Choobu 6:1-30
6 Okoŋ mi Choobu dimi aa:
2 “Te wana tuu pɛ dɛnɛ ni palaa a kpundɛla komal la laŋ,Nduyɛ ma handu o sekeleiyo choo,
3 Lusul ndɔɔ cho hiouwɔɔ siooŋnde o pee mɛŋma ihɛllo kɔŋgɔ.
Lelaŋ kpeekpei ya suaa nuaa ni maa diɔm.*
4 Chiŋɔma Mɛlɛka Kpaaya Kpou Kpou Wo wuu waŋ ma vɛ ya.Nduyɛ yindɔma chiŋɔma maŋ ma tiu ya o ŋdial kpou.Sɔɔŋ palaŋ Mɛlɛka tusi ya choo woŋ ŋ cho bɔɔ.
5 Sofɛlɛ yondoo nɔ pɛ billo le dioo, o cheŋ a yiaaŋ te.Nauwo ve nyɛdiaa dioo mbo chaŋ le nyɛdiaa lepɛŋndo le.
6 Baa nyɛdiaa paŋndo diaŋnuŋ pa te hɛlii ve leniŋ te,Ɔɔ nyɛ humbu cho o pelte sɔɔ leŋ niŋndo yeela pa?
7 I pilaŋ nyɛm suu waa nuaa kposoŋ te,
Kanifuule ŋ cho ko maa pɔsɔnioo o nyɛdiaa nuu niŋ.
8 Maa Mɛlɛka tuei piɛile nileŋ,Nduyɛ mbo peelu yeemɛi nii fɔ!
9 Ndoo bɛnda bɔɔ mi Mɛlɛka chuii ya mululu,Nduyɛ mbo siɛndi ba ndɔɔ mbo chii a ya.
10 Te I sina pɛ maa o cho keŋ tosa, I naŋ niŋ bɔɔ kɔl.I cho waŋnɔŋ a kɔl kɛndɛ, mi che bɛɛ nyɛ nɛiyaa nuu chuu le.Kanifuule, I sɛɛŋgiaa nyɛ Mɛlɛka Diandaa dimi wo le.
11 Baa I nɔ pa yoomuaŋ le mi hiou lachi a chumndo?
Baa I sina pa nyɛ cho ya lachi wo, le mi hiou lachi a waa yoomu?*
12 Baa yoomuma niaŋ ma kendu pa maa pouwo?
Ɔɔ dialuŋ nuŋ kendu pa maa chiliŋii siaŋɛi?*
13 Mɛɛ nɛila ya sɔla malaa laŋ kpou la hɛluŋ ya nuaa yɛ,Baa nɛi cho pa o ya nɔla mi mala yapila wo?
14 Wana o wana kɛɛ pɛ chaaŋ ndɔ wanachioo kaala lo lechoo wo chɔmndo,Mɛɛ o nɔ siooŋii Mɛlɛka Kpaaya Kpou Kpou Wo le.
15 Mɛɛ peela pɔmbɔlaŋ la vela nuaa a wɔɔleŋ yɛ,Lende koni chaaŋaa niaa simnuŋ naa ya chua ni.
16 Peelaŋ ndaŋ la cho yim yim a mɛŋma ikpuŋgbaŋ,Nduyɛ wana chi mɔm cho teŋgaa o laŋ niŋndo le.
17 Te wɔɔleŋ le fuuluu pɛ, mɛŋndaŋ ma kiolu leniŋ nduyɛ mi ma vela.Te fondaa tuulu vɛlɛ pɛ, mi la vesaŋ sɛɛŋ.
18 Mi ma chua nɛi cheleŋ,Mi ma kuɛŋnuŋ o pollo niŋ, okoŋ mi ma lo pɛ.
19 Mi wanaa leyulaa Tɛma, a balu a sofɛliaa wa nuuviaa peelaŋ ndaŋ.Mi wanaa fula Sabiaa wa* bɛɛ wa lehɔl le laŋ saalɔŋndo.
20 Mi siɔmbulaŋ la bii nda, kanifuule tiindaŋ ndaa simnuŋ nyɛ fondoo.Te a hiŋ loŋ pɛ, a sɔla nyɛ nda wa kɔl lo le.
21 Lende koni nya simnuŋ le ya ni.La che sɔɔŋ palaŋ komal la woŋ, nduyɛ mi siooŋnde bii nya.
22 Baa yaa dimul nya pa le mi la ke ya nyɛ?
Ɔɔ yaa nyuna nya pa le mi la ke waŋndo nyɛ o sulta nyalaŋ niŋ le ya?
23 Baa yaa nyuna pa le mi sɔla baŋaa yaamɔɔnɔ nuu o ba,Ɔɔ le mi sɔla pioŋɔɔ* wanaa cho ya nyɛpalaa tusioo choo wa o ba?
24 Chɔm ya nyɛ ya tosa wo,Nduyɛ ma mala ya mi sina biondɔŋ nuu.
25 Diomnda tonyalaŋ la pala wana le!
Kɛ tɔnɔ kuɛɛ ya cho yɛ sɔla o sila ŋ cho ya kioo wo niŋ?
26 Baa yiyaŋndo ŋ cho le ya miŋgioo o nɛi le nyɛ ya dimi wo ni?Kanifuule wana kɔl tambɛiyo, diomnda ndɔlaŋ la wa ko mɛɛ hueiye hɔŋ nuaa yɛ.
27 A tiu vɛlɛ ba ma wuu kooŋ le viiyo,Nduyɛ ma pisi vɛlɛ chaaŋ num kpeekpeiyo!
28 Lelaŋ, muliŋ ma tofa ya.I tiuba mi dimul num choolaŋ te.
29 Yandii yiyaŋndɔ vɛlɛ o ndi choo. Kilul la yamɛi lakafɛi le.I cho wɔ o sandii nii choo.
30 Baa choolaŋ sɔɔŋ ya cho dimioo woŋ cho ni?
Baa diɔɔmule nileŋ le sina suɛi wɔɔŋ te?
Tɛɛsiaalaŋ
^ Ɔɔ “ya dimi nuaa sɔɔŋ ŋdiɔmndoŋ ni.”
^ Ɔɔ “le mi chɔɔlu yoomu nuu bɛndi.”
^ Ɔɔ “kapaa.”
^ Ɔɔ “wanaa fula Sabiaa ma balu kunda wa.”
^ Hibuluiye, “baŋaa.”
