Choobu 8:1-22
8 Mi Bilidadi Suhaitiinɔɔ dimi aa:
2 “Le vɛɛ kpɛ ŋ cho yɛ hiouwɔɔ lachi a suɛi nuaa?
Diomnda ŋ cho soliŋndo o sondo laŋ la cho ko maa hueiyii kpaayɛi bɛnduei!
3 Mɛlɛka cho wana lakafa le,Nduyɛ wana sakpoo Mɛlɛka Kpaaya Kpou Kpou Wo cho ni.
4 Te chuauwaa numnda tosa pɛ hakioo a ndu,Mɛɛ paawa* ndaa nda sɔla koŋ ni.*
5 Kɛ te a muliŋ pɛ o Mɛlɛka Kpaaya Kpou Kpou Wo lo,Ma nyɔɔlu ndu le malaa,
6 Nduyɛ te kɔl numndo ndoo wa pɛ walaŋ ma wa sakpo,O wa num nilaŋ yaŋɔɔ,*Nduyɛ mi nyɛ o nyɛ miiŋgu num o ba.
7 Mi che bɛɛ num oo nɔ nyɛm bɔɔ o kandɔŋndo le,Kɛ a wa nyɔɔŋ sɔla tau o chilaŋ niŋ.
8 Yandii, nyuna wɔ finyaa naa mamaa,Ma yaŋ nda nilaŋ le ma dimul num a sɔɔŋ finyaa ndaa mamaa sina woŋ okɔɔ.
9 O dimi niŋ, chiɛi koni naŋ veluŋ ni, nduyɛ ŋ sina nyɛ o nyɛ le.Kanifuule, yoomu naa o lɛŋndeŋ choo cho ko maa lewundu.
10 Waŋnda haa cho num pɛɛku,Nduyɛ ma dimul num nyɛ nda sina wo.*
11 Baa mi tɔlɔɔ velaŋ a tɛiyo hindu pa te o ve o mɛŋndaŋ ikɛi le?
Baa mi bil mamɛŋndo hindu pa te o ve o fondaŋ mamɛŋndo le?
12 O yɔŋ bɛɛ mi peeŋgelaŋ la fula nduyɛ mi teleŋ nda kialu ndu wo fuuluu wɔ le,Kɛ te mɛŋndaŋ ma vesaŋ dɔɔ pɛ, ndu fɛŋ vesa a tɔlɔɔla cheleŋ.
13 Fulamakɔɔli* wanaa puɛɛnuŋ a Mɛlɛka okɔɔ wa cho hoo ni.Nyɛ wanaa sina Mɛlɛka le wa* tiindaŋ ndo yɔŋnuŋ te.
14 Nyɛ fondoo fuu tiindaŋ ndaa cho ni.Laalaŋ ndaa cho o leŋgelɛi maa kɔmii* sooŋ tɛndɛ.
15 Ma sɛɛŋuŋ o chiɛila ndalaŋ, kɛ chiɛila laŋ la lo isisi le.Ma kindiŋ le laŋ saa kpiŋ, kɛ a koŋ kpou mi la komba.
16 A cho ko mɛɛ tɔlɔɔ wa nuaa o paaleŋ mbo sɔla mɛŋndaŋ nyɛkɛndɛi yɛ.Nduyɛ mi puunduŋ ndɔŋ tiu silɔ o kpeloo niŋ.
17 Kɛ te teleŋ tiŋ hiou pɛ mi puunduŋ muŋ komal poutaŋ, ŋ yiu yiuŋ,Okoŋ ŋ kandu dɔɔ nɛilaŋ nuuviaa le luɛiyɔɔ o pouta laŋ niŋ.*
18 Kɛ te a suŋgu ndu o fondaŋ ndɔɔ pɛ,Fondaŋ koŋ sina lɛ ndu le, nduyɛ mbo dimi aa, ‘Kani bɛɛ I chi wɔ num te.’
19 A tonya, lende wana puɛɛnuŋ a Mɛlɛka okɔɔ wo lo o lepilɛ niŋ kpe ni,Mi acheleŋnda miiŋgu o foofo ndɔɔ.
20 Mi dimul num, Mɛlɛka kɛɛ wanaa chɔm lo lechoo wo o ndu lo wa le,Kɛlɛŋgaa niŋ te mbo toolu wanaa dɛnɛ wɔɔŋnda.*
21 O cho tosa ma mam,Nduyɛ ma deŋi vɛlɛ choo choo a kɔl kɛndɛ.
22 Wanaa tul num leyɛ wa, siɔmbulaŋ la cho nda biyɔɔ.Nduyɛ tɛndiila wanaa dɛnɛ wɔɔŋnda la cho lɛ wa le.”
Tɛɛsiaalaŋ
^ Ɔɔ “sala.”
^ Hibuluiye, “o yɛɛ nda o hakila ndalaŋ niŋ.”
^ Ɔɔ “o wa chɔnɔŋ le num.”
^ Hibuluiye, “a wa hunɔɔ a nyɛ cho o kɔlta ndalaŋ niŋndo.”
^ Hibuluiye, “Nɛila.”
^ Ɔɔ “wanaa kɛɛ Mɛlɛka wa.”
^ Hibuluiye, “chiɛi.”
^ Ɔɔ “chiɛi lapouwo nuuviaa.”
^ Hibuluiye, “saa wanaa dɛnɛ wɔɔŋnda balaŋ.”
