Hibuluiya 10:1-39
-
Salala visiaa nɔla hakilaŋ faŋa le (1-4)
-
Sawaa sim lewundu le sɔɔŋ cho hunɔɔ woŋ (1)
-
-
Kiliti soliŋ sala lepilɛ kpe (5-18)
-
Nɛi sɛnɛiyo a nɛi yoomoo le miŋ hiou o kola bɛndoo kɔɔli (19-25)
-
La mal kɔlaŋ o bɔŋaŋndaŋ te (24, 25)
-
-
Silaa a hakioo tosaa a siɛlɛi fuu okɔɔ (26-31)
-
Tiindaŋndo a laalaŋndo mala naa miŋ biunuŋ (32-39)
10 Sawaa* sim lewundu le sɔɔŋ kɛndɛŋ cho hunɔɔ woŋ, kɛ o cho ndu le cho sɔɔŋ muŋ kpeekpei le. Iwɔsi o iwɔsi, waŋnda cho hiouwɔɔ lachi a salala pilɛlaŋ kpe solioo. Kɛ a koŋ kpou, la nɔla mi la siiŋguu wanaa cho Mɛlɛka sɔɔŋguuwo ikɛiya mɛɛ o yeema yɛ le.
2 Te ndoo wa lende pɛ, mɛɛ salala ve lɛ wa soliŋ te. Kanifuule, wanaa huŋ a salalaŋ nda wa diondɔɔ sɔla, nduyɛ ndaa buulaŋ lɛ maa haki cho nda choo le.
3 Kɛ o cho lende le. Salalaŋ ndaŋ la wa nda yiyalaŋndo a hakila ndalaŋ iwɔsi o iwɔsi ni.
4 Kanifuule, kooma nauwa a kooma chuiŋnda ma nɔla hakilaŋ faŋa le.
5 Lelaŋ, mɛɛ o hiŋ o chieeŋndo niŋ mbo dimi aa: “‘Salalaŋ a nyɛm waŋnda ke num ndoŋ, a heu ba a muŋ te. Kɛ ma bɛɛndiaa dialloŋ le ya.
6 Salala luamaa laŋ a salala waŋnda soli le hakila ndalaŋ ndaŋ, num a yeema laŋ te.’
7 Okoŋ mi dimi aa: ‘Mɛlɛka, I hiŋ le mi tosa hɛnaŋ numndo, a mɛɛ i cho i poonyiaa a ya okɔɔ o Yau* numndo niŋ yɛ.’”
8 O dimi fɛlɛŋ o tasela ndɔɔ aa: “Salalaŋ a nyɛm waŋnda yɔŋgu woŋ, num heu ba a muŋ te. Salala luamaa laŋ, a salala waŋnda soli le hakila ndalaŋ ndaŋ, num a yeema laŋ te.” Salalaŋ ndaŋ nda soli a mɛɛ Sawaa dimi yɛ ni.
9 Okoŋ kɔɔli mbo dimi aa: “I hiŋ le mi tosa hɛnaŋ numndo.” Mbo faŋa kɛɛsiaa tasoo, okoŋ mbo miŋgi kɛɛsiaa sɛnɛiyo.
10 Le “hɛnaŋ” Mɛlɛka koŋ tosaa, mi Chiisu Kiliti soliŋ sala lepilɛ kpe. Le hei, miŋ sɔla diondɔɔ.
11 Wana soliaa lasala kɛ kɛ nɔ vɛlɛ mbo sim o fondaŋ ndɔɔ lepaa o lepaa le salalaŋ solioo. Nduyɛ mbo soli salala pilɛlaŋ le teleŋnda bɔɔbɔɔ, kɛ salalaŋ ndaŋ la nɔla mi la faŋa hakioo le.
12 Kɛ poo hoo ndu, salaa opilɛ kpe o soli ni le hakilaŋ faŋaa. Nduyɛ salaa hoo cho le fɛɛŋ a fɛɛŋ. Okoŋ mbo chal o ba kɛndɛ Mɛlɛkaa choo.
13 Chɔŋ a teleŋ koŋ, o cho chumndo le mi Mɛlɛka kɛsi yaamɔɔwaa nduaa o peluŋ ndɔŋ bɛŋgu.
14 O sala o soli hoo wo niŋ, mbo siiŋguu wanaa o dindi wa mɛɛ Mɛlɛka hɛnaŋ yɛ le fɛɛŋ a fɛɛŋ.
15 Mi nyina diandaa bɛɛ chɔm naa maa tonya suɛi hei cho ni. Mbo dimi aa:
16 “Chɛhowa* dimi aa, ‘Te boondii keŋ fuuluu pɛ, kpemaa hoo ya cho yii a nda ni: I cho tosa ma sina sawala nilaŋ, nduyɛ mi poonyiaa nda laŋ o lakɔl.’”
17 Mbo dimi vɛlɛ aa: “I cho nda malɔɔ haki le yɔŋnda ndala wɔɔŋndaŋ, nduyɛ I loonuŋ lɛ niŋ laŋ kposoŋ te.”
18 Te Mɛlɛka mal pɛ wana haki, mɛɛ wana soli lɛ sala le hakioo le.
19 Puaapiliaa, kooma Chiisu waŋ ma tosa mi nɛiyo kumbiŋ le miŋ luɛi o fondaŋ diandaa a kɔllo kpou.
20 O kumbul naa nɛi sɛnɛiyo a nɛi yoomoo le miŋ hiou o kola bɛndoo kɔɔli. Kola koŋ cho yɛ dialuŋ ndɔŋ ni.
21 Ŋ nɔ wana soliaa lasala bɛndu bɛndoo o chiɛi Mɛlɛkaa niŋ.
22 Lelaŋ, la ŋ kɔŋnuŋ naa Mɛlɛka chua a kɔllo kpou, nduyɛ a tiindaŋndo. Kɔlta naalaŋ la sɔla dindioo, nduyɛ kɔlta naala iyamalaŋ la kɔɔsa lɛ naa le. Dialuŋ naŋ bɛɛ sɔla pulɔɔ a mɛŋma diandaŋ.
23 Ŋ hiounuŋ lachi a waŋnda dimullo a tiindaŋ naa okɔɔ, kiisaŋ wa naa le. Kanifuule, wana chuel naa buŋgɛiyo feŋaŋ o diom ndɔɔ choo le.
24 Ŋ waŋnuŋ yiyaŋndo* a chaaŋaa naa vellaa velle, okoŋ miŋ kpeeŋiaŋ* le kaalaa a walta kɛndɛlaŋ tosaa.
25 La ŋ malnuŋ kɔlaŋ o bɔŋaŋndaŋ, mɛɛ waŋnda apum a nɔ kaa yɛ le. Kɛ la ŋ dɛɛniaŋ vellaa velle, kanifuule nya pila cho chɔɔ maa paale Masanɔɔ le cho niŋ kpɛɛluŋ.
26 Te waŋndo sina pɛ tonyaa, okoŋ kɔɔli mbo tosa hakioo a siɛlɛi fuu, mɛɛ sala cheleŋ cho lɛ le hakila laŋ faŋaa le.
27 Wana koŋ nɔ niko mbo chum le kɔɔsɔ Mɛlɛkaa, a kɔl ndɔ tuu bɛndu cho hunɔɔ le wanaa simul ndu wa.
28 Wana o wana tɛɛmbuu pɛ Sawala Mɛlɛka ke Muuse laŋ, mi seiya wa a ŋiɔɔŋ ɔɔ a yaa, wana koŋ nɔ mbo sɔla piɔmndo. A nɔ ma tuiinuŋ ndu inyiɛɛ le.
29 Vɛɛ i wa yɛ niŋ a wana chi hoo Po Mɛlɛkaa nyɛ o nyɛ le wo? Ndu hiau niŋ bɛɛ nyɛpalaa sɔla, kanifuule kooma Mɛlɛka yii kpemaa a ŋwaŋnda chiee mi ma dindi ndu waŋ o che maŋ nyɛ fondoo fuu ni. Mɛɛ wana koŋ che nyina diandaa Mɛlɛkaa, o tosal naa kɛndɛi bɛndueiyo nyɛ fondoo fuu.
30 Ŋ sina maa Mɛlɛka dimi ni aa: “Ya cho wana miŋgiaa maa ni. I cho nda paawa.”* I cho vɛlɛ i poonyiaa aa: “Chɛhowa* cho wanaa nduaa kɔɔsa.”
31 I cho suɛi isiooŋ le mi wana del Mɛlɛka cho yoomu wo o ba.
32 La loonuŋ ndɔ a teleŋ nya sɔla nyɛ teŋgaa Mɛlɛkaa wo, mi la sɔla nyɛpalaa tau. Kɛ mi la biunuŋ.
33 Teleŋndaŋ lapum mi waŋnda ndaa yiou nya waŋnda o hɔl, nduyɛ mi ndaa tusi nya nyɛpalaa choo. Teleŋndaŋ lapum yɛ, mi nyaa sɔɔŋguu wanaa wa o nyɛpalaa waa nuaa niŋnda ikɛi le nda malaa.
34 Mi la bii mɔnɛi nya wanaa wa o chiɛila manyumndaŋ niŋnda latulu. Nduyɛ mi la hiau lachi a nyaaloo, mi che bɛɛ ma poondiaa nya nyɛm nyaŋ o laba. Kanifuule, la sina maa la nɔ nyɛm hiou naŋɔɔ miŋ wa le fɛɛŋ a fɛɛŋ ndoŋ.
35 La mal suɛi a kɔl simulaa le, kanifuule la cho fandaa sɔla tau le keŋ.
36 La nɔ mi la biunuŋ. Nduyɛ te la tosa pɛ hɛnaŋ Mɛlɛkaa, la cho nyɛ o chua buŋgɛiyo sɔla.
37 Kanifuule, “o teleŋ biŋgi bɛŋgu, wana nɔ le hunɔɔ wo cho fuuluu, o dounuŋ niŋ tamala le.”
38 “Wana cho sakpo wo cho wa yoomu le laalaŋ ndɔɔ.” Kɛ nduyɛ “te o miiŋguŋ pɛ amakɔɔ, I niŋ kɔl a ndu le.”
39 Lelaŋ naa naa, ŋ cho wanaa miiŋguŋ kɔɔli le tambei sɔlaa wa le. Kɛ wanaa laalaŋ o Mɛlɛka niŋ le pioŋɔɔ sɔlaa wa naŋ cho ni.
Tɛɛsiaalaŋ
^ Koŋ cho ni, Sawala Mɛlɛka ke Muuse laŋ.
^ Kilikiiye, “yau simbulaa.”
^ Tofa Tɛɛsiaa.
^ Ɔɔ “buulaŋndo.”
^ Ɔɔ “lueinaŋ yoomuaŋ.”
^ Ɔɔ “sala.”
^ Tofa Tɛɛsiaa.
