Hoosiaa 10:1-15
10 “Isɔluɛi cho ko maa tɔlɔɔ makilepii soli lɛuwoŋ, nduyɛ mbo kom tau wo.
Mɛɛ o kuam fau, lende koni o chɔɔlu bandula luamaala salalaŋ taŋgul ni.Nduyɛ mɛɛ lɛŋnde ndɔleŋ le yɔŋgu komɔɔ fau, lende koni o nɛŋi suŋgbuma o simi le sooluu wo waŋ ni.
2 Kaa mulu muluaŋndo cho nda o piaa o lakɔl cha.*Lelaŋ, tɔɔyaŋndo cho nda wa choo.
Waŋndo cho hunɔɔ bandula ndala luamaa lasalalaŋ pesi pesi, nduyɛ mbo tɛɛmbuu suŋgbuma maŋ.
3 A cho dimi aa, ‘Ŋ nɔ lɛ masa le, kanifuule ŋ kɛɛ siooŋnde nɔɔ le Chɛhowa.
Nduyɛ o yɔŋ bɛɛ mi naŋ nɔ masaa, yɛɛnɛ o wa yɛ naa tosal?’
4 A cho sɔɔŋ fondoŋ dimioo, ma chua buŋgaŋ lachoowaŋ, nduyɛ ma yii kpemalaŋ.Mɛɛ bil wɔɔŋndo wul nuaa o chiɛi niŋ yɛ, lende koni nyɛpalaa tual niŋ nda choo ni.
5 Siooŋnde cho waŋnda Sameeliaa biyɔɔ le piɔm nau fɔŋndɔ cho Bɛti-aviŋ ndo.
Wanaa nɔ ndu wa cho chaŋ le ndu,Wanaa soliaa lasalaa cho a nyaale le mɛlɛka lachoowaa hoo, nduyɛ ma wa ndu biiloo wa bɛɛ cho hunɔɔ chaŋ,Kanifuule, a cho ndu hunɔɔ chua ma kuɛŋnuŋ a ndu.
6 A cho lakɔŋnɔŋ a ndu Asiiliaa ma kɔ ke masa cho loŋ ndo.
Siɔmbulaŋ la cho hunɔɔ Ifiluem biyɔɔ,Nduyɛ, Isɔluɛi bɛɛ siɔmbulaŋ la cho ndu biyɔɔ le sila wɔɔŋ o tol kɔɔli wo.
7 Sameeliaa nda masa ndɔɔ cho hunɔɔ lo pɛ,*Mɛɛ lɛuvii yɔmndo bɛɛsa nuaa mi i del o peelo, okoŋ mi mɛŋndaŋ ma hiounuŋ a ndi yɛ.
8 Fondaŋnda lasooluulaŋ Bɛti-aviŋ la cho hunɔɔ tambei sɔla.
Laŋ la tosa ni mi Isɔluɛiya luei balaŋ o hakioo niŋ.
Yɔɔŋ a bilta ŋyɔlaŋ la cho hunɔɔ wulɔɔ o bandula ndala luamaa lasalalaŋ choo.
Waŋnda cho wa pembuŋ bɛndoŋ dimullo aa, ‘Kuumbuŋ naa choo!’
Nduyɛ ma dimul pembuŋ pɔmbɔŋ aa, ‘Del naa choo!’
9 Chɔŋ a teleŋ Kibiya wo nya waŋnda Isɔluɛi tosa hakioo ni.
Nduyɛ hiouwɔɔ tuŋ nda cho lachi a ndu tosaa ni,
O cho wanaa dɛnɛ wɔɔŋnda o Kibiya niŋ kpou le vi o chɔuwo niŋ te.
10 I cho nda nyɛpalaa tusi choo te I yeema pɛ.
Nduyɛ, waŋnda cho chuuŋgiaŋ naapilɛ ma chiŋalaŋ nda.A cho nda mɔsɔŋa yii a hakila ndala tiɔɔŋ ndaŋ.*
11 Ifiluem wa ko maa nau towa nda pɛɛku kulloŋ niɔuwo, nduyɛ mbo kaala muŋ niɔuwo wo,Le hei, I yii ndu yɔm o ikɛsu le.
I cho tosa mi Ifiluem wa waa.
Chuda cho wa waa, nduyɛ mi Chekɔpu wa koŋɔɔ le ndu.
12 La saŋ sakpoyɛi, okoŋ mi la kou kaala lo lechoo wo.
La nuuviaa yondola kɛndɛlaŋ mi la dɔu waltaŋ le nyapila,Kanifuule teleŋndo cho wɔ le mi la nuuviaa Chɛhowa,O cho hunɔɔ nya silaa ke o nɛi sakpoo choo.
13 Kɛ la saŋ dɛnɛ wɔɔŋndo,Mi la kuau hakioo,Nduyɛ mi la dia kɔmnde nya sɔla o choola nyalaŋ niŋndeŋ,Kanifuule, la tiindaŋ nyapila,A puaa nyaa chɔuwaa faŋga bɛnduaa.
14 Yaamɔɔwa cho hunɔɔ wanaa numnda chiŋalaŋ,Nduyɛ, chieeŋ num bɛnduŋ nɔ kpakila kala kalalaŋ ndoŋ bɛɛ cho hunɔɔ tambu kpou.I yɔŋnuŋ niŋ ko mɛɛ Sialimaŋ kɔ del waŋnda Abɛl choo mbo tɛɛmbuu nda yɛ.O sɔŋgɔ koŋ niŋ, waŋ laanduaa ndaa nɔ chuauwa wa, ma diu diu nda diyɔɔ imɔnɔɔ nda chuauwaa ndaa latulu.
15 Num Bɛtɛl, nuaa nda cho num hunɔɔ tosal ni le dɛnɛ wɔɔŋ numndo.
Idii puŋ nda cho hunɔɔ chii a masaa Isɔluɛi ni.”*
Tɛɛsiaalaŋ
^ Ɔɔ “kɔltaŋ nda chuluku chuluku.”
^ Hibuluiye, “mei doŋ.”
^ Koŋ cho ni, nyɛpalaa ndaa wa niŋ ko maa yɔm nda yii chɔluaa o ikɛsu wo.
^ Hibuluiye “tosaa mbo mei doŋ.”
