23 O maalikɛiya waapilɛ tɛɛŋ,Te maalikɛinɔɔ o pilɛ chuu ndu pɛ yooŋgoo,O tiuba mbo chɔm po koŋ nyɛ cho sakpo le tosaa wo.
24 Okoŋ mi Mɛlɛka hini kɔl a ndu mbo dimi aa,‘Chiindiaa yoomu ndɔɔ, o kua o sɛiyo* niŋ te!
I sɔla nɛi ya baŋa ndu wo!
25 Okoŋ dialuŋ ndɔŋ cho miiŋgu maa feleŋgɔnɔ,Nduyɛ mbo miiŋgu kpeŋgbeleŋ mɛɛ o wa o feleŋgɔyɛi niŋ yɛ.’
26 O cho Mɛlɛka piɛi mbo muli ndu diom,Nduyɛ o cho Mɛlɛka hɔlla chɔ mbo deŋi a nyaaloo.Okoŋ, mi Mɛlɛka miŋgi vɛlɛ ndu o nɛi sakpoo choo.
27 Wana koŋ cho waŋnda dimul* aa,‘I tosa hakioo, mi faŋaŋ o nɛi tonyaa choo.*Kɛ, I sɔla fulamakɔɔlila wɔɔŋ le nyɛ ya tosa wo le.
28 O chiindiaa ya,* I kue lɛ o sɛiyo* niŋ te,Nduyɛ I cho nyɛ wawoŋndo chɔ.’
29 Mi Mɛlɛka tosa sɔɔŋ muŋ kpou.Mbo tosa muŋ bɛmbɔɔ le diiŋ, hali bɛmbɔɔ le yaa bɛɛ, le wana koŋ.
30 O cho ndu soli o sɛiyo* niŋ,Le halikpeŋ mbo tuei yoomoo yeela.
31 Yaŋ ya nilaŋ yekeŋ Choobu, ma tuei nyɛ ya cho num dimul lo.
Mei doŋ mi hiou lachi a suɛi.
32 Te a nɔ pɛ nyɛ le dimi, mɛɛ mulul la.
Soo, kanifuule I yeema mi miŋgi num o nɛi.
33 Te a nɔ lɛ nyɛ o nyɛ le dimi le, mɛɛ yaŋ ya nilaŋ.Mei doŋ, nduyɛ mi pɛɛku num taasioo.”
Tɛɛsiaalaŋ
^ Ɔɔ “nyɛm chɔuwoŋ te.”
^ Ɔɔ “sooŋndo.”
^ Hibuluiye, “yoomu ndɔɔ.”
^ Hibuluiye, “beediiyo ɔɔ buloo.”
^ Hibuluiye, “mi paala ndɔlaŋ la chɔmnuŋ kpendekele.”
^ Ɔɔ “Mi yoomu ndɔɔ.”
^ Ɔɔ “sooŋndo.”
^ Ɔɔ “sooŋndo.”
^ Hibuluiye, “chondei solul.”
^ Ɔɔ naapum, “I sɔla tɔnɔ leniŋ te.”
^ Ɔɔ “yoomu nuu.”
^ Ɔɔ “sooŋndo.”
^ Ɔɔ “sooŋndo.”