Hoosiaa 1:1-11
1 Teleŋ Yusaya, Chotam, Ehaasi, a Hɛsikaya wa o masaleŋ choo Chuda wo, mi Chɛhowa suaa naa Hoosiaa* chua po Biɛɛlui wo. A teleŋ koŋ, Chɛlobowam po Chowaasi wo bɛɛ wa o masaleŋ choo Isɔluɛi.
2 Mɛɛ Chɛhowa kandu suɛi o Hoosiaa lo, mi Chɛhowa dimul ndu aa: “Kɔ chua wana lanɔɔ o nɔɔ niŋ. Nduyɛ wana lanɔ koŋ cho suunda,* mbo vilul num chuauwaa samaa.* Kanifuule, waŋnda o lɛŋndeŋ niŋ mal Chɛhowa piɛiyo, ma muliŋ sɔɔŋ tosaa maa wanaa suundɛi.”*
3 Okoŋ, mbo kɔ chua Koma o nɔɔ niŋ, chua Dibilim ndo. Mi Koma chua folioo,* nduyɛ mbo vilul ndu poo.
4 Okoŋ kɔɔli, mi Chɛhowa dimul Hoosiaa aa: “Ke ndu diolaŋ aa Chɛsiluɛɛ.* Kanifuule, o teleŋ biŋgi bɛŋgu, I cho yuŋgu Chɛhu wo nyɛpalaa tusi choo, le mɛɛ nda tɛɛmbuu yoomula waŋnda o Chɛsiluɛɛ niŋ yɛ. Nduyɛ, I cho tosa mi masaleŋ o Isɔluɛi niŋ le mɛɛlu.
5 A teleŋ koŋ, I cho chiɔulaŋ o Isɔluɛi niŋ tɛɛmbuu o Kpoloŋndo Chɛsiluɛɛ.”
6 Mi Koma chua vɛlɛ folioo, mbo vialu wana lanɔɔ. Mi Mɛlɛka dimul Hoosiaa aa: “Ke ndu diolaŋ aa Lo-luhama,* kanifuule I cho lɛ waŋnda Isɔluɛi inyiɛɛ tuiinɔŋ te. I cho nda hunɔɔ touwɔɔ.
7 Kɛ I cho waŋnda Chuda tuiinɔŋ inyiɛɛ, nduyɛ mi ya Chɛhowa Mɛlɛka ndaa piŋi nda. O cho a lechiɔu, muɛi faŋnde, suaa, puaa nyaanuŋ a suaa wa, ɔɔ a chɔuwo le ya cho nda piŋi le.”
8 Mɛɛ nda soli Lo-luhama mɛɛleŋ o sondo, mi Koma chua folioo, mbo vialu vɛlɛ poo.
9 Okoŋ, mi Mɛlɛka dimul Hoosiaa aa: “Ke ndu diolaŋ aa Lo-amai,* kanifuule la cho lɛ wanaa ni le. Nduyɛ ya bɛɛ, I cho lɛ Mɛlɛka nya le.
10 “Mɛɛ siooŋnde o pee mɛŋma ihɛllo kɔŋgɔ wa nuaa wana nɔla ndi chɔm te yɛ, lende waŋnda* o Isɔluɛi niŋ cho hunɔɔ kui tau tau ni. Nduyɛ, o fondaŋ yaa dimul nda maa ‘La cho lɛ wanaa ni le’ wo, I cho nda dimul maa, ‘Chuauwaa Mɛlɛka cho yoomu wa’ nda cho ni.
11 Waŋnda Chuda a haa Isɔluɛi cho chuuŋgiaŋ naapilɛ ma wa o diompilɔɔ niŋ. Nduyɛ ma hɛli waŋndo le mbo wa nda bolleŋ, ma fula o lɛŋnde leŋ niŋ. Kanifuule, paale tɔɔmale bɛnduleŋ pila le wa niŋ le Chɛsiluɛɛ ni.
Tɛɛsiaalaŋ
^ Ndu nda veelu vɛlɛ ni aa Hoosaya. Koŋ cho ni, “Chɛhowa Piŋi Ni.”
^ Ɔɔ “kaa ihini nɔɔlɛiyo tosa.”
^ Ɔɔ “chuauwa o kaa ihini nɔɔlɛiyo niŋ.”
^ Ɔɔ “kaa ihini nɔɔlɛi nda cho tosaa wo.”
^ Ɔɔ “yollo.”
^ Diolaŋ ndaŋ la sim “Mɛlɛka Cho Kulle Saŋɔɔ.”
^ Diolaŋ ndaŋ la sim “A Tuinuŋ Ndu Inyiɛɛ Le.”
^ Diolaŋ ndaŋ la sim “A Cho Wanaa Ni Le.”
^ Hibuluiye, “chuauwa.”
