Hakai 1:1-15
1 Wɔsi Masaa Daaliɔɔ chiŋa wɔsilaŋ la tiɔɔŋ o masaleŋ choo wo, paale taseleŋ o paŋgii ŋɔmpum nde niŋ, mi Chɛhowa ke Hakai* wana suaa le ndu wo yooŋgoo. Yooŋgoo hoo wa le Sɛlubabɛl, masa ibuŋgaa le Chuda, po Siaatiɛɛ wo, a Chɔɔsuaa masa wanaa soliaa lasalaa, po Chɛhosadaki wo. Mbo dimi aa:
2 “Nyɛ Chɛhowa, Mɛlɛka puaa chɔuwa* dimi wo cho hoo ni, ‘Waŋnda haa cho dimioo aa, “Teleŋ fuuluu wɔ le chiɛi Chɛhowa wo taŋgullo* le.”’”
3 Okoŋ kɔɔli, mi Chɛhowa ke vɛlɛ Hakai wana suaa le ndu wo yooŋgoo aa:
4 “A teleŋndo hoo, baa o bɛnda pa mi la waŋnuŋ o chiɛila nyala kɛndɛ kɛndɛlaŋ niŋ, kɛ mi chiɛi nuu ndu wa o piɔlɛi?
5 Nyɛ Chɛhowa, Mɛlɛka puaa chɔuwa dimi wo cho hoo ni, ‘La yiyaŋndɔ nyɛkɛndɛi a sɔɔŋ nya cho tosaa woŋ okɔɔ.
6 La cho waltaŋ tosaa tau tau, kɛ la kuu nyɛ sɔvɛ le. La cho nyɛdiaa dioo, kɛ la pim te. La cho muɛiyaŋ kolɔɔ, kɛ ma cho nya tiu le. Mi la wounuŋ nyɛlaŋ, kɛ hueiye kiolu nya lekɔɔ le. Nduyɛ, waŋndo tosa pɛ wallo ma paawa* ndu, o bɔlɔ buliɛiyo niŋ koni o wou nyɛsɔlaa koŋ ni.’”
7 “Nyɛ Chɛhowa, Mɛlɛka puaa chɔuwa dimi wo cho hoo ni, ‘La yiyaŋndɔ nyɛkɛndɛi a sɔɔŋ nya cho tosaa woŋ okɔɔ.’
8 “Chɛhowa dimi aa, ‘La kɔ o pembii bɛnduei choo mi la kɔ huŋ a yɔmii taŋgulɛi. Okoŋ, mi la teŋgul la chiɛiyo le mi hini kɔl, nduyɛ mi sɔla saŋgalaa.’”
9 “‘Mi nyaa wa kɔl le sɔlaa tau, kɛ nyɛɛmbɔ koni nyaa sɔla ni. Nduyɛ nyɛ pɔmbɔ nyaa sɔla wo bɛɛ, te nyaa hiŋ pɛ a ndu chiɛiniŋ, I hul ndu o saŋnuŋ o hueiye niŋ. Le sabu yɛɛ? Kanifuule, chiɛi nuu cho o piɔlɛiyo, mi nya wa fafalaa le chiɛila nyalaŋ bɛɛndiaa nyɛkɛndɛi.’ Chɛhowa, Mɛlɛka puaa chɔuwa dimi lende ni.
10 ‘Le saboo hoo halaa kɛɛ le nya mɔmndo kioo ni, nduyɛ mi lɛŋndeŋ bɛɛ le kɛɛ le kɔmnde ndɔleŋ yɔŋgoo.
11 Mi tosa mi walo bɛndoo sim o lɛŋndeŋ choo, pembuŋ bɛndoŋ, tɔlɔɔlaŋ, muɛima sɛnɛiyaŋ, chuɛiyaŋ, nyɛ o nyɛ wul lɛŋ, waŋnda chieeya, chɔluaa, a nyɛ o nyɛ nya saŋga le ndu.’”
12 Mi Sɛlubabɛl po Siaatiɛɛ wo, a Chɔɔsuaa masa wanaa soliaa lasalaa, po Chɛhosadaki wo, a wanaa tuaa kpou yaŋ nilaŋ o nyɛ Chɛhowa Mɛlɛka ndaa dimi wo. Nduyɛ, ma yaŋ vɛlɛ Hakai wana suaa le ndu wo nilaŋ, kanifuule Chɛhowa Mɛlɛka ndaa vem ndu ni. Okoŋ, mi waŋnda kandu siooŋnde nɔɔ le Chɛhowa.
13 Mi Hakai wana suaa le Chɛhowa wo dimul waŋnda yooŋgoo hoo mɛɛ Chɛhowa dimul ndu yɛ. Mbo dimi maa Chɛhowa dimi aa: “I cho a nya latulu.”
14 Mi Chɛhowa tosa mi kɔllo yusa Sɛlubabɛl, masa ibuŋgaa le Chuda, po Siaatiɛɛ wo, a Chɔɔsuaa masa wanaa soliaa lasalaa, po Chɛhosadaki wo, a waŋnda a tuaa kpou, okoŋ ma chaŋ le wallo. Ma kandu chiɛi Chɛhowa Mɛlɛka ndaa taŋgullo, Mɛlɛka puaa chɔuwa.
15 Hei yɔŋnuŋ o paŋgii ŋɔmpum nde niŋ malɔ 24, wɔsi Masaa Daaliɔɔ chiŋa wɔsilaŋ la tiɔɔŋ o masaleŋ choo wo.
Tɛɛsiaalaŋ
^ Diolaŋ ndaŋ la sim “Violɔŋndo o Paale Bɔŋaŋ Ndeŋ Choo.”
^ Koŋ cho ni, puaa chɔuwa o choo choo niŋ.
^ Ɔɔ “miŋgioo taŋgullo.”
^ Ɔɔ “sala.”
