Hoosiaa 12:1-14
12 “Ifiluem dɔu tiindaŋ ndɔɔ o nyɛm fondoŋ niŋ.
Lepaa o lepaa, o cho hueiyii chaŋ ba paaleŋ le chaŋ ndo ve kiltaŋ kɔɔli.
O cho hiouwɔɔ lachi a choolaŋ dimioo vɛlɛ a sɔŋgɔlaŋ mɛlioo.
A yii kpemaa a waŋnda Asiiliaa, nduyɛ ma kuaŋnuŋ a chuɛiyaŋ Ichipi.
2 Chɛhowa cho hunɔɔ kɔɔsa a Chuda.O cho Chekɔpu nyɛpalaa tusi choo le kelala ndɔlaŋ,Nduyɛ, o cho ndu hunɔɔ paawa* le nyɛ o nyɛ o tosa.
3 O wa kala ndɔ o dembe, mbo saa bɛ ndɔ tɔndii kɔɔliei,Nduyɛ a yoomuma nduaŋ kpou, mbo sɔŋga a Mɛlɛka.
4 Mbo hiau lachi a sɔŋgaa a maalikɛinɔɔ, nduyɛ mbo sɔla batiuwaa.
Mbo nyɔɔlu ndu a chaŋndo, le mbo dɔu ndu sala.”
Bɛtɛl Mɛlɛka saaluŋ ndu ni, nduyɛ loŋ o soo o naa lo ni.
5 Chɛhowa cho Mɛlɛka puaa chɔuwa* ni.Waŋnda nɔ ma loonuŋ maa diola ndɔlaŋ la cho Chɛhowa ni.
6 “Lelaŋ, miiŋgu Mɛlɛka numndo o ibuŋ,Hiou lachi a kaala lo lechoo wo vɛlɛ a sakpoyɛi chɔmndo,Nduyɛ, ma nɔ tiindaŋndo lɔɔlɔɔ o Mɛlɛka numndo niŋ.
7 Wana leyulaa* cho kafalaŋ tosaa a sekeleilaŋ* o wɔŋgulaŋ niŋ.O kaala kafalaŋ.
8 Ifiluem cho dimioo aa, ‘I sul.I nɔ nyɔɔŋ tau.
Lalle ya kelu le muŋ sɔlaa ni, o cho lakafa le ya tosa le.’
9 Ya cho Chɛhowa Mɛlɛka numndo ni chɔŋ a teleŋ ŋ wa o lɛŋnde Ichipi leŋ niŋndo.
I cho tosa ma wa vɛlɛ o tɛndiilaŋ niŋ,Mɛɛ ndii yɔŋnuŋ o palɛi bɔŋaŋ nde choo yɛ.
10 Mi suaa o wanaa ndaa suaa le ya wa lo,Mi tosa ma cha yilaŋndoŋ tau,Nduyɛ, mi dimi talelaŋ sanaa a wanaa ndaa suaa le ya wa.
11 Waŋnda Kiliaadi cho yawalaŋ viomɔɔ, nduyɛ ma dimi choolaŋ.
Kikaa nda kua nauwa salalaŋ solioo ni.Nduyɛ, bandula ndala luamaa lasalalaŋ la cho la hɔbɛi, mɛɛ nda diu diu nuaa poutaŋ a kundalaŋ o chiɛi niŋ yɛ.
12 Mi Chekɔpu nyaanuŋ o tanda* Aluam* ndo niŋ.Loŋ Isɔluɛi kɔ tosa wallo le lanɔɔ sɔlaa ni,Nduyɛ, mbo simnuŋ wana mandaa lasaa le mbo sɔla lanɔɔ.
13 Mi Chɛhowa soliŋ wana suaa le ndu wo kpeku mbo soli Isɔluɛi Ichipi,Nduyɛ, mbo soliŋ wana suaa le ndu wo kpeku le ndu mandaa.
14 Ifiluem tɛɛmbuu bɔɔ Mɛlɛka kɔllo.Mɛlɛka bii ndu tɔɔyaŋ le wanaa o diu wa.Masanɔ ndɔɔ cho ndu paawa* le tɔɔ o tɛɛmbuu ndu wo.”
Tɛɛsiaalaŋ
^ Ɔɔ “sala.”
^ Koŋ cho ni, puaa chɔuwa o choo choo niŋ.
^ Ɔɔ “yulanɔ bɛndoo.”
^ Ɔɔ “kilolaŋ.”
^ Hibuluiye, “chiɛi.”
^ Ɔɔ “Siiliaa wo.”
^ Ɔɔ “sala.”
