Choobu 5:1-27
5 “Chaŋ ŋ cho le malaa wo, baa wana o wana cho num pa mulullo?
Maalikɛinɔ kuɛɛnɛ ŋ cho yɛ muliŋ o ndu lo?
2 Suɛi nɛyaŋnde kɛsiŋndo o kɔl, mi i dii diɔmndo,Nduyɛ, mi kaa paŋalɛiyo dii wana keleŋa sɔɔŋ laalaŋndo wo.
3 I che niŋ diɔmndo batiuwaa sɔlaa,Kɛ o lepilɛ niŋ kpe, mi nyɛpalaa tual chiɛi ndɔɔ choo.
4 Chuauwaa nduaa cho o kpundɔɔ niŋ,Nduyɛ ma chuii nda mululu o dio kpaki chioo, wana o wana piŋi nda le.
5 Wana yiaaŋ ma cho nɛiyo wo, nyɛ o kuau wo o dia ni,O yɔŋ bɛɛ mbo kou ndu o yɔɔŋ tɛɛŋ.Nduyɛ, le chaanda koni nyɛm ndɔŋ wa ni.
6 Sɔɔŋ palaŋ komal waŋndo woŋ, o cho lɛŋ te ŋ chaŋ te.Nduyɛ kpundɛla komal ndu laŋ bɛɛ, o cho lɛŋ te la chaŋ te.
7 Mɛɛ yiŋndeŋ le luam nuaa yɛ,Lende yoomu wanachioo cho o piaa cha a kpundɛlaŋ ni.
8 Te ndoo yɔŋ pɛ aa ya, o Mɛlɛka lo ya wa muliŋ ni,Mi yaa chɔm ndu bahawɛi nuu,
9 Wana tosa sɔɔŋ bɛndoŋ ŋ wana sina pɛŋgu le woŋ,Sɔɔŋ kɔndɔfiliŋ wana nɔla ma chɔm te woŋ.
10 Mbo tosa mi piɔɔ sia o lɛŋndeŋ choo,Nduyɛ mi piɔɔ koŋ pɔɔliaa tɔlɔɔlaŋ.
11 Mbo heelu wanaa bala fonduaa tema,Nduyɛ mbo piŋi wana cho o kɔl tambɛiyo niŋndo.
12 Mbo tɛɛmbuu tuula wanaa kaŋgalaa,Le halikpeŋ a sɔla batiuwaa o nyɛ nda tosa wo niŋ te.
13 Mbo tosa mi wanaa taasiaa del o yaŋɔɔla ndala kaŋgalaa laŋ niŋ,Le halikpeŋ mi tuula ndalaŋ la tambu.
14 A cha ko paaleŋ aa nyumndaŋ ni,Ma keeliaa balaŋ ipala deŋ naŋ chaa o nyumndaŋ niŋ nda cho ni.
15 Mbo piŋi wanaa bala fonduaa yaamɔɔwaa ndaa o ba.Wanaa nɔ dialuŋ kala le wa, mbo tosa wanaa dialuŋ kalaa tiu nda ba le,
16 Le halikpeŋ mi wanaa bala fonduaa nɔ tiindaŋndo,Kɛ mbo kiindiaa wanaa sendu le wa sondolaŋ.
17 Kɔl kɛndɔɔ cho le wana Mɛlɛka sila wo!Lelaŋ, kɛɛ sila Mɛlɛka Kpaaya Kpou Kpou Wo le.
18 Mbo tusi waŋndo nyɛ nɛiyaa choo, kɛ mbo yiu yiu ndu pauve.Mbo boli waŋndo, kɛ mbo siŋgi ndu a bala ndɔlaŋ.
19 O nɔla mbo soli num o kpundɛlaŋ la ŋɔmpum niŋ,Nduyɛ kpundɛ ŋɔmmɛu wo bɛɛ nɔla mbo komal num te.
20 Yima bɛnduaŋ ma del bɛɛ, o cho tosa a cho piɔm sɔla le.Nduyɛ a teleŋ chɔuwo, muɛi faŋnde cho num diyɔɔ le.
21 Mɛlɛka cho num manda, sɔɔŋ dɛnɛ wɔɔŋ waŋnda dimi woŋ piiliaŋ num niŋ te,Nduyɛ siooŋii bii niŋ num a teleŋ kpundɔɔ le.
22 Num cho wa mamɔɔ te kpundɔɔ del pɛ ɔɔ mi yima bɛnduaŋ ma del,Nduyɛ siooŋii bii niŋ num le visiaa yonduaa cho o lɛŋndeŋ choo wa le.
23 Pouta bɛndulaŋ yondoo niŋ la yɔŋ niŋ num nyɛ le,*Nduyɛ visiaa yonduaa bɛɛ cho wa o kɔl nyulu niŋ a num.
24 A cho sina kɛsɛ maa a choŋnuŋ hɛnɛkɛ* o tɛndii numndo niŋ.A kuɛ pɛ chɔluaa numnda mɛɛndaŋndo, a cho saalɔŋ maa o pilɛ bɛɛ feŋaŋ lechoo le.
25 A cho chuauwa violɔɔ tau,Nduyɛ mi chuauwaa num aa mamaa wa a hɔbɛi, mɛɛ billo cho nuaa o lɛŋndeŋ choo yɛ.
26 Haaa ma huŋ kɔ o sɛiyo niŋ a cho waŋnɔŋ kpeŋkpeleŋ,Mɛɛ nda yii nuaa witiiyoŋ a kpɔŋndaŋ a teleŋ nda kialu muŋ ndo yɛ.
27 Ŋ chii suɛi hei yaasiaa, nduyɛ miŋ saaluŋ maa tonya i cho ni.
Lelaŋ, yaŋ nilaŋ ma chɛl ndi.”
