Hoosiaa 11:1-12
11 “Isɔluɛi wa wɔ poombɔ pɔmbɔ, mi kaala ndu,Nduyɛ I veelu po nuu le mbo faŋaŋ Ichipi.
2 Mɛɛ ndaa* veelu nda fau,Lende koni ndaa nyaanuŋ nda ni.
A wa hiouwɔɔ lachi a salalaŋ solioo o suŋgbuma Baal laŋ,Nduyɛ, ma soli vɛlɛ salalaŋ o piɔmaa nda toosiaa wa lo.
3 Ya pɛɛku Ifiluem kɔlaŋ ni, nduyɛ ya wa nda biyɔɔ o ibuŋ ni.Kɛ a sina ndi pɛŋgu maa ya le wa nda mandaa le.
4 Mi soliŋ kaalaa a kɛndɛi kpeku maa leyoo le nda naŋnɔŋndo o ibuŋ.Mi faŋa nda wolɔɔla lusulɛilaŋ o ŋkɛsu,Nduyɛ mi ke wana o wana nyɛdiaa o nɛi kaalaa niŋ.
5 A cho lɛ miiŋgu o lɛŋnde Ichipi leŋ niŋ te, kɛ masaa Asiiliaa nda cho wa o ba bɛŋgu ni,Kanifuule, a kɛɛ le ya miiŋgoo o ibuŋ.
6 Yaamɔɔwa cho hunɔɔ chieeŋ ndɔŋ bɛndoŋ delɔɔ choo a muɛi faŋnde,Ma tɛɛmbuu diola kpakila ndɔlaŋ, nduyɛ ma diu diu nda le kɛɛsiaala ndala dɛnɛ wɔɔŋndaŋ.
7 Wanaa niaa kɛɛ le ya lo lechoo wo chɔmndo.
Mi che bɛɛ ma veelu nda le ma miiŋgu wana cho filioŋndo* o ibuŋ, kɛ wana o wana kue le.
8 Num Ifiluem, I nɔla pa mi kɛɛ num?
Num Isɔluɛi, I nɔla pa mi faŋaŋ num kɔɔli?
I nɔla pa mi bii num maa waŋnda Adimaa?
I nɔla pa mi tosal num maa Sɛboyim?
I chii kɔl nuu siŋga.Nduyɛ, nyiɛɛyii ya nɔ le numnde cho bɔɔ.*
9 I cho num nyɛpalaa tusi choo le mɛɛ ya dɔɔnuŋ tumbe a num yɛ le.
I cho lɛ Ifiluem tɛɛmbuu le,Kanifuule, Mɛlɛka ya cho ni, I cho wanachiee le.Ya cho Wana Diandaa nya tɛɛŋ ni,Nduyɛ, I cho tumbe dɔɔnɔŋ a num te.
10 A cho miiŋgu Chɛhowa o ibuŋ, nduyɛ mbo wa pɛɛliaa maa kpɔkuŋ.*Te o wa pɛ pɛɛliaa, chuauwaa nduaa cho chɔnɔŋ ba paaleŋ le del lo ma hiŋ a nyiiyaa.
11 Te a fula pɛ Ichipi, a cho nyiiya maa you,A cho chɔnɔŋ o lɛŋnde Asiiliaa leŋ niŋ, ma hiŋ a kiltaŋ maa kaŋgbo.Nduyɛ, I cho tosa ma miiŋgu o chiɛila ndalaŋ niŋ.” Chɛhowa dimi lende ni.
12 Choolaŋ kposoŋ Ifiluem dimul la ni,Ba o ba ya muliŋ pɛ, choolaŋ kpu ya cha o Isɔluɛi niŋ ni.
Kɛ Chuda ndu cho wɔ kɔlaŋ a Mɛlɛka latulu,Nduyɛ, o cho lo lechoo wo chɔmndo o Wana Hiou Diondɔɔ Kpou Wo lo.”
Tɛɛsiaalaŋ
^ Koŋ cho ni, wanaa ndaa suaa le Mɛlɛka wa, a wanaa cheleŋaa ndoo viam le Isɔluɛi silaa wa.
^ Koŋ cho ni, o piɛile cho filioŋndeŋ.
^ Hibuluiye, “i tuu kpɛi.”
^ Ɔɔ “yalakana.”
