Hibuluiya 6:1-20
6 Lelaŋ, mɛɛ naŋ chii niŋ pɛɛku a sɔɔŋ taseŋ cho a Kiliti okɔɔ woŋ yɛ, ŋ hiounuŋ lachi a sɔɔŋ ŋkaasoŋndoŋ pɛɛkoo. Ŋ nɔ lɛ miŋ wa sɔɔŋ taseŋ muŋ pɛɛkoo teleŋ o teleŋ te. Muŋ cho ni, walta chuu naa tɔnɔ le laŋ malɔɔ, laalaŋndo o Mɛlɛka niŋ,
2 pɛɛkoo a yiŋɔɔ okɔɔ, waŋnda balaŋ handɔɔ choo, pɛɛkoo a wanaa vi wa miiŋgoo yoomu okɔɔ, nduyɛ a yamɛi fafɛɛŋnde okɔɔ.
3 Te Mɛlɛka chɛl pɛ, ŋ cho hiouwɔɔ lachi a sɔɔŋ ŋkaasoŋndoŋ pɛɛkoo.
4 Waŋnda apum mal pɛɛkula tonyalaŋ, nduyɛ i cho i kala le nda malaa ma muliŋ. Mi ndaa sɔla nyɛ teŋgaa, ma sɔla ke fula Mɛlɛka o ba wo a nyina diandaa.
5 Ma sɔla diom kɛndɛ kɛndɛ Mɛlɛkaa a salala wa niŋ o chieeŋ cho hunɔɔ wo* niŋndaŋ.
6 Kɛ a koŋ kpou, ma mal tonyaa. Nduyɛ i cho i kala le nda malaa ma muliŋ. Kanifuule, a miiŋgu vɛlɛ ma baŋ Po Mɛlɛkaa o yɔmndo choo le ndapila. Nduyɛ ma tusi ndu siɔmbulaŋ o luŋ kpendekele.
7 Te piɔɔ wa pɛ siaa chuɛi chuɛi o lɛŋndeŋ choo, mbo pɔɔliaa lɛŋndeŋ. Nduyɛ hei tosa mi tɔlɔɔlaŋ la naŋ tau, okoŋ mi la yɔŋgu kɔmndeŋ le wanaa tɔl taŋ nda. O hei niŋ, mi Mɛlɛka dɔu lɛŋnde leŋ sala.
8 Kɛ te yɔɔŋ a bil fondoo vil pɛ o lɛŋnde leŋ choo, wana tɔl o leŋ choo wo cho leŋ kɛɛ, nduyɛ mbo mɛna leŋ po. O mɛɛlulaŋ, o mal leŋ o yiŋ.
9 Chaaŋaa naa kaalaa, mi che bɛɛ ŋ cho suɛi o nya lo o nɛiyo hoo choo, kɛ ŋ laalaŋ kɛsɛ maa la cho o nɛi kɛndɔɔ choo, nduyɛ mi la wa sɔɔŋ Mɛlɛka huŋ niŋ mbo piŋi nya woŋ tosaa.
10 Mɛlɛka cho wana lakafa, mbo puɛɛnuŋ a wali nya cho tosaa wo le. Nduyɛ o puɛɛnuŋ a kaala nya chɔm le diola ndɔlaŋ ndo le. La cho wanaa laalaŋnda* malaa,* nduyɛ mi la wa hiouwɔɔ lachi a nda malaa.*
11 Kɛ nyɛ naŋ yeema le nya pilɛŋ pilɛŋnda kpou wo cho ni maa, la hiou lachi a sɛmbɛ nyaa nɔ o kandɔŋndo le tiindaŋ nyaa wo chɔmndo haaa o mɛɛlulaŋ.
12 Ŋ yeema nya mi la wa wanaa siɛlɛi le. Kɛ la tol tamasi wanaa ndaa laalaŋ, ma biunuŋ, okoŋ ma sɔla nyɛm Mɛlɛka chuel nda buŋgɛi yoŋ nda kɔɔli.
13 Mɛɛ Mɛlɛka chuel Ebilaham buŋgɛi, mbo mɛnaŋ a ndupila, kanifuule wana o wana cheleŋ cho mbo hiou ndu le.
14 Mbo dimi aa: “A lekɛndɛi, I cho num dɔwɔɔ sala, nduyɛ I cho tosa ma kui tau.”
15 Mi Ebilaham hiau lachi a biuwɔŋndo, okoŋ mbo sɔla nyɛ Mɛlɛka chuel ndu buŋgɛiyo.
16 Te waŋchieeya wa pɛ mɛnaŋndo, a diola wana hiou nda wo nda mɛnaŋ ni. Hei tosa mi sɛɛŋgiaŋndo chuu, kanifuule mɛnaŋ koŋ chɔm maa nyɛ nda dimi wo cho tonya.
17 Lende koni, mi Mɛlɛka kɛɛsiaa le mbo chɔm wanaa wa hunɔɔ sɔla nyɛ o chua buŋgɛiyo wa walaŋ maa, sabu ndɔɔ siŋgaŋ niŋ kposoŋ te. Le hei, mbo mɛnaŋ po.
18 Sɔɔŋ sala tiɔɔŋndoŋ muŋ siŋgaŋ kposoŋ te. Nduyɛ Mɛlɛka dimi lachoo le. Lelaŋ, naŋ hiŋ naa Mɛlɛka chua le mbo manda naa wa, ŋ nɔla miŋ sɔla kɔl dɛɛniaa tau, okoŋ miŋ bii tiindaŋ cho naa lachi wo kpiŋ.
19 Tiindaŋ naa cho ko maa chiliŋii simi dɛndɔɔ o peelo ve. Ndu bii yoomula naalaŋ kpiŋ ni, miŋ sim yi, ŋ nɔ kiisaŋ kposoŋ te. Ndu koni tosa ni le miŋ hiou o kola bɛndu cho o chiɛi Mɛlɛkaa niŋndo kɔɔli.
20 Chiisu fɛlɛŋ luɛi loŋ, nduyɛ mbo bɛɛndiaa nɛiyo le naa. Mbo simnuŋ wana bɛndu wanaa soliaa lasalaa maa Mɛkisidɛɛki le fɛɛŋ a fɛɛŋ.
Tɛɛsiaalaŋ
^ Tofa Tɛɛsiaa.
^ Kilikiiye, “wanaa diandaa.”
^ Kilikiiye, “wallo tosallo.”
^ Kilikiiye, “wallo tosallo.”
