Choobu 41:1-34
-
Mɛlɛka tɛɛsiaa a Liviaataŋ okɔɔ (1-34)
41 “A nɔla pa ma bii Liviaataŋ* a doliŋii suuwo?Ɔɔ a nɔla pa ma yii ndu diɔɔmuleŋ a yooleŋ?
2 A nɔla pa ma baa ndu yooleŋ o miliŋ,Ɔɔ ma buli ndu yaalolaŋ a doŋnde?*
3 O nyɔɔlu num pa,Ɔɔ mbo soo a lebɛɛ o numndo?
4 Baa o cho pa kpemaa yii a num,Le halikpeŋ mbo wa num o ba o chɛleŋ niŋ?
5 Baa a nɔla pa ma pisul a ndu mɛɛ ŋ pisul nuaa a youwo yɛ?Ɔɔ a baa ndu pa o yooleŋ le mi chuauwaa num aa laanduaa pisul a ndu?
6 Wanaa yɔɔyaa nɔla pa ma pisi ndu?
A nɔla pa ma piɔu ndu wanaa leyulaa tɛɛŋ?
7 A nɔla pa ma pei ndu baltaŋ lekɔɔ,Ɔɔ ma chuku ndu bolleŋ a bal nda via suuwa wo?
8 Te a pilaŋ ndu pɛ, o cho num chiŋalaŋ a sɔŋgɔɔ,Fɛɛŋ bɛɛ a del lɛ kɔl le i waa lende tosa le.
9 Nɔ pɛŋ tiindaŋ maa a cho ndu ba tiu le.
Kanifuule te a che ndu dɔɔ pɛ, siooŋnde bii num.*
10 Wana o wana bii kɔllo mbo tiŋ ndu le.
Mɛɛ nɛɛnɛ nɔla yɛ mbo simul la?
11 Nɛɛnɛ ke yɛ ya niŋ nyɛ le mi miŋgul ndu sɔŋgɔ koŋ?
Nyɛ o nyɛ cho o chieeŋndo choo, ya nɔ ni.
12 I cho chɔɔlu isɔɔ a peluŋ ndɔŋ okɔɔ,Yoomuma nduaŋ, vɛlɛ a mɛɛ dialuŋ ndɔŋ kpou cho ŋ kala poŋ yɛ.
13 Nɛɛnɛ soli yɛ ndu niŋ yauwo?
Te o kumbi yaalolaŋ pɛ, nɛɛnɛ nɔla yɛ mbo luɛi leniŋ?
14 Nɛɛnɛ nɔla yɛ mbo kanya sondo ndɔ* cho maa dio wo?
Chiŋuŋ cho ndu o sondo woŋ weenuŋ bɔɔ.
15 Kɛkɛulaŋ la cho ndu o kɔɔ ni,*Nduyɛ la cho la baaliaŋ kpɔlɔkɔ.
16 La choŋnaŋ kpɛɛlaŋ kpɛɛlaŋ,Nduyɛ hueiye bɛɛ nɔla mi i keeku laŋ tɛɛŋ te.
17 La cho la holiaŋ naapilɛ,Mi la wa la biilaŋ kpiŋ kpiŋ, wana nɔla ma piɔu laŋ tɛɛŋ te.
18 Te o kpisiŋa pɛ, yiŋndeŋ le fula ndu o miliŋ.Nduyɛ, hɔltaŋ ndu la siaŋa mɛɛ paaleŋ le fula nuaa idii yɛ.
19 Te o kanya sondoo pɛ, nyɛ ŋualalɛi ŋualalɛiyo fula ndu o sondo ni,Nduyɛ mi tɛŋgɛ tɛŋgɛla leyiŋndaŋ la fula.
20 Mi kumnde fula ndu o miliŋ,Mɛɛ yiŋndeŋ le kinduŋ nuaa mi kumnde wa helɔɔ yɛ.
21 Te o yoomu pɛ fuu, yiŋndeŋ le sandu.Nduyɛ yiŋnde wule wule leŋ le fula ndu o sondo ni.
22 Kpaayaa pila kɛsii nduɛi nɔ ni,Nduyɛ wana o wana che ndu pɛ, siooŋnde bii ndu.
23 Dialuŋ ndɔŋ cho ŋ biilaŋ, nduyɛ ŋ kala poŋ.Wana nɔla ma piɔu muŋ tɛɛŋ te.
24 Kɔl ndɔɔ cho o kala poŋ maa pou,Nduyɛ o cho o kala maa pou nda chuii nyɔɔŋ lechoo wo.
25 Te o chɛŋ pɛ, mi siooŋnde bii wanaa mayoomuaa kpou.Te o wa kɔlaŋ o mɛŋndaŋ niŋ pɛ, siooŋnde bii num ni.
26 Muɛi faŋii kɛ kɛ tiu ndu ba le,Kɛlɛŋgaa niŋ te mi ballo ɔɔ bolle chiŋɔleŋ le nɔla ndu.
27 Chiliŋnde cho ndu ko o hɔl maa bil,Nduyɛ chiliŋii siaŋɛi* cho ndu ko o hɔl maa yɔm siouwɛi.
28 Siooŋii bii ndu le lechiŋɔ le,Nduyɛ pouta faandalaŋ la cho ndu ko o hɔl maa latɛfɛ.
29 O che ko yɔm biŋgioo maa tɛu.Nduyɛ te a wuu ballo le ndu viɔɔ pɛ, mamɔɔ o mam ni.
30 Dembe ndɔɔ cho ko mɛɛ kpɛɛnɛi piɔl nuaa mi i wa siombu siombu yɛ.Mbo sasuŋ o loolioo niŋ, naŋ chaa yɔmii nda luaa witiiyoŋ nde ni.
31 Mbo tosa mi mɛŋndaŋ ma ŋol mɛɛ kpɛɛnɛi wa nuaa ŋolɔɔ yɛ.Mbo kalaŋiaa pee mɛŋma ihɛllo mɛɛ chuɛiyaŋ ma ŋol nuaa o kpɛɛnɛi niŋ yɛ.
32 Te o wa kɔlaŋ o peelo pɛ, hiiyo kinduŋ o mɛŋndaŋ choo,
Nduyɛ mi hii koŋ dendu fo fo naŋ chaa yuluŋnde ni.
33 Nyɛ o nyɛ cho o lɛŋndeŋ choo maa ndu le.Mɛɛ o toosiaŋ yɛ, o nɔ isiooŋ te.
34 Mɛɛ mɛɛ visioo nɔ kpaayaa, siooŋii bii ndu le ndu le.
Ndu cho masaa le visiaa kpaayaa bɛnduaa kpou ni.”
Tɛɛsiaalaŋ
^ Naapum kuiyo.
^ Hibuluiye, “yɔɔŋ.”
^ Ɔɔ “a del lɛŋ.”
^ Hibuluiye, “hɔlaa nduaa.”
^ Ɔɔ naapum, “Kɛkɛula ndɔlaŋ ndaŋ la tosa ni mbo heeluŋ.”
^ Ɔɔ “kapaa.”
