Choobu 38:1-41
38 Okoŋ mi Chɛhowa mulul Choobu o hueiyii bɛnduei niŋ aa:
2 “Nɛɛnɛ cho yɛ koŋ silala nilaŋ pɛɛsaa,Nduyɛ mbo wa suɛi maa wana nɔ kɔl kalu le wo?
3 Yandii chɔŋ ndɔ ma sim maa wana pɔnɔ.I cho num nyuuniaa, nduyɛ ma mulul la.
4 Kuɛɛnɛ ŋ wa yɛ teleŋ ya wa lɛŋndeŋ toosiaa wo?
Te a yiyaŋ pɛ maa a sina, mɛɛ mulul la.
5 Nɛɛnɛ kɛɛsiaa yɛ mɛɛ kpɛ lɛŋndeŋ le nɔ mi le wa yɛ?Ɔɔ nɛɛnɛ keela yɛ yoole tuwaaleŋ le leŋ tuuwo? Dimul la te a sina pɛ.
6 O yɛɛnɛ niŋ suŋgbuma nduaŋ ma sim yɛ?Nɛɛnɛ yambu yɛ pou kpeekpei lɛŋndeŋ le sim choo wo?
7 Nɛɛnɛ tosa yɛ mi looŋ idiiyoŋ soli chondoŋ diompilɛ,Nduyɛ mi maalikɛiya* kandu deŋioo choo choo, ma tiam balaŋ a nyaaloo?
8 Nɛɛnɛ hendul lɛ mɛŋma ihɛllaŋ pɛŋgulaŋ,Mɛɛ ma buli mi ma fula o demboo niŋ?
9 Boondii ya kumbu maŋ kpu a yumbu yumboo ve,Nduyɛ mi simbul* maŋ o nyumma kpiŋgbiaŋ niŋndo, kuɛɛnɛ ŋ wa yɛ?
10 Teleŋ ya hendul maŋ pɛŋgulaŋ naa ma nɔ mi ma mɛɛlu wa,Nduyɛ mi kiindiaa diola ndɔlaŋ kpiŋ a chiliŋnde wo, kuɛɛnɛ ŋ wa yɛ?
11 Teleŋ ya dimul maŋ aa, ‘A nɔla ma fuuluu naŋ di, kɛ a nɔ ma hiou naŋ choo le,Nanuŋ ŋ cho mɛɛlu a i kpoku kpokuii numnde ni’ wo, kuɛɛnɛ ŋ wa yɛ?
12 Kani bɛɛ* a dimul niŋ paaleŋ maa le siɔ nduyɛ mi le sia,Ɔɔ ma chɔm paale siaaleŋ fondaŋ ndɔɔ?
13 Baa num dimul nyɛ teŋgaa paale siaa ni le mbo teŋga o lɛŋndeŋ choo kpede,Nduyɛ mbo tou wanaa dɛnɛ wɔɔŋnda?
14 Te paaleŋ le sɛ pɛ, mi lɛŋndeŋ le siŋgaŋ, mɛɛ nda handu nuaa tamasioo o puuloo choo yɛ,Nduyɛ mi nyɛm cho o lɛŋndeŋ choo woŋ fula kpendekele mɛɛ kola kɛndɛ kɛndɔɔ wa nuaa yɛ.
15 Kɛ wanaa dɛnɛ wɔɔŋnda chi sɔvɛyɛi nyɛ teŋgaa waa nuaa le.Kanifuule, a nɔla lɛ ma tosa sɔɔŋ wɔɔŋ nda yeema le tosaa woŋ te.
16 A kuɛ niŋ pa naa mɛŋma ihɛllaŋ ma chɛŋ tum nda,Ɔɔ o mɛŋma yiŋgilɛiyaŋ bɛŋgu?
17 Kani bɛɛ a che niŋ dio kpaki piɔmndo,Ɔɔ a che niŋ dio kpaki fondaŋ nyumma bɛnduaŋ ma cho wo?
18 A sina pa mɛɛ kpɛ lɛŋndeŋ le cho le bɛndu yɛ?
Te a sina pɛ sɔɔŋ muŋ kpou, mɛɛ dimul la.
19 Kuɛɛnɛ kpeekpei nyɛ teŋgaa chɛŋ yɛ?
Nduyɛ fondaŋ kuɛɛ nyumndaŋ ma cho yɛ?
20 A nɔla pa ma kuɛ a nyɔɔŋ muŋ o fondaŋnda ndɔlaŋ?Nduyɛ a sina pa nɛila ŋ keeku le kɔlaŋ loŋ ndaŋ?
21 Baa le mɛɛ num aa veluŋ niŋ fɛŋ,Nduyɛ ma nɔ wɔsilaŋ* tau yɛ ŋ sina sɔɔŋ muŋ ni?
22 Kani bɛɛ a luɛi niŋ o fondaŋnda mɔmndo cho o kɛsiaa laŋ niŋ,Ɔɔ a che niŋ fondaŋnda pemboŋ cho ŋ kɛsiaa laŋ?
23 Le teleŋ nyɛpalaa,A le chɔuwo ya kɛsi nyɔɔŋ muŋ ni.
24 Kpeŋgii kuɛɛ nyɛ wawoŋndo* chaŋ yɛ mbo tiu o lɛŋndeŋ choo?Nduyɛ hueiyii hɔŋ ba paaleŋ le chaŋ ndo o lɛŋndeŋ choo ve, kuɛɛnɛ i fula yɛ?
25 Nɛɛnɛ kumbi yɛ nɛiyo le mɛŋma kaakuuma cho o halaa niŋndaŋ?Nduyɛ, nɛɛnɛ chɔm yɛ taŋndaŋ nɛila ma nɔ le keilaŋ ndaŋ?
26 Nɛɛnɛ tosa yɛ mi piɔɔ sia naa wanachiee cho le wa,A o pollo niŋ naa wana o wana cho le wa?
27 Nɛɛnɛ tosa yɛ mi mɛŋndaŋ ma piɔl o lɛŋnde polteŋ niŋ,Nduyɛ mbo tosa mi billo pui?
28 Baa piɔɔ nɔ pa finyaa?Ɔɔ nɛɛnɛ cho yɛ finyaa le mɔmndo?
29 Nɛɛnɛ o dembe mɛŋma ikpuŋgbaŋ ma kilaŋ yɛ?Nduyɛ, nɛɛ toosiaa yɛ mɔm yuuyuu chaŋ o choo choo niŋndo?
30 Nɛɛnɛ tosa yɛ mi mɛŋndaŋ ma kendu lechoo poŋ naŋ chaa pouwo ni?Nɛɛnɛ tosa yɛ mi mɛŋma yiŋgilɛiyaŋ ma liimaŋ kpuŋgbɛi?
31 A nɔla pa ma yiu yiu looŋ kundaŋ nda veelu aa Kima woŋ,Ɔɔ ma tiimbuu looŋ kundaŋ nda veelu aa Kɛsili woŋ?*
32 A nɔla pa ma chɔm looŋ kundaŋ boondii ŋ nɔ miŋ fula ve,Ɔɔ ma chɔm looŋ kundaŋ nda veelu aa Asi woŋ a chuauwaa nduaa nɛiyo?
33 Nyɛm cho o choo choo niŋndoŋ, a sina pa sawala ŋ cho lebɛŋgu laŋ?A nɔla pa ma tusi sawala laŋ le mi nyɛm cho o lɛŋndeŋ choo woŋ wa o laŋ bɛŋgu?
34 A nɔla pa ma dimul yumbu yumboo maa,Piɔɔ bɛndu bɛndoo sia num choo mbo liviaa num?
35 A nɔla pa ma yɔŋ nyɛ ŋualalɛi kiolu o halaa niŋndo?
Nyɛ ŋualalɛi koŋ huŋ pa naa num chua mbo dimi aa, ‘Nuaa ya nanuŋ?’
36 Nɛɛnɛ wou yɛ taasioo o yumbu yumboo niŋ?*Ɔɔ nɛɛnɛ ke yɛ nyɛm cho o halaa niŋndoŋ sinapɛŋgoo?*
37 Nɛɛnɛ nɔ yɛ taasioo le mbo tiuba le chɔmndo mɛɛ yumbu yumboo cho bolle pilɛ yɛ?Ɔɔ nɛɛnɛ nɔla yɛ mbo hulu mɛŋma cho o choo choo niŋndaŋ?
38 Nɛɛnɛ tosa yɛ mi chundoo diinuŋ naapilɛ,Nduyɛ mbo liimiaŋ kpuŋgbaŋ o lɛŋndeŋ choo?
39 A nɔla pa ma nuuviaa nyɛdiaa le kpɔkuŋndo?*Baa a nɔla pa ma ke kpɔkuŋaa chuauwa nyɛ nda yeema wo?
40 Nɛɛnɛ dimul lɛ kpɔkuŋnda le ma viŋiŋ o fondaŋnda ndalaŋ,Nduyɛ ma hini a viaŋnaŋ le visiaa delɔɔ choo?
41 Nɛɛnɛ ke yɛ basabasakuendiaa nyɛdiaa,Te chuauwaa ndaa chaŋ pɛ o Mɛlɛka lo le malaa,Nduyɛ ma wa heeloo a tuusoo le mɛɛ nda nɔ nyɛ o nyɛ le dio le yɛ?
Tɛɛsiaalaŋ
^ Hibuluiye, “chuauwaa Mɛlɛkaa.”
^ Ɔɔ “mɔɔsiaa.”
^ Hibuluiye, “O palɛi numnde niŋ kpou.”
^ Hibuluiye, “palɛi.”
^ Ɔɔ naapum, “nyɛ ŋualalɛiyo.”
^ Looŋ kundaŋ muŋ, te wana wa pɛ o chieeŋndo choo ma tofa o halaa niŋ, ma che muŋ ŋ kilaŋ naŋ chaa visiaa ɔɔ nyɛm cheleŋndoŋ ni.
^ Ɔɔ naapum, “wanachioo niŋ.”
^ Ɔɔ naapum, “sianapɛŋgoo o kɔltaŋ niŋ.”
^ Ɔɔ “yalakanaa.”