Choobu 34:1-37
34 Mi Ɛlihu hiau lachi a dimioo aa:
2 “Nya wanaa nɔ haa taasioo wa, la yaŋ ya nilaŋ.Nduyɛ nya sina haa tau wa, la tuei nyɛ ya cho dimioo wo.
3 Mɛɛ diɔɔmuleŋ le dembi nuaa nyɛdiaa yɛ,Lende koni nileŋ le tuɛi suɛi ni mi le sina ndi pɛŋgu.
4 Ŋ yaasiaŋndɔ naapila tɛɛŋ le nyɛ cho sakpo wo,Nduyɛ miŋ kɛɛsiaa le nyɛ cho o kɛndɔɔ wo.
5 Kanifuule Choobu dimi aa, ‘I nɔ dioo,Kɛ mi Mɛlɛka tosal la kafalaŋ.
6 Baa choolaŋ ya cho dimioo ni a mɛɛ Mɛlɛka nɔ le ya yamɛi kilullo yɛ?
Mi che bɛɛ I tosa yɔɔŋ wɔɔŋ te, kɛ nyɛpalaa nuu nɔ lamɛɛlu le.’
7 Wana cheleŋ kuɛɛ cho yɛ maa Choobu,O cho bɛɛla tambɛilaŋ sɔlaa mɛɛ wana kol nuaa mɛŋndaŋ yɛ?
8 O cho o chaŋyɛi niŋ a wanaa tosa sɔɔŋ wɔɔŋndoŋ nda,Nduyɛ mbo wa holiaŋndo a wanaa dɛnɛ wɔɔŋnda.
9 Kanifuule o dimi aa, ‘Wanachioo kindiŋ bɛɛ le Mɛlɛka kɔllo nɛŋioo,Tɔnɔ o tɔnɔ o sɔla leniŋ te.’
10 Lelaŋ nya wanaa bii sɔɔŋ bila wa,* la yaŋ ya nilaŋ.
O cho pɛŋ suɛi hiŋ wana o kɔl le dimioo maa mi Mɛlɛka tonyaa tosal wana dɛnɛ wɔɔŋndo le.Kanifuule, Mɛlɛka Kpaaya Kpou Kpou Wo tosa yɔŋ wɔɔŋ te!
11 Nyɛ o nyɛ waŋndo tosa pɛ, lende o paawa* ndu ni.Nduyɛ, mbo tosa mi waŋndo sɔla fulamakɔɔlioo le kuɛɛla ndɔlaŋ.
12 O kpeekpei niŋ, Mɛlɛka cho wana tosa dɛnɛ wɔɔŋ te.O nɛi sakpoo choo Mɛlɛka Kpaaya Kpou Kpou Wo tosa sɔɔŋ teleŋ o teleŋ ni.
13 Nɛɛnɛ siiŋguu yɛ Mɛlɛka masaa o lɛŋndeŋ choo?Nduyɛ nɛɛnɛ yulu yɛ ndu iso le mbo wa waŋnda chieeya* kpou chilaŋ?
14 Te o handu nda pɛ hɔlteŋ* kɔɔli,Mbo dɔu yoomula ndalaŋ naapilɛ okoŋ mbo poonda hueiyii yoomɛi,
15 Waŋnda chieeya* kpou cho tambei sɔla,Nduyɛ mi nda kpou miiŋgu o puuloo niŋ.
16 Te la bii pɛ sɔɔŋ bila, la handu kɔllo o hei choo.La yaŋ ya nilaŋ nyɛkɛndɛi o nyɛ ya cho dimioo wo.
17 Baa wana tul sandei leyɛ wo nɔla pa mbo chua chilaŋ?Ɔɔ o bɛnda pa mi wana pɛɛsa wana kpaaya bɛndu tosa sɔɔŋ o nɛi sakpoo choo wo?
18 A nɔla pa ma dimul masaa aa, ‘Wana fondoo fuu ŋ cho ni?’
Ɔɔ ma dimul laŋgbaa kalla aa, ‘Wanaa dɛnɛ wɔɔŋnda nya cho ni?’
19 Waŋndo cho o chɔm yɛ yiɔɔ laŋgbaa kalla tɛɛŋ te wo.O chue wanaa sulaa a sɔvɛ mbo hiou wanaa bala fonduaa le.Nda kpou, ndu toosiaa nda a bala ndɔlaŋ ni.
20 Ma viŋnuŋ o lepilɛ niŋ kpe a ditɛɛŋndo.Ma lau lau pulaŋ pulaŋ okoŋ ma sɔla piɔmndo.Mi wanaa nɔ kpaayalaŋ nda bɛɛ sɔla faŋaa, kɛ o ve a kpaaya wanachiee le.
21 Hɔlte Mɛlɛka leŋ le cho o sɔɔŋ wanachioo tosa woŋ choo.Nduyɛ pelii kɛ kɛ o chua pɛ, o cho chɔɔ.
22 Nyumma kɛ kɛ ɔɔ wundule kɛ kɛ cho,Le wana dɛnɛ wɔɔŋndo viaŋnuŋ, Mɛlɛka chi ndu le wo le.
23 Mɛlɛka kɛɛsiaa teleŋ a wanachiee kɛ kɛ,Le mbo hiŋ ndu o hɔl le ndu yamɛi kilullo le.
24 Mbo tɛɛmbuu wanaa nɔ kpaayalaŋ nda, o nyuuniaa a nda okɔɔ le.Nduyɛ, mbo miŋgi wanaa cheleŋ o foofola ndalaŋ.
25 Kanifuule, o sina nyɛ nda cho tosaa wo.Mbo del nda choo a nyumndaŋ, mbo tɛɛmbuu nda.
26 Mbo tusi nda nyɛpalaa choo le dɛnɛ nda wɔɔŋndo,O fondaŋ wana o wana tiuba mbo che wo.
27 Ma kɛɛ le ndu tolɔɔ kɔɔli,Nduyɛ a nɔ lebɛɛ le sawala ndɔlaŋ te.
28 Ma tosa mi wanaa bala fonduaa chaŋ naa ndu chua,Nduyɛ mbo tuei chaŋnda wanaa nɔ wanaa malaa le wa.
29 Te Mɛlɛka meinuŋ pɛ doŋ, nɛɛnɛ pɛɛsa yɛ ndu?
Te o veŋ pɛ hɔlaa nduaa, nɛɛ nɔla yɛ mbo che ndu?
O yɔŋ bɛɛ aa lɛŋndeŋ kpou o viŋ hɔlaa nduaa ni ɔɔ waŋndo o pilɛ, nyɛpilɔɔ kpe o wa ni,
30 Le halikpeŋ wana sina Mɛlɛka le wo ve waŋnda choo masa,Ɔɔ mbo tusi nda nyɛpalaa choo le.
31 Baa wana o wana dimul pa Mɛlɛka aa,‘A tusi ya nyɛpalaa choo, mi che bɛɛ I tɛɛmbuu isɔɔ le?
32 Pɛɛku wɔ ya sɔɔŋ ya bumba le tosaa woŋ.Te o yɔŋ pɛ maa I tosa suɛi o suɛi wɔɔŋ, I cho lɛ ndi tosa le.’
33 Baa Mɛlɛka cho num pa fanda te a kɛɛ pɛ yamɛi nduɛi o kialu ve?
Numpila nɔ kɛɛsiaa koŋ ni, o cho ya le.
Lelaŋ, chɔmndɔ ya nyɛ ŋ sina nyɛkɛndɛiyo.
34 Wanaa bii sɔɔŋ bila wa,*A wanaa nɔ taasioo ma tuɛi nyɛ ya dimi wo wa cho ya dimul aa,
35 ‘Kɔl kalu cho o sɔɔŋ Choobu dimi woŋ niŋ te,Nduyɛ nyɛ o dimi wo chɔm maa ndoo nɔ sinapɛŋgu le.’
36 Maa Choobu sɔla tofaa* nyɛkɛndɛi, o nyɛ ndɔ palaa niŋ.Kanifuule, sɔɔŋ o dimi woŋ cho ko maa sɔɔŋ wanaa dɛnɛ wɔɔŋnda.
37 O fulawɔ o hakila ndɔlaŋ kɔɔli, mbo tosal Mɛlɛka nilakalulaŋ.Mbo tiam balaŋ naa o hɔl le Mɛlɛka tonyaa mamɔɔ,Nduyɛ mbo dimi diomndaŋ wɔɔŋnda bɔɔbɔɔ le ndu simullo!”
Tɛɛsiaalaŋ
^ Hibuluiye, “wanaa nɔ kɔltaŋ nda.”
^ Ɔɔ “sala.”
^ Ɔɔ “chieeŋndo.”
^ Hibuluiye, “kɔl ndɔɔ.”
^ Hibuluiye, “Dialloŋ.”
^ Hibuluiye, “Wanaa nɔ kɔltaŋ nda.”
^ Ɔɔ naapum, “Finya nuu, maa Choobu sɔla tofaa.”
