Hibuluiya 13:1-25
13 La hiou lachi a kaaliaŋndo vellaa velle maa pɔmbɔ a bɛndu.
2 La mal mialla yiyaa* le. Kanifuule, o hei tosaa niŋ, mi apum yiya maalikɛiya a ve o sina choo le.
3 La puɛɛnuŋ a wanaa cho o biyɔɔ niŋnda le. La chua nyapila maa nya ndaa cho o biyɔɔ niŋ ni. La puɛɛnuŋ vɛlɛ a wanaa cho o nyɛpalaa niŋnda le. La chua nyapila maa nya ndaa cho o nyɛpalaa koŋ niŋ ni.
4 Wana o wana ke nɔɔ bɛɛleŋ. Nduyɛ, wana o wana nɔ mbo nɔɔliaa kpele nɔɔ le, kanifuule Mɛlɛka cho hunɔɔ wanaa suundɛiya, a wanaa tosa kaa ihini nɔɔlɛiyo* wa kɔɔsa.
5 La kaala kaniei* o yoomu nyaa niŋ te. La hini kɔl a nyɛm nya nɔ woŋ. Kanifuule, Mɛlɛka pila dimi aa: “Fɛɛŋ bɛɛ I mel num te, nduyɛ fɛɛŋ bɛɛ I feŋaŋ num kɔɔli le.”
6 Le hei, ŋ cho simul kɔl miŋ dimi aa: “Chɛhowa* mala ya ni. Lelaŋ siooŋii bii ya le. Yɛɛ wanachioo nɔla yɛ mbo tosal la?”
7 La loonuŋ a wanaa cho nya chilaŋ chuaa tɛɛŋ nda. Waŋnda haa dimul nya suɛi Mɛlɛkɛi ni. Nduyɛ, la yiyaŋ pɛ a fulamakɔɔli kaala ndala kɛndɛlaŋ, la tol laalaŋ ndaa kɔɔli.
8 Mɛɛ Chiisu Kiliti wa chiɛi yɛ, lende koni o cho hau ni, nduyɛ lende o cho wa le fɛɛŋ a fɛɛŋ ni.
9 La chɛl mi pɛɛkula yɛ yɛlaŋ la hiŋ nya hɔlla le. O bɛnda mi la sɔla yoomuaŋ o kɛndɛi bɛnduii Mɛlɛkɛi niŋ, mbo hiau nyɛdiaa. Wanaa dɔu kɔltaŋ o nyɛdiaa wa, a sɔla tɔnɔ o tɔnɔ leniŋ te.
10 Bandu luamaa lasala naŋ nɔ wo, wanaa soli salaa o tɛndiiyo niŋnda nɔ di ma de nyɛ cho lechoo wo le.
11 Te wana bɛndu wanaa soliaa lasalaa luɛi pɛ a kooma chɔluaa nda diiya o fondaŋ diandaa le salaa solioo le hakila waŋnda, a faŋa chɔluaa vilɛiyaa kaŋ o dɔɔŋgɔɔ niŋ, a kɔ lom nda.
12 Chiisu bɛɛ, o dio kpaki chioo kɔɔli o sɔla saŋgaa ni, le halikpeŋ mbo dindi waŋnda a kooma nduaŋ.
13 Naa bɛɛ, ŋ fulaŋ o dɔɔŋgɔɔ niŋ miŋ kuɛŋnuŋ naa o cho wa, okoŋ miŋ biunuŋ siɔmbulaŋ maa ndu.
14 Ŋ nɔ chiee nanuŋ mbo wa le fɛɛŋ a fɛɛŋ te. Kɛ ŋ cho chumndo le chiee cho hunɔɔ wo.
15 Teleŋ o teleŋ, ŋ saŋgalaŋ Mɛlɛka sanaa o Chiisu niŋ. Salaa hoo naŋ solul ndu ni. Koŋ cho ni, waŋnda dimullo kpendekele a diola ndɔlaŋ okɔɔ.
16 Okoŋ kɔɔli, la puɛɛnuŋ a waŋnda sɔɔŋ kɛndɔŋ tosallo le. Nduyɛ la piɔuviaŋ nyɛm nya nɔ woŋ vellaa velle. Salala waa ndoo la nɛŋi Mɛlɛka kɔl ni.
17 La diikuŋ wanaa cho chilaŋ chuaa nya tɛɛŋnda, mi la tusiŋ nda o ba bɛŋgu, kanifuule nda cho nya hɔlteŋ choo ni. Nduyɛ a cho hunɔɔ kona dɔɔnɔŋ le hei. Te la diikuŋ nda pɛ, a cho wali ndaa tosa a nyaale. Kɛ te a tosa ndu pɛ a kɔl tambɛiyo, hei cho nya pala tau.
18 La wa piɛileŋ le naa, kanifuule ŋ sina maa ŋ nɔ kɔl iyama walaŋndo. Nduyɛ ŋ yeema miŋ chɔm sandei o nyɛ o nyɛ niŋ.
19 Kɛ taama taama nyɛ ya cho nya nyɔɔloo wo cho ni maa, la piɛi le mi keleŋa miiŋgu naa nya chua.
20 Mɛlɛka kɔl nyuloo miŋgi Masanɔ naa Chiisu yoomu ni. O miiŋgu yoomu a kooma yii kpema cho le fafɛɛŋndo waŋ o ba. Ndu cho wana mandaa lasaa bɛndoo ni. Maa Mɛlɛka kɔl nyuloo
21 ke nya nyɛ o nyɛ kɛndɛ le hɛnaŋ ndɔɔ tosaa. O Chiisu Kiliti niŋ sanaa o cho naa malaa ni le hɛnaŋ ndɔɔ tosaa. Maa Mɛlɛka sɔla biiloo le fɛɛŋ a fɛɛŋ fɔ! Amiina.*
22 Puaapiliaa, I cho nya nyɔɔloo maa, la yaŋ nilaŋ nyɛkɛndɛi o diomnda kɔl dɛɛniaala ya poonyial nya o yauwo hoo niŋndaŋ. O cho bɛɛ yau bandu le.
23 I yeema nya mi la sina maa a mal Timoti puaapilɛnɔ naa. Te o keleŋa pɛ ya komal, naa ndu cho hunɔɔ naa nya chua ni.
24 La yil la wana o wana cho chilaŋ chuaa nya tɛɛŋ, a wanaa laalaŋnda* kpou. A cho Itali wa kpou yil nya lapi.
25 Nya kpou, maa kɛndɛi bɛnduii Mɛlɛkɛi wa nya choo fɔ!
Tɛɛsiaalaŋ
^ Ɔɔ “kɛndɛi tosallo.”
^ Tofa Tɛɛsiaa.
^ Ɔɔ “woliei.”
^ Tofa Tɛɛsiaa.
^ Koŋ cho ni, i yɔŋnuŋ lende fɔ.
^ Kilikiiye, “wanaa diandaa.”
