Choobu 40:1-24
40 Mi Chɛhowa hiau lachi a suɛi o Choobu lo aa:
2 “Baa wana nuuviaa siɔuwoŋ acheleŋnda o ŋdial lo nɔ pa mbo simul ya Mɛlɛka Kpaaya Kpou Kpou Wo?
Wana yeema mbo miŋgi ya Mɛlɛka o nɛi yo mulullɔ ya.”
3 Mi Choobu mulul Chɛhowa aa:
4 “I cho nyɛ o nyɛ num o hɔl te.
Yɛɛ ya nɔla yɛ mi mulul num?
I handuŋ baa o sondo mi kumbu ndu kpɔku.
5 I soo le pilɛ, kɛ I cho lɛ nyɛ o nyɛ muli le.Mi suaa le diiŋ, kɛ I cho lɛ isɔɔ kposoŋ te.”
6 Okoŋ mi Chɛhowa mulul Choobu o hueiyii bɛnduei niŋ aa:
7 “Yandii chɔŋ ndɔ ma sim maa wana pɔnɔ.I cho num nyuuniaa, nduyɛ ma mulul la.
8 Baa a laalaŋ nuaa maa wana sandu wo le ya cho le?
Baa pɛɛsaa ŋ yeema ya ni le halikpeŋ ma chɔm maa wana sakpoo ŋ cho ni?
9 Kpaaya numndo sulaŋ pa a kpaaya ya Mɛlɛka tonyaa?Ɔɔ mi diom numndo deŋi pa mɛɛ diom nuu deŋi maa letaŋ yɛ?
10 Yandii chɔm ndɔ naŋɔɔ numndo, vɛlɛ a mɛɛ kpɛ ŋ nɔ kpaayaa yɛ.Chɔm ndɔ bɛɛle numndeŋ vɛlɛ a kpaaya num bɛndoo.
11 Chɔm ndɔ mɛɛ kpɛ ŋ tuulu kɔl lɛ.Tofawɔ wana o wana cho wana heelaŋ, ma tusi ndu toolo.
12 Tofawɔ wana o wana cho wana heelaŋ, ma tusi ndu siɔmbulaŋ,Nduyɛ ma tɛɛmbuu wanaa dɛnɛ wɔɔŋnda o lepilɛ niŋ kpe.
13 Vioŋ nda kpou o puuloo niŋ,Nduyɛ ma kinda nda* o fondaŋ wana chi le wo.
14 Te a nɔla pɛ ma tosa sɔɔŋ muŋ,Mɛɛ I tiuba mi dimi maa a nɔla ma piŋi numpila a kpaaya numndo.
15 Tofawɔ Bɛhimɔti* ya toosiaa hoo wo, mɛɛ ya toosiaa num yɛ.
Billo o dia ni maa nau towa.
16 Tofawɔ se kpaaya bɛndu cho o peluŋ ndɔŋ niŋndo,Vɛlɛ a kpaaya bɛndu nyɛsuma cho ndu o dembe waŋ ma nɔ wo!
17 Mbo kindi puiile ndɔleŋ peŋ naŋ chaa yɔm sida wo ni.Nyɛsuma cho o lɔlula ndɔlaŋ niŋndaŋ ma cho ma baaliaŋ naapilɛ.
18 Paala ndɔlaŋ la cho ko maa chiliŋii siaŋɛi* nɔ tɛɛŋgoo leniŋ nde.Peluŋ ndɔŋ kendu naŋ chaa chiliŋnde ni.
19 O visiaa ya Mɛlɛka toosiaa o chieeŋndo choo ma nɔ kpaaya wa tɛɛŋ kpou, ndu hiou.Ya Wana Toosiaa ndu wo kinɛi nɔla ni mi sɔɔŋguu ndu ikɛi a muɛi nii faŋnde.
20 O pembuŋ bɛndoŋ choo naa visiaa yonduaa pisul la,Loŋ nyɛdiaa ndɔɔ cho ni.
21 O bɔɔla ŋyɔlaŋ bɛŋgu o hini ni.Bil wul o yɔɔŋ niŋndo, leniŋ o viaŋnuŋ ni.
22 Bɔɔla ŋyɔlaŋ la ke ndu wunduaŋ ni.Mi bil wa o kpoloŋndo niŋndo balu ndu silɔ.
23 O yɔŋ bɛɛ mi pioo wa ikpoku kpokuei, o yɔŋnuŋ pulaŋ pulaŋ te.
Mbo tiindaŋ o ndupila niŋ, o yɔŋ bɛɛ mi Chɔɔdaŋ ndaŋ ma wa ndu kuello sululu.
24 Baa waŋndo nɔla pa mbo bii ndu,Ɔɔ mbo baa ndu doŋnde* o miliŋ te o wa pɛ tofaa?