Hibuluiya 5:1-14
5 Wana o wana Mɛlɛka hɛli pɛ waŋchieeya tɛɛŋ le mbo wa wana bɛndu wanaa soliaa lasalaa, le nda wallo tosallo o Mɛlɛka piɛiyo niŋ o hɛli ndu ni. O hɛli ndu le mbo yɔŋgu kelaŋ, nduyɛ mbo soli salalaŋ o Mɛlɛka lo le hakila ndalaŋ.
2 O nɔla mbo tuiinuŋ wanaa cho biondɔŋndaŋ tosaa, kɛ a cho o sina choo le wa inyiɛɛ, kanifuule ndu bɛɛ mbo tosa biondɔŋndaŋ.
3 Le hei, o nɔ mbo wa salalaŋ solioo le hakila ndɔlaŋ, mɛɛ o soli salalaŋ le hakila waŋnda yɛ.
4 Waŋndo nɔla mbo simnuŋ wana bɛndu wanaa soliaa lasalaa a ba ndɔ le, mɛɛ mi Mɛlɛka yulu ndu isu, mɛɛ o tosa a Elɔŋ yɛ.
5 Lende koni, Kiliti bɛɛ simnuŋ wana bɛndu wanaa soliaa lasalaa a ba ndɔ le mbo sɔla saŋgalaa le. Kɛ Mɛlɛka heelu ndu ni, mbo dimul ndu aa: “Num cho po nuu ni. I simnuŋ hau finya num.”
6 Mbo dimi vɛlɛ o fondaŋ cheleŋ aa: “Wana soliaa lasalaa ŋ cho ni maa Mɛkisidɛɛki le fɛɛŋ a fɛɛŋ.”
7 Boondii Kiliti wa o chieeŋndo choo ve, mbo nyɔɔlu Mɛlɛka o piɛileŋ niŋ, nduyɛ mbo nyuna ndu choo choo kpeleŋ a mɛmiaŋ o lahɔl le mbo piŋi ndu piɔmndo o ba. Mi Mɛlɛka muli piɛile ndɔleŋ le mɛɛ ndoo nɔ siooŋii nduɛi yɛ.
8 Mi che bɛɛ po ndɔɔ o wa ni, kɛ mi saŋga keeku ndu choo wo tosa mbo pɛɛku le Mɛlɛka diikɔŋndo.
9 Mɛɛ o simnuŋ wana diikaŋ walaŋndo, mi Mɛlɛka ke ndu dioo le mbo simnuŋ wana piŋiaa fafɛɛŋndo le wanaa cho ndu diikɔŋndo wa.
10 Kanifuule, ndu Mɛlɛka hɛli ni le mbo wa wana bɛndu wanaa soliaa lasalaa maa Mɛkisidɛɛki.
11 Ŋ nɔ sɔɔŋ tau le dimioo a ndu okɔɔ, kɛ ŋ kendu tɛɛsiaa, kanifuule la kendu isɔɔ bila biyɔɔ.
12 La nɔ niŋ mi la wa wanaa pɛɛkaa a boondei hei. Kɛ la nɔ wɔ yeemɛi le ma pɛɛku nya sɔɔŋ taseŋ nda pɛɛku waŋnda a Mɛlɛka okɔɔ woŋ. Nduyɛ, la tiu wɔ ba nyɛdiaa sikpaa dioo le, mɛɛ mɛɛyaŋ.
13 Wana o wana wa wɔ pɛ wuɛiyo, chɛlɛkpɔɔ o cho ni, nduyɛ o sina nyɛ cho sakpo le tosaa wo le.
14 Kɛ le kaasoŋnda nyɛdiaa sikpaa cho ni. Wanaa waa nuaa, a nɔla ma soliŋ kɔl kalu ndaa kpeku le sinaa yɛ yiɔɔ o kɛndɔɔ tɛɛŋ a o wɔɔŋndo.
