Choobu 7:1-21
7 “I cho wanachioo kuee maa teleŋ o cho yoomu wo, mɛɛ mbo tosa wali kala kalaa.Nduyɛ palɛi wanachioo cho ko mɛɛ nda chua nuaa wana wallo le ndu paawaa* yɛ.
2 O cho ko mɛɛ chiɔɔ yeema nuaa wunduleŋ yɛ.Nduyɛ, o cho ko vɛlɛ mɛɛ wana nda chua le wallo wo wa nuaa chumndo le paawa ndɔɔ yɛ.
3 Le paŋguŋ bɔɔbɔɔ, yoomu nuu simnuŋ niŋ nyɛ fondoo fuu.Nduyɛ le nyumma bɔɔbɔɔ, o nyɛpalaa niŋ koni ya choŋnuŋ ni.
4 Te I hini pɛ, mi nyunaŋ aa, ‘Teleŋ kuɛɛ ya cho yɛ chɔnɔŋ?’
Kɛ ichɔl piipii I lo lahɔl lende haaa mi paaleŋ le sɛ.
5 Chaa luɛi ya o dialloŋ niŋ, nduyɛ mi simnuŋ wana nɔɔlɛiyo.Pauve a kusuaŋ ma tiu ya o dialloŋ niŋ kpou.
6 Palɛi nii cho keleŋaa kɔŋndaŋ, o hiou bɛɛ mɛɛ wana luaa kolaa wo keleŋa nuaa yɛ.Nduyɛ i fuuluu o mɛɛlulaŋ, I nɔ lɛ tiindaŋ kposoŋ te.
7 Loonuŋ maa hueiye yoomu nuu cho ni,Nduyɛ maa fɛɛŋ a fɛɛŋ, I ve lɛ niŋ a kɔl kɛndɛ le.*
8 Hɔlte cho ya suŋ suŋ chɔɔ leŋ, le chi lɛ ya niŋ te.A cho ya nuuviaa, kɛ I ve lɛ niŋ te.
9 Mɛɛ yumbu yumboo puusiaŋ nuaa mbo lo pɛ yɛ,Lende wana kua o Sɛiyo* niŋndo miiŋgu lɛ le ni.
10 Fɛɛŋ bɛɛ o miiŋgu lɛ o chiɛi ndɔɔ le,Nduyɛ waŋnda o fondaŋ ndɔɔ cho puɛɛnɔŋ a ndu okɔɔ.
11 Lelaŋ, I mei sondo le.
I cho wa kɔl ni tambɛiyo chɔmndo,Nduyɛ mi ŋɔɔchiaŋ a nyɛkindilaa cho ya choo wo.
12 Baa mɛŋma ihɛllaŋ ɔɔ visi bɛndoo o mɛŋma ihɛllaŋ niŋ ya cho ni,Le ma handu waŋnda ma wa ya hɔlteŋ choo?
13 Te I dimi pɛ maa kpeŋgbei* ya hini choo wo cho ya kɔl dɛɛniaa ke,Ɔɔ mi kpele nuu dɔɔniaa nyɛ ni palaa o tiŋ,
14 A luei ya siooŋnde a lɔmasɔlaŋ,Vɛlɛ a yilaŋndoŋ.
15 Lelaŋ o bɛnda ma kɔɔfiaa ya mi vi,Mbo hiau waa yoomu a dialuŋ ya nɔ muŋ ndoŋ.*
16 I tul bɔɔ yoomu nuu leyɛ, nduyɛ I yeema lɛ mi hiou lachi a waa yoomu le.
Mal la o ba nuu choo, kanifuule palɛi ya nɔ le waa yoomu ve cho lɛ i bɔɔ le.*
17 Yɛɛnɛ wanachioo cho yɛ le ma buulaŋ a ndu,Nduyɛ ma handu ndu kɔllo choo?
18 Le yɛɛ ŋ mɛɛndaŋ yɛ ndu idii o idii,Nduyɛ ma luei ndu o tofaa bɛŋgu a boondii kɛ kɛ?
19 A feŋa ya hɔlteŋ choo,Nduyɛ ma mal la o ba nuu choo le teleŋ vilɛi mi mel lɔluleŋ te?
20 Num cha hoo nyɛ o nyɛ waŋnda chieeya tosa wo, te I tosa pɛ hakioo, baa mi hei paaliaŋ num?
Le yɛɛnɛ ŋ handu yɛ ya hɔlteŋ kɔɔli le ya nyɛpalaa tusioo choo?
Baa wolɔɔla lusulɛilaŋ ya simnuŋ le num ni?
21 Le yɛɛ a mel la haki,Nduyɛ ma faŋa kɔllo o biondɔŋnda nilaŋ choo le?
I cho suŋ wu ma yambu ya o puuloo niŋ.A cho ya nuuviaa, kɛ I ve lɛ niŋ te.”
Tɛɛsiaalaŋ
^ Ɔɔ “salaa.”
^ Hibuluiye, “chi lɛ niŋ nyɛ kɛndɛ le.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “kpɛŋɛ.”
^ Hibuluiye, “paala nilaŋ.”
^ Hibuluiye, “palɛi nii cho ko maa yoomoo le pilɛ.”