Choobu 35:1-16
35 Mi Ɛlihu hiau lachi a dimioo aa:
2 “A laalaŋ pa kɛsɛ maa a nɔ di le ma dimi aa,‘I cho sakpo mi hiau Mɛlɛka’?
3 Kanifuule a cho dimioo aa, ‘Vɛɛnɛ keŋ paaliaŋ yɛ num?*
Tɔnɔ yɛɛ ya sɔla yɛ te I tosa haki le?’
4 I cho num mulul,Vɛlɛ a chaaŋaa num aa cho a num latulu wa.
5 Tofa o choo choo niŋ ma che,Ma mɛɛndaŋ yumbu yumboo, o cho num choo filioŋ ndo.
6 Te a tosa pɛ hakioo, baa mi haki koŋ paaliaŋ pa Mɛlɛka?
Te a tosa pɛ hakilaŋ tau tau, mi yɛɛ keŋ tosal lɛ ndu?
7 Te wana sakpoo ŋ cho ni, yɛɛ ŋ nɔla yɛ ndu ke?Yɛɛ o nɔla yɛ mbo sɔla num o ba?
8 Waŋnda chieeya kinɛi dɛnɛ wɔɔŋ numndo paaliaŋ ni maa numpila.Nduyɛ, waŋnda chieeya kinɛi sɔla tɔnɔɔ o sakpoyɛi numnde niŋ ni.
9 Mi waŋnda chaŋ choo choo kpeleŋ te a wa pɛ o nyɛkindilaa kala kalaa bɛŋgu.Ma chaŋ le malaa, te wanaa nɔ kpaayaa wa wa nda pɛ nyɛkindilaa tusioo choo.
10 Kɛ o pilɛ bɛɛ nyuna nuaa aa, ‘Kuɛɛnɛ Mɛlɛka, Wana Toosiaa Bɛndoo cho yɛ,O tosa mi waŋnda soli chondoŋ ichɔl le ndu saŋgalaa wo’ le?
11 Mbo pɛɛku naa tau, mbo hiou visiaa bɛnduaa cho o lɛŋndeŋ choo wa.Nduyɛ, o ke naa taasioo mbo hiau youwaa balu o choo choo niŋnda.
12 Mi waŋnda chaŋ le malaa, kɛ o muli nda diom te.Kanifuule, mbo che kaa heelaŋ wanaa dɛnɛ wɔɔŋnda.
13 Mɛlɛka Kpaaya Kpou Kpou Wo yeŋ nilaŋ o chaŋnda fondolaŋ* te,Nduyɛ o hendu kɔllo o laŋ choo le.
14 Kɛlɛŋgaa niŋ te, ŋɔɔchiaŋ ŋ cho maa a chi ndu le wo.
A kuɛ a suɛi numnde naa ndu chua. Lelaŋ chal kpɛ ma chum ndu.
15 Kanifuule, o doonuŋ tumbe mbo kilul num yamɛi le,Kɛlɛŋgaa niŋ te mbo handu kɔllo o sɔɔŋ wɔɔŋ ŋ cho muŋ dimioo a ndu okɔɔ woŋ choo.
16 Sɔɔŋ fondoŋ fuu Choobu dimi ni.Nduyɛ mbo dimi sɔɔŋ tau, kɛ o sina nyɛ o wa dimioo wo le.”
