Choobu 37:1-24
37 “Mɛɛ ya yiyaŋ a hei okɔɔ,Mi kɔllo nyiiya ya niŋ, mbo wa ya lɔɔ kpu kpu.
2 Yaŋ nilaŋ yekeŋ o diom kpaaya bɛndu Mɛlɛka wo.Diomnda fula ndu o sondo laŋ la cho ko naŋ chaa taŋndaŋ ni.
3 Te Mɛlɛka mal maŋ pɛ mi ma fula o choo choo niŋ,Mi nyɛ ŋualalɛi ŋualalɛi koŋ tiu o lɛŋndeŋ choo kpou.
4 Okoŋ kɔɔli, mi diom bɛndu bɛndoo fula kɔɔli.Diom kpaaya bɛndu Mɛlɛka wo cho ko naŋ chaa taŋndaŋ ni.Nduyɛ te diom ndɔɔ kiolu wɔ kɔɔli le, nyɛ ŋualalɛi ŋualalɛiyo kiolu kɔɔli le.
5 Mi Mɛlɛka deŋi a diom ndɔɔ o nɛi kɔndɔfili bɛndoo niŋ.Mbo tosa sɔɔŋ kaamaŋ naŋ nɔla bɛɛ miŋ bii bila kposoŋ te woŋ.
6 Mbo dimul mɔmndo aa, ‘Chuchu o lɛŋndeŋ choo.’
Nduyɛ mbo dimul piɔɔ aa, ‘Sia tau tau.’
7 Mi Mɛlɛka kuuna walta waŋnda chieeya kpou,*Le halikpeŋ mi nda kpou sina a walta ndɔlaŋ okɔɔ.
8 Mi visiaa yonduaa luɛi o fondaŋnda ndala lɔlaalaŋ niŋ,Nduyɛ ma waŋnuŋ ndoŋ.
9 Mi hueiyii fuku fukuei fula o fondaŋ ndɔɔ mi i hɔŋ,Nduyɛ mi hueiyii misisiei bɛɛ fula kpeŋgii ba luaŋ nde.
10 Te Mɛlɛka yoomu pɛ fuu, mɛŋndaŋ ma simnuŋ kpuŋgbɛi,Nduyɛ mi mɛŋndaŋ o peelaŋ niŋ bɛɛ ma simnuŋ kpuŋgbɛi.
11 A tonya, o nɔla mbo tuu nduyɛ mbo sina mɛɛ kpɛ mɛŋndaŋ ma cho o yumbu yumboo niŋ yɛ.O nɔla mbo sɛŋi taŋndaŋ o halaa niŋ.
12 Mi nyɔɔŋ muŋ wa hiŋnɔŋndo o fondaŋ o yaa muŋ ndo.Nyɛ o yeema mi nyɔɔŋ muŋ tosa o lɛŋndeŋ choo wo, tosaa ŋ tosa ni.
13 O wa le waŋnda nyɛpalaa tusioo choo,* le lɛŋndeŋ pɔɔlaa,Ɔɔ le kaala ndɔ lo lechoo wo chɔmndo, o tosa mi hei yɔŋnuŋ.
14 Yaŋ nilaŋ Choobu.Challɔ kpɛ, ma yiyaŋ nyɛkɛndɛi a walta kɔndɔfilta Mɛlɛka laŋ okɔɔ.
15 A sina pa nyɛ Mɛlɛka tosa a yumbu yumboo wo,Nduyɛ a mɛɛ o tosa mi nyɛ ŋualalɛi ŋualalɛiyo wa kioloo o halaa niŋ yɛ?
16 A sina pa mɛɛ yumbu yumboo hiŋnuŋ o halaa niŋ yɛ?
Walta kɔndɔfilta wana nɔ taasi kpeekpeiyo wo la cho laŋ ni.
17 Yɛɛnɛ tosa yɛ mi nyɛla numndaŋ la tuulu,A boondii hueiyii chaŋ ba tou wo ve wa hɔŋndo o lɛŋndeŋ choo wo?
18 O toosiaa halaa maa tofaŋ ichiliŋ kɛndɛ kɛndɔɔ.Baa num bɛɛ tiuba ma tosa nyɛ pilɛ koŋ kpe?
19 Dimul naa nyɛ naŋ nɔ miŋ dimul ndu wo.Ŋ nɔla miŋ muli le mɛɛ naŋ cho o nyumndaŋ niŋ yɛ le.
20 Baa mɛɛ mi dimul ndu maa I yeema mi soo o ndu lo?
Ɔɔ waŋndo dimi niŋ pa isɔɔ i ya nɔ mi dimul ndu ve?
21 A nɔla pɛŋ ma che nyɛ teŋgaa* le,Mi che bɛɛ o cho diondɔɔ o halaa niŋ,Haaa mɛɛ mi hueiye hɔŋ mi yumbu yumboo faŋaŋ lechoo.
22 Kpeŋgii ba luaŋ nde nyɛ teŋgaa ŋkooliiyo chaŋ ni.Tɔɔmayɛi Mɛlɛkɛi cho bɔɔ nyɛ kɔndɔfili bɛndu.
23 Ŋ nɔla miŋ chii sɔɔŋ kpou sina a Mɛlɛka Kpaaya Kpou Kpou Wo okɔɔ le.Wana kpaaya bɛndoo o cho ni.Fɛɛŋ bɛɛ o feŋaŋ o sakpoyɛi a o sandii nduɛi choo le.
24 Lelaŋ, waŋnda nɔ ma nɔ siooŋii nduɛi.
Mɛlɛka kaala wanaa yiyaŋ maa a nɔ taasioo wa* le.”
Tɛɛsiaalaŋ
^ Hibuluiye, “Mi Mɛlɛka simi walta waŋnda chieeya kpou.”
^ Hibuluiye, “sioŋndeŋ.”
^ Koŋ cho ni, paaleŋ.
^ Hibuluiye, “wanaa taasioo cho o lakɔl la.”
