Choobu 42:1-17
42 Okoŋ mi Choobu mulul Chɛhowa aa:
2 “I sina niŋ kɛsɛ maa a nɔla ma tosa nyɛ o nyɛ fee,Nduyɛ maa nyɛ o nyɛ ŋ kɛɛsiaŋ pɛ o kɔl le tosaa, a bumba ndu tosa le.
3 Ma nyuna aa, ‘Nɛɛnɛ cho yɛ koŋ silala nilaŋ pɛɛsaa maa wana nɔ kɔl kalu le wo?’
I wa suɛi, kɛ I ve nyɛ ya wa dimioo wo bila biyɔɔ le.I wa suɛi a sɔɔŋ kɔndɔfiliŋ bɛnduŋ ya sina le woŋ okɔɔ.
4 Ma dimi aa, ‘Yandii, yaŋ nilaŋ mi soo.
I cho num nyuuniaa, nduyɛ ma mulul la.’
5 Yaa tuei niŋ a num okɔɔ.Kɛ suŋ suŋ niŋ, I che num a lehɔl pɛɛŋ.
6 Lelaŋ nyɛ o nyɛ yaa dimi, I dimi lɛ le.”Le sabu koŋ ya wookuŋ ni mi chal o chundoo niŋ a pultaŋ.
7 Mɛɛ Chɛhowa chii isɔɔ o Choobu lo, mi Chɛhowa dimul Ɛlifaasi Tɛmanaitiinɔɔ aa:
“I dɔɔnuŋ tumbe o kala kala a num vɛlɛ a chaaŋaa num aa ŋiɔɔŋnda. Kanifuule, la dimi tonya a ya okɔɔ maa buɛi nuu Choobu le.
8 Lelaŋ la chua nauwaa towaa a ŋɔmmɛu a saa konduaa a ŋɔmmɛu, mi la kuɛ o buɛi nuu Choobu lo, mi la kɔ soli salalaŋ le nyapila. Nduyɛ, buɛi nuu Choobu cho piɛi le nya. I cho piɛile ndɔleŋ chɛlɔɔ, I tusi nya nyɛpalaa choo le diɔmii nyɛi le. Kanifuule, la dimi tonya a ya okɔɔ maa buɛi nuu Choobu le.”
9 Okoŋ, mi Ɛlifaasi Tɛmanaitiinɔɔ, Bilidadi Suhaitiinɔɔ, a Sofaa Naamataitiinɔɔ kɔ tosa mɛɛ Chɛhowa dimul nda yɛ. Nduyɛ, mi Chɛhowa chɛl piɛile Choobu leŋ.
10 Mɛɛ Choobu chii piɛi le chaaŋaa nduaa, mi Chɛhowa faŋa ndu nyɛpalaa wa ndu choo wo, nduyɛ mbo miŋgi ndu sul ndɔɔ o ba. Nyɛ o nyɛ ndoo nɔ paandu, mi Chɛhowa ke ndu bɛmbɔɔ le diiŋ.
11 Mi wanayaŋ ndɔŋ vɛlɛ a chaaŋaa nduaa paanduaa kpou huŋ dio nyɛdiaa a ndu latulu o ndu lo chiɛiniŋ. Ma bii mɔnɛi a ndu latulu, nduyɛ ma dɛɛniaa ndu kɔllo le nyɛpalaa o nyɛpalaa Chɛhowa chɛl mbo keeku ndu choo. Mi wana o wana ke ndu kanii* pɔmbɔ a kelɛi ikooliiye.
12 Okoŋ mi Chɛhowa duau Choobu sala o yoomu ndɔɔ mɛɛlulaŋ, mbo hiau bɛɛ o kandɔŋndo. Mi Choobu sɔla saa 14,000, nyɔɔmiaa 6,000, nauwa 2,000, a sofɛliaa laanduaa 1,000.
13 Mbo vialu vɛlɛ puaa a ŋɔmmɛu a waŋ laanduaa a yaa.
14 Mbo ke chua ndɔ tasoo diolaŋ aa Chɛmaima, o diiŋ ndɔɔ Kɛsaya, nduyɛ o yaa ndɔɔ Kɛluɛŋ-hapɔki.
15 Wana lanɔ kɛ kɛ ve o lɛŋndeŋ choo mbo sulaŋ naŋɔɔ a waŋ laanduaa Choobu velu wa le. Nduyɛ, mi finya nda ke nda nyɛm kiɔɔŋ nda yemaa ndaa latulu.
16 Okoŋ kɔɔli, mi Choobu chii vɛlɛ wɔsilaŋ 140. Nduyɛ mbo cha chuauwaa nduaa, chuauwaa nduaa mamaa, a chuauwaa mamaa o chuauwaa mamaa niŋ.
17 Mi Choobu viau achal tau, nduyɛ mbo tuɛi yoomu ndɔɔ yeela.* O mɛɛlulaŋ kpɔŋ, mbo wu.
