Choobu 9:1-35
9 Mi Choobu dimi aa:
2 “O kpeekpei niŋ, I sina maa lende i cho ni.
Kɛ vɛɛ wanachioo nua yɛ ndupila mbo dimi maa o cho sakpo Mɛlɛka o hɔl?
3 Te waŋndo yeema pɛ le mbo kɔɔsa a Mɛlɛka,*O nyuna wana koŋ nyunalaŋ waapilɛ, o pilɛ bɛɛ o nɔla ndu muli le.
4 Wana taasioo pila o cho ni,* nduyɛ o nɔ kpaayaa tau tau.
Nɛɛnɛ nɔla yɛ mbo simul ndu, wana koŋ yɔŋuluŋ te?
5 Mbo faŋa pemboŋ, wana o wana sina a ndi okɔɔ le.Nduyɛ te o tuulu kɔl pɛ, mbo kaaliaa muŋ.
6 Mbo tosa mi lɛŋndeŋ le hiiluŋ,Nduyɛ mi suŋgbuma nduaŋ ma nyiiya.
7 O nɔ kpaayaa le mbo kuuna paaleŋ fulaa,Nduyɛ mbo veŋ nyɛ teŋgaa looŋ wana chi ndu le.
8 Ndupila pɛŋgɛla choo choo ni maa kola,Nduyɛ mbo kuɛ o pee mɛŋma ihɛl cho hiilɔŋndo yokpaŋ yokpaŋ ndo choo.
9 Ndu toosiaa looŋ kuŋndaŋ nda veelu aa Asi, looŋ kuŋndaŋ nda veelu aa Kɛsili, a looŋ kuŋndaŋ nda veelu aa Kima woŋ ni.*Nduyɛ ndu toosiaa vɛlɛ looŋ kundaŋ cho o hala cho ba tou wo woŋ ni.
10 Sɔɔŋ bɛnduŋ o tosa woŋ, wana chii muŋ sina le.Nduyɛ sɔɔŋ kɔndɔfiliŋ o tosa woŋ, wana chii muŋ chɔm te.
11 Mbo kei ya ikɛi, I nɔla mi che ndu kposoŋ te.Nduyɛ mbo huŋ hiounuŋ ya, I bii ndu bila le.
12 Te o poonda pɛ nyɔɔ, nɛɛ nɔla yɛ mbo kɔ simul ndu?
Nɛɛ nɔla yɛ mbo nyuna ndu aa, ‘Le yɛɛ ŋ cho yɛ hei tosaa?’
13 Te Mɛlɛka tuulu pɛ kɔl, wana o wana nɔla ndu kpaa le.Hali wanaa malaa Luehaabi* wa bɛɛ cho Mɛlɛka wulaŋ beŋ.
14 Te I wa pɛ ndu mulullo,O bɛnda mi yiyaŋ nyɛkɛndɛi a diomnda ya cho isɔɔ o ndu lo laŋ!
15 O yɔŋ bɛɛ aa I nɔ dioo, I nɔla mi muli ndu diom te.
Nyɔɔloo koni ya nyɔɔlu wana ni kialaa ŋyamaa* ni le mbo tuiinuŋ ya inyiɛɛ.
16 Te o yɔŋ pɛ mi veelu ndu, baa o muli ya niŋ pa diom?
I laalaŋ maa o tuɛi ya niŋ diom te.
17 O chuii ya mululu a hueiyii bɛnduei,Nduyɛ mbo mɛli ya pauve i hɔbɛi o fondo fuu wo choo.
18 O mel la bɛɛ pɛŋ mi yoomu le,O cho tuŋ hiouwɔɔ lachi a ya nyɛpalaa tusioo choo.
19 Te o hiŋ pɛ a kpaayaa okɔɔ, o hiou ya mayoomu poloŋ.
Te o hiŋ pɛ a sandei okɔɔ, nɛɛ nɔla yɛ mbo sɛɛŋgiaa ndu?
20 O yɔŋ bɛɛ aa mi nɔ dioo, mi sondo nuu pɛɛsa ya.O yɔŋ bɛɛ aa mi hiou lachi a lo lechoo nuu chɔmndo, o cho ya yaala.
21 O yɔŋ bɛɛ mi hiou lachi a lo lechoo nuu chɔmndo, I nɔ tiindaŋ o yapila niŋ te.I saŋga niŋ a yoomu ya cho hoo niŋndo.
22 Biyɔɔ pilɔɔ kpe Mɛlɛka bii wanachioo ni. Le sabu koŋ ya dimi ni aa,‘Wana kɛndɛ* ni, wana wɔɔŋ ni, mbo tɛɛmbuu nda kpou.’
23 Te mɛŋma koŋgi bɛnduaŋ ma huŋ a kpaayaa waŋ ma dii pɛ waŋndo o lepilɛ niŋ kpe,Mamɔɔ ko Mɛlɛka mam piɔm wanaa tɛɛmbuu isɔɔ le wa ni.
24 O chua lɛŋndeŋ mbo mal wanaa dɛnɛ wɔɔŋnda o ba.Mbo kumbu wanaa kialaa ŋyamaa hɔlla.
Te o ve ndu le tosa sɔɔŋ muŋ te, mi nɛɛnɛ niŋ?
25 Palɛi nii cho niŋ kɔŋndaŋ chɔ chɔ mbo hiau bɛɛ wana nyaanaŋndo,Nduyɛ kɔl kɛndɛ bɛɛ I sɔla wɔ o yoomu nuu niŋ te.
26 Palɛi nii cho nyaanɔŋndo kpeekpei mɛɛ dɛndɛ nda toosiaa a kpɛndiaŋ ndo nyaanuŋ yɛ,Mɛɛ kowɔɔ tual nuaa sululu le nyɔɔ biyɔɔ yɛ.
27 Te I dimi pɛ aa, ‘I cho puɛɛnɔŋ a ŋɔɔchiaŋnda nilaŋ,Nduyɛ mi siŋga hɔlaa niaa kɔl tambɛiya mi yɔŋnuŋ wuye wuye,’
28 I cho wa a siooŋnde kɛ le nyɛ nɛiyaa cho ya choo wo kpou.I sina maa a cho ya saalɔŋ sɔŋndaŋ o ŋdial.
29 I sina maa a cho ya saalɔŋ sɔŋndaŋ o ŋdial.*
Lelaŋ, le yɛɛ ya hiau yɛ niko lachi a saŋga fondoo hoo?
30 Te o yɔŋ pɛ mi puluŋ a mɛŋma mɔm ikpuŋgbaa,Nduyɛ mi pulu bala nilaŋ a sɛŋndaŋ,
31 A cho ya wou o sooŋndo niŋ,Okoŋ nyɛla nila chuɛɛnaŋndaŋ bɛɛ la cho ya yɛleŋ tul.
32 Kanifuule, o cho wanachiee maa ya le mi muli ndu diom,Miŋ kuɛ o lemasa naa ndu le.
33 Wana o wana nɔla mbo sim naa tɛɛŋ,Nduyɛ mbo kelu naa yamɛi tɛɛŋ te.*
34 Te ndoo mal la pɛ lɔɔ,Nduyɛ mbo pɛŋgi ya siooŋnde lueiyo,
35 I nɔla mi soo o ndu lo siooŋii ve ya le.Kanifuule, o cho wana soo a isiooŋ te ya cho le.
Tɛɛsiaalaŋ
^ Ɔɔ “mbo kuɛ a Mɛlɛka o chiɛi kialaa ŋyamaa niŋ.”
^ Hibuluiye, “Taasioo ndu o piaa o kɔl cha.”
^ Looŋ kundaŋ muŋ, te wana wa pɛ o chieeŋndo choo ma tofa o halaa niŋ, ma che muŋ ŋ kilaŋ naŋ chaa visiaa ɔɔ nyɛm cheleŋndoŋ ni.
^ Naapum visi bɛndoo o pee mɛŋma ihɛllo niŋ.
^ Ɔɔ naapum, “wana naŋ cho kɔɔsoo wo.”
^ Ɔɔ “wanaa cho lo lechoo wo chɔmndo wa.”
^ Hibuluiye, “a cho ya chɔ maa wana dɛnɛ wɔɔŋ.”
^ Hibuluiye, “luei naa balaŋ tɛɛŋ te.”
