Choobu 4:1-21
4 Mi Ɛlifaasi Tɛmanaitiinɔɔ dimi aa:
2 “Te waŋndo kindiŋ pɛ le suɛi naa num chua, baa a nɔla ma biunuŋ te?
Kanifuule, nɛɛnɛ cho yɛ mbo kuuna ndupila suɛi?
3 A tonya, a miŋgi niŋ wanaa bɔɔbɔɔ o nɛi,Nduyɛ mi num oo luei wanaa vi ŋdial la yoomuaŋ.
4 Mi diomnda num oo dimi laŋ laa tosa mi wanaa del la chɛŋ,Nduyɛ mi num oo luei wanaa wulaŋ la wa nyiiyaa wa yoomuaŋ.
5 Kɛ suŋ suŋ niŋ nyɛ pilɛ koŋ kpe komal num ni, nduyɛ ma wa o saŋgaa niŋ.Num bɛɛ o piiliaŋ num, ma tambu kɔl.
6 Baa siooŋii ŋ nɔ le Mɛlɛka ve ke num tiindaŋndo le?
Baa lo lechoo numndo ke num tiindaŋndo le?
7 Yandii yiyaŋndɔ: A che niŋ mi wana tosa suɛi wɔɔŋ te wo sɔla tambei?
Lɔɔ kuɛɛ ŋ che yɛ niŋ wana cho sakpo wo tambei sɔlaa?
8 O ya sina wo cho ni maa, nyɛ ŋ saŋ ndo, ndu ŋ kuau ni.Te a waa pɛ dɛnɛ wɔɔŋndo nduyɛ ma tɔl kpundɔɔ, laŋ ŋ kuau ni.
9 Te Mɛlɛka yoomu pɛ, a sɔla tambei.Nduyɛ te o dɔunuŋ tumbe pɛ, mɛɛlula ndalaŋ la fuuluu.
10 Mi kpɔkuŋndo* a kpɔkuŋ fɔŋndɔɔ pɛɛliaa,Kɛ hali kpɔkuŋaa nɔ chiŋndoŋ ŋ kala kala wa bɛɛ, mi chiŋuŋ ndaŋ yomi.
11 Mi kpɔkuŋndo sɔla piɔmndo te o ve visiaa biyɔɔ mbo dia le,Okoŋ mi chuauwaa nduaa saŋnuŋ.
12 Mi waŋndo huŋ sɔɔ sɔɔ naa ya chua,Nduyɛ mbo suaa ya o lani toolo toolo.
13 Mɛɛ ya wa o luaŋ yikpi ichɔllo,Mi cha yilaŋndoŋ ŋ paaliaŋ yiyaŋnda nilaŋ tau woŋ.
14 Mi siooŋii bɛnduei bii ya,Mi kandu nyiiyaa kpa kpa.
15 Mi nyinaa kei ya o hɔl mbo hiau,Okoŋ mi misimisioo tiu ya lekɔɔ kpou.
16 Mbo kɔ sim yi,Kɛ I sina ndu pɛŋgu le.
Mi chaŋnuŋ nyɔɔ ya o hɔl,Nyɔɔ wa doŋ doŋ nduyɛ mi tuɛi diomndo aa:
17 ‘Baa wanachioo nɔla pa mbo wa sakpo mbo hiou Mɛlɛka?
Baa wanachioo nɔla pa mbo wa walaŋ mbo hiou Wana Toosiaa ndu wo?’
18 Mɛlɛka laalaŋ a buɛiyaa nduaa le,Nduyɛ mbo nuuviaa pɛŋ siɔuwoŋ maalikɛiyaa nduaa* o ŋdial.
19 Te o tosa wɔ lende pɛ a maalikɛiya, ɔɔ niŋ waŋnda chieeyaa cho luaŋ o chiɛila nda toosiaa a puuloo laŋ niŋnda,Wanaa kila chiiyuŋ chiɛila ndalaŋ lɛŋ nda?Haupa ma sɔla tambei mɛɛ kaaŋguaa sɔla nuaa tambei yɛ!
20 Ma wa yoomu idii, kɛ nanuŋ a paale yɔŋgaŋndeŋ a sɔla piɔmndo.Ma sɔla tambei lefafɛɛŋ, nduyɛ wana sina pɛŋ a nda okɔɔ le.
21 A cho ko mɛɛ tɛndiiyo wa nuaa o kindaŋ lɛŋ mi yoole ndɔleŋ le suŋguŋ yɛ.
Ma vi lende a nɔ taasi le.
