Hibuluiya 1:1-14
1 O sindɔɔ niŋ, mi Mɛlɛka soliŋ wanaa ndaa suaa le ndu wa kpeku le suɛi o finyaa naa mamaa lo. Mbo tosa hei teleŋnda bɔɔbɔɔ, a o nɛila yɛ yɛlaŋ niŋ.
2 Kɛ o palɛi hei mɛɛlulaŋ, mbo suaa o naa lo sanaa a Po ndɔɔ. Ndu o yulu isu ni le mi nyɛ o nyɛ fee wa le ndu. Ndu o soliŋ vɛlɛ kpeku ni le chieeŋndo toosiaa.*
3 Ndu cho naŋɔɔ Mɛlɛkaa ni. Nduyɛ ndu kpeekpei cho velaŋ ndɔɔ ni. A kpaaya diom ndɔɔ o cho nyɔɔŋ kpou mandaa ni. Mɛɛ o chii hakila naalaŋ dindi, mbo hel choo choo, okoŋ mbo chal o ba kɛndɛ Mɛlɛka bɛndoo choo.
4 Le hei, mbo simnuŋ o bɛndu mbo hiau maalikɛiya a tuaa kpou. Nduyɛ diola o sɔla laŋ, la hiou diola ndalaŋ poloŋ.
5 Le tamaseliiyo, lepilɛ bɛɛ Mɛlɛka dimullɔ maalikɛinɔ kɛ kɛ aa: “Num cho po nuu ni. I simnuŋ hau finya num” te le. O dimi wɔ vɛlɛ a maalikɛinɔ kɛ kɛ okɔɔ aa: “I cho simnɔŋ finya ndɔ, mi ndu bɛɛ wa po ni” le.
6 Okoŋ kɔɔli, boondii Mɛlɛka cho vɛlɛ Po ndɔ tasoo yɔŋ o chieeŋndo choo ve, o cho dimi aa: “Nya maalikɛiya kpou, la beŋ ndu wulaŋ.”
7 Mi Mɛlɛka dimi a maalikɛiya okɔɔ aa: “Mbo viam maalikɛiyaa nduaa maa nyaa yoomaa o inyinaya, a wanaa nduaa walla maa yiŋnde wule wule.”
8 Kɛ mbo dimi a Po ndɔɔ okɔɔ aa: “Mɛlɛka cho kpeŋgbei num lemasaa le fɛɛŋ a fɛɛŋ ni. Nduyɛ o sandei choo ŋ tosa niŋ Masale numndeŋ ni.
9 A kaala sandei, ma tul yɔŋ wɔɔŋndo leyɛ. Le sabu koŋ bɛɛ Mɛlɛka, o cho Mɛlɛka numndo wo pɔya num a chuɛiyaŋ ni, mbo ke num nyaaloo ma hiau chaaŋaa numnda kpou.”
10 Mbo dimi vɛlɛ aa: “Num Masanɔɔ, num toosiaa sindɛ chieeŋndo o kandɔŋndo ni. Num toosiaa choo choo a bala numndaŋ ni.
11 Nyɔɔŋ muŋ cho tambu, kɛ num a cho wa. Ŋ cho siɔŋ mɛɛ kolaa siɔŋ nuaa yɛ.
12 A cho muŋ hunɔɔ tuii tuii mɛɛ wana tuii tuii domaa nuaa yɛ. Nduyɛ a cho muŋ hunɔɔ siŋga. Kɛ num fɛɛŋ bɛɛ a siŋgaŋ niŋ te. Nduyɛ yoomu numndo nɔ lamɛɛlu le.”
13 Lepilɛ bɛɛ Mɛlɛka dimullɔ maalikɛinɔ kɛ kɛ aa: “Chal o ba ni kɛndɔɔ choo haaa mi siiŋguu yaamɔɔwaa numnda nyɛ num handaa ŋpeloo” le.
14 Maalikɛiya kpou o inyinaya nda cho ni, nduyɛ nda tosa wali Mɛlɛkaa ni. Nda o viam ni le wanaa nɔ le pioŋɔɔ sɔlaa wa malaa.
Tɛɛsiaalaŋ
^ Tofa Tɛɛsiaa.
