Choobu 39:1-30
39 “A sina pa teleŋ chuiŋaa bandilaa kuam ndo?
Nduyɛ, kani bɛɛ a che niŋ kiallo o komɔɔ?
2 A sina mɛɛ kpɛ nda chii paŋgoŋ a yollo yɛ?
Nduyɛ a sina pa teleŋ nda kuam ndo?
3 Visiaa haa te o pilɛ wa komɔɔ pɛ, biɔmnɔŋndo o biamnuŋ ni,Haaa mbo fula o nyɛ nɛiyaa niŋ.
4 Te chuauwaa ndaa kaŋ kendu pɛ, a kuɛŋnuŋ,Nduyɛ a miiŋgu lɛ nda o ibuŋ te.
5 Nɛɛnɛ mal lɛ sofɛlɛ yondoo mbo wa balɔŋndo?Nduyɛ nɛɛnɛ tiimbuu yɛ ndu o yuei?
6 Ya ke ndu chaltaŋ o pollo niŋ ni,Mi siiŋguu lɛŋnde ihɛlteŋ naa nduaa chalaa.
7 Sofɛlɛ yondoo tui bɔɔluu cho o chiee bɛndoo niŋndo le.O tui waŋndo ndu deŋullo le ndu wali tosal te.
8 Mbo hel o pemboŋ choo billo nuuviaa,Nduyɛ mbo nuuviaa bil puiyaa kɛ kɛ fee.
9 A dimul pa nau yondoo* le mbo tosal num wallo mbo tosa?
A lɔli ndu pa o kuŋga chɔluaa numnda niŋ?*
10 A nɔla pa ma baa nau yondoo dɛndɔɔ?Ɔɔ o tual num pa kɔɔli le waa* o kpoloŋndo niŋ?
11 A nɔla pa ma tiindaŋ kpaaya ndɔ bɛndoo,Le walta numnda bɛndulaŋ tosaa?
12 A tiindaŋ ndu pa le mbo chuuŋgiaa nyɛm ŋ kou woŋ,Okoŋ mbo hiŋ a muŋ o yasaba?
13 Mi ɔsiluichiiyo lɔɔ kumbaŋnda ndɔlaŋ a nyaale.Kɛ baa a tuu pa kumbaŋnda ndɔlaŋ a kumbaŋnda sitɔkiiyo?
14 Lɛŋ ɔsiluichiiyo duau peltaŋ ni mbo mɛi laŋ loŋ,Nduyɛ mbo manda laŋ la tuu kpɛi o chundoo niŋ.
15 Te o mɛi laŋ pɛ, o buulaŋ ndɛ maa waŋndo cho laŋ hunɔɔ nɛi choo mbo pesi laŋ,Ɔɔ maa visi yondoo cho laŋ hunɔɔ pesi le.
16 Mbo bii chuauwaa nduaa ŋuasu ŋuasu naŋ chaa o cho ndu le nɔ nda le.O buulaŋ pɛŋ maa saŋga ndɔɔ cho lo fondo fuu le.
17 Kanifuule, ya Mɛlɛka ke ndu taasi le,*Nduyɛ I ke ndu sinapɛŋgoo nyɛɛmbuiinii bɛɛ le.
18 Kɛ te o chɛŋ pɛ mbo wa kumbaŋnda ndɔlaŋ lɔɔ,Mbo mam soo a wana wa kɔlaŋ o ndu choo wo.
19 Baa num ke soo kpaaya o nɔ wo ni?
Ɔɔ num kumbu ndu kɛsei a yiiŋii wusiaa wusiaa o nɔ ve ni?
20 A nɔla pa ma tosa mbo huulu maa soonɔ?
Te o yoomu pɛ fuu a kpaaya ndɔɔ, mi siooŋnde bii wana.
21 Mbo wusuŋiaa lɛŋndeŋ o kpoloŋndo niŋ a mayoomu,Nduyɛ mbo kuɛ sululu le chɔuwo.*
22 Mbo mam siooŋnde, nduyɛ o yɔŋ isiooŋ le nyɛ o nyɛ le.
O chi muɛi faŋnde mbo muliŋ a kiltaŋ te.
23 Mi chiŋuaŋ ma wa iwoku wokuei o bɔlɔ nda wou maŋ niŋndo ndu o kɔɔ,Nduyɛ mi baltaŋ la wa i ŋualalɛi ŋualalɛiye.
24 Mbo wa huuloo kpeekpei le kɔlaŋ o chɔuwo,Nduyɛ te o tuei dɔɔ pɛ bulu chɔuwo, o nɔla lɛ simndaŋ te.*
25 Te o tuei pɛ bulu chɔuwo, o lo ko mbo soo a i hɛu hɛu o wa ve.
O lo landaŋ mbo tuei chɔuwo chuŋ,nduyɛ mbo tuei kuubaa chɔuwa deŋioo vɛlɛ a chaŋndaŋ o chɔuwo.
26 Baa sinapɛŋgu numndo tosa ni mi siŋgbiaa balu o choo choo niŋ,Nduyɛ ma pɛŋgɛla kumbaŋnda ndalaŋ kpeŋgii ba tou ve?
27 Baa num dimul kowɔɔ ni le mbo hel choo choo pɔ pɔ,Nduyɛ mbo taŋgul waaŋnde ndɔleŋ loŋ?
28 O pouta vilɛi vilɛilaŋ choo o lɔl ni,O pouta vilɛi vilɛilaŋ choo, naa wana nɔla fuuluu le wa chalta ndɔlaŋ la wa ni.
29 Loŋ o lo ni mbo nuuviaa nyɛdiaa.O nɔla mbo che landaŋ a hɔlta ndɔlaŋ.
30 Koowaŋ chuauwaa nduaa kol ni,Nduyɛ ba o ba dialuŋ vilɛiyoŋ wa pɛ, loŋ o wa ni.”
Tɛɛsiaalaŋ
^ O kpeekpei niŋ, visioo hoo velaŋ a chiiyo
^ Ɔɔ “naa ŋ wou chɔluaa nyɛdiaa wa.”
^ Hibuluiye, “kulloŋ saŋɔɔ.”
^ Hibuluiye, “tosa mbo puɛɛnuŋ taasioo.”
^ Hibuluiye, “Mbo kuɛ le mbo bɔŋaŋ a wolɔɔla chɔulaŋ.”
^ Ɔɔ naapum, “o laalaŋ ndɛ le.”
