Hibuluiya 8:1-13
8 Suɛi lebolle o suɛi hei niŋ cho hei ni: Ŋ nɔ wana bɛndu wanaa soliaa lasala waa nuaa. Nduyɛ, o cho ichali o ba kɛndɛ Mɛlɛka bɛndoo choo o choo choo niŋ.
2 Ndu cho wallo o fondaŋ diandaa a o tɛndii kpeekpeiyo niŋ ni. Chɛhowa* pila simi tɛndiiyo hoo ni, o cho wanachiee le.
3 Wana bɛndu wanaa soliaa lasala kɛ kɛ, Mɛlɛka hɛli ndu ni le hunɔɔ a nyɔɔŋ, nduyɛ mbo solul ndu salaa. Lelaŋ, ndu bɛɛ ndoo nɔ mbo soli salaa o Mɛlɛka lo.
4 Te ndoo wa pɛ o chieeŋndo choo, o ve wa wana soliaa lasala le. Kanifuule, wanaa soliaa lasalaa wa niŋ a mɛɛ Sawaa* dimi yɛ.
5 Walta waŋnda haa ndaa tosa laŋ, tamasioo a wunduleŋ ko la wa ni le nyɛm waa choo choo. Lende ko i yɔŋnuŋ a Muuse ni. Mɛɛ o wa tɛndiiyo taŋgullo, mi Mɛlɛka dimul ndu aa: “Taŋgul ndu mɛɛ o mɛɛ ya tuulal num ndu o pembei choo yɛ.”
6 Ŋ che niko kpendekele maa wali Chiisu sɔla le tosaa wo, ndu hiou wa o sɔvɛ. Kanifuule, ndu koni cho vɛlɛ Mɛlɛka nda waŋchieeya tɛɛŋ le kpema sɔviɔɔ ni. Nduyɛ buŋgaŋ Mɛlɛka chua le kpemaa hoo yiiyo woŋ, muŋ hiou wa buŋgaŋ sɔvɛ.
7 Te kpema tasoo ndoo nɔ sɔŋ te, mɛɛ kpema diiŋ ndɔɔ ndoo yeemaŋ lɛ le.
8 Kɛ mi Mɛlɛka cha wanaa nduaa siɔuve o ŋdial. Kanifuule: “Chɛhowa* dimi aa, ‘Teleŋ cho fuuluu, mi yii kpema sɛnɛiyo a yuŋgoo Isɔluɛi, nduyɛ a waŋnda Chuda.
9 Kpema koŋ ndu cho wa teŋgeŋ a o ya yii a finyaa ndaa mamaa, boondii ya lo nda mandaa mi soli nda o lɛŋnde Ichipileŋ niŋndo.’ Mi Chɛhowa* dimi aa, ‘Kɛ a lo o kpema naŋ yiiyo choo le. Le hei mi mal nda.’
10 “Mi Chɛhowa* dimi vɛlɛ aa, ‘Te boondii keŋ fuuluu pɛ, kpemaa hoo ya cho yii a yuŋgoo Isɔluɛi ni: I cho tosa ma sina sawala nilaŋ, nduyɛ mi poonyiaa nda laŋ o lakɔl. I cho simnɔŋ Mɛlɛka nda, mi nda bɛɛ simnuŋ wanaa ni.
11 “‘O yɔŋ bɛɛ mi waŋnda fula lɛŋnde pilɛleŋ, ɔɔ ma wa kaale pilɛleŋ, wana o wana pɛɛku lɛ niŋ chaaŋ ndɔ aa: “Sina Chɛhowa”* le. Kanifuule, wana bɛndu ni, wana pɔmbɔ ni, nda kpou a cho ya sina.
12 I cho nda malɔɔ haki le yɔŋnda ndala wɔɔŋndaŋ, nduyɛ I loonuŋ lɛ niŋ laŋ kposoŋ te.’”
13 Te Mɛlɛka soo pɛ a “kpema sɛnɛiyo” okɔɔ, mɛɛ o siiŋguu o tasoo nyɛ paandu. Nduyɛ, te nyɔɔ simnuŋ pɛ o paandu, mbo siɔŋ, mɛɛ o hiŋ faŋaŋ.
Tɛɛsiaalaŋ
^ Tofa Tɛɛsiaa.
^ Koŋ cho ni, Sawala Mɛlɛka ke Muuse laŋ.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
