Hibuluiya 2:1-18
2 Lelaŋ, o bɛnda miŋ yaŋ nilaŋ nyɛkɛndɛi o sɔɔŋ naŋ tuei muŋ ndoŋ mbo hiou bɛɛ maa paandu, yɔŋii naŋ mal laalaŋ naa.
2 Yooŋgu maalikɛiya dimi wo cho tonya. Wanaa ndaa tɛɛmbuu, nduyɛ ma kɛɛ nyɛ yooŋgu koŋ dimi wo tosaa wa, ma sɔla saŋga ndaa nɔ le sɔlaa wo.
3 Vɛɛ naa bɛɛ nɔla yɛ miŋ hɛluŋ te ŋ kɛɛ pɛ chinda bɛndoo hoo? Masanɔ naa fɛlɛŋ kandu sɔɔŋ muŋ dimioo, okoŋ mi wanaa yaŋ ndu nilaŋ nda dimul naa a muŋ okɔɔ.
4 Mi Mɛlɛka chɔm maa nyɛ nda dimi wo cho tonya, a mɛɛ o tosa kaamaalaŋ a walta kɔndɔfilta yɛ yɛlaŋ yɛ. Nduyɛ mbo ke nda nyina diandaa mɛɛ o hɛnaŋ yɛ.
5 Chieeŋ cho hunɔɔ, nduyɛ miŋ wa suɛi a ndu okɔɔ wo ndu, o cho maalikɛiya le Mɛlɛka hɛli le ma huŋ wa masaa ndu choo le.
6 Kɛ mi wana pilɛ dimi o fondaŋ pum o Yau Mɛlɛkaa niŋ aa: “Vɛɛ kpɛ wanachioo cho yɛ le ma handu ndu kɔllo choo? Vɛɛ kpɛ wanachioo cho yɛ le ma buulaŋ a ndu?
7 A tosa mi maalikɛiya hiau ndu ko chobe. Ma ke ndu biiloo a bɛɛleŋ, nduyɛ ma handu ndu nyɛm ŋ toosiaa woŋ kpou bolleŋ.
8 Num kɛsi nyɛ o nyɛ o peluŋ ndɔŋ bɛŋgu ni.” Mɛɛ Mɛlɛka kɛsi nyɛ o nyɛ o peluŋ ndɔŋ bɛŋgu yɛ, nyɛ o nyɛ cho mbo kɛɛ ndu wa o ba bɛŋgu le. Kɛ suŋ suŋ ndɔ, ŋ chi wɔ mi nyɔɔŋ kpou tusiŋ ndu o ba bɛŋgu le.
9 Kɛ ŋ che mi Chiisu sɔla biiloo a bɛɛleŋ le piɔm o sɔla wo. Mi Mɛlɛka tosa mi maalikɛiya hiau ndu ko chobe. Nduyɛ kɛndɛi nduɛi bɛnduei tosa ni mi Chiisu wu le ŋwaŋnda chiee kpou.
10 Le mi Mɛlɛka sɔla biiloo nyɛ o nyɛ fee cho ni. Ndu tosa ni mi nyɛ o nyɛ fee wa. Nduyɛ le mi chuauwaa nduaa a bɔɔbɔɔ sɔla biiloo, mbo tosa mi Masa nda piŋiaa simnuŋ o diandaa a saŋgala o keeku niŋndaŋ.
11 Chiisu a wanaa o dindi wa, nda kpou finyaa opilɛ kpe nda nɔ ni. Le saboo hoo, siɔmbula bii ndu le nda veeloo aa puaapiliaa niaa le.
12 Mbo dimi aa: “I cho puaapiliaa niaa dimul a diola numndaŋ okɔɔ, nduyɛ mi saŋgala num o chondoŋ niŋ kundaa tɛɛŋ.”
13 Mbo dimi vɛlɛ aa: “I cho tiindaŋ nuu dɔwɔɔ o ndu niŋ.” Mbo chɔɔlu dimi aa: “Mi cheŋ ya naa chuauwaa Chɛhowa* ke ya wa.”
14 Lelaŋ, mɛɛ “chuauwa” haa cho yɛ ŋwaŋnda chiee, ma nɔ koowaŋ a dialloŋ yɛ, lende koni, ndu bɛɛ mbo simnuŋ wanachiee nɔ koowaŋ a dialloŋ ndo. Hei yɔŋnuŋ le mi piɔm ndɔɔ tosa mbo tɛɛmbuu wana tosa mi waŋnda sɔla piɔmndo wo. Ndu cho yɛ Setana* ni.
15 Okoŋ kɔɔli, mbo baŋa wanaa wa o chɛleŋ niŋ siooŋii piɔmndo o ba bɛŋgu chɔŋ a violɔŋ ndaa wa.
16 O kpeekpei niŋ, o cho maalikɛiya le o cho malaa le, kɛ chuauwaa* Ebilaham nda.
17 Lelaŋ, ndoo nɔ mbo simnuŋ maa “puaapiliaa” nduaa o nyɛ o nyɛ niŋ, le halikpeŋ mbo simnuŋ wana bɛndu wanaa soliaa lasala inyiɛɛyo, nduyɛ mbo wa sakpo o sɔɔŋ Mɛlɛkaŋ tosaa niŋ. Okoŋ kɔɔli, mbo soli salaa le waŋchieeya kpou baŋaa le ma miiŋgu o diompilɔɔ niŋ a Mɛlɛka.
18 Ndupila bɛɛ mbo sɔla saŋgaa teleŋ o wa o tɔɔndaŋndo bɛŋgu wo. Lelaŋ, o nɔla mbo mala wanaa cho o tɔɔndaŋndo bɛŋgu wa.
Tɛɛsiaalaŋ
^ Tofa Tɛɛsiaa.
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Kilikiiye, “kulle.”
