Hoosiaa 13:1-16
13 “Te Ifiluem ndoo soo pɛ, mi waŋnda ndaa nyiiya kpa kpa.Ndoo fula bɔɔ tɔɔ o Isɔluɛi niŋ.
Kɛ mɛɛ o luɛi Baal sooluuwo, mbo tosa hakioo, okoŋ mbo wu.
2 A cho hiouwɔɔ lachi a haki ndaa kuiyo,Kanifuule, a teeŋgiaa kaniŋ ndaŋ humboŋ ma toosiaa piɔmaa ŋchiliŋnda.Wanaa chaa nyɛ a laba wa toosiaa piɔmnda haa ni.
A cho dimioo a nda okɔɔ aa, ‘Wanaa soli salalaŋ nda sɔsa nauwaa fɔŋnduaa sondolaŋ.’
3 Lelaŋ, a cho hunɔɔ simnɔŋ mɛɛ yumbu yumbu idiiyo wa nuaa yɛ,A cho hunɔɔ lo pɛ, mɛɛ mɔmndo kiolu nuaa idii yɛ,Mɛɛ hueiye basu nuaa fueende o yasaba yɛ, lende nda wa niŋ ni,Nduyɛ, mɛɛ kumnde fula nuaa o fɛɛfɔɔ yɛ, lende nda wa niŋ ni.
4 Ya cho Chɛhowa Mɛlɛka numndo ni chɔŋ a teleŋ ŋ wa o lɛŋnde Ichipi leŋ niŋndo.A sina Mɛlɛka cheleŋ te mɛɛ ya,Nduyɛ wana piŋiaa cheleŋ cho o ya kɔɔli le.
5 Teleŋ ŋ wa o pollo niŋ naa piɔɔ se le wa ya sina num ni.
6 A wa a kɔl hiniaa le mɛɛ ya kuɛ a nda o fondaŋ bil kɛndɛ kɛndɔɔ yɛ.Mi kɔl nda hiniaa koŋ tosa ma simnuŋ wanaa heelaŋnda,
Okoŋ, ma puɛɛnuŋ a ya okɔɔ.
7 I cho simnɔŋ maa kpɔkuŋ* fɔŋndɔ le nda,Nduyɛ, mi simnuŋ mɛɛ tambillo hini nuaa mɛŋgɛlaa o kaŋ visioo yɛ.
8 I cho nda delɔɔ choo mɛɛ suluku chuauwaa nduaa luusiaŋndo wa nuaa yɛ,Nduyɛ mi kuumbuu nda takpalaŋ.
Loŋ ya cho nda tɛɛmbuu ni, mɛɛ kpɔkuŋndo* tosa nuaa yɛ.Nduyɛ visi biyaa cho nda sɛɛsiaa.
9 Lelaŋ, num Isɔluɛi, a nɔ le tambei sɔlaa,Kanifuule, a simul la, ya wana mala numndo.
10 Kuɛɛnɛ masa numndo cho yɛ, le mbo piŋi num o chieeŋ num bɛndoŋ niŋ kpou?Nduyɛ masaa* ŋ dimul la aa,‘Ke ya masaa a laŋgbaa kalla’ wa, kuɛɛnɛ nda cho yɛ?
11 I wa a kɔl tuuwo mi ke nya masaa,Nduyɛ a kɔl tuuwo ya cho ndu faŋa ni.
12 Dɛnɛ wɔɔŋ Ifiluem ndo cho o simbulaa,Nduyɛ haki ndɔɔ cho o kɛsiaa kɔdɔ.
13 O cho nyɛ nɛiyaa sinaŋ, mɛɛ pulii vialɛi wa nuaa wana lanɔɔ nɛiyo yɛ.
Kɛ chɛlɛkpɛ nɔ taasi le wo o cho ni.O yɔŋ bɛɛ mi teleŋ ndɔ vialaa fuuluu, o chɛl ma velu ndu le.
14 I cho nda soli o Sɛiyo* niŋ, nduyɛ mi miŋgi nda yoomu.I cho nda soli o piɔmndo niŋ.
Piɔmndo, ɔɔ kefuŋ numndoŋ?
Sɛiyo, ɔɔ kpaaya ŋ nɔ le tɛɛmbuuwo wo?
Nyɛɛyii bɛɛ bii niŋ ya le.
15 O yɔŋ bɛɛ mi nyɛ o nyɛ wa o kɛndɛ a ndu maa bil puiyaa,Chɛhowa cho tosa mi hueiye fula ba paaleŋ le chaŋ ndo,Chɔnɔŋndo o pollo niŋ, mi i huŋ veesiaa sooŋnda ndɔla mamɛŋndaŋ a peela ndɔla pɔmbɔlaŋ kpou.
Wana koŋ cho hunɔɔ nyɛm ndɔŋ sɔvɛŋ cho ŋ kɛsiaa woŋ kpou tɛɛmbuu.
16 Tɔɔyaŋndo cho wa Sameeliaa choo le mɛɛ o simul Mɛlɛka ndɔɔ yɛ.
A cho nda hunɔɔ diu diu a muɛi faŋnde,Ma huŋ diu diu chuauwaa ndaa diyɔɔ imɔnɔɔ,Nduyɛ ma sɛɛsiaa waŋ laanduaa ndaa cho a folilaŋ* nda.”
Tɛɛsiaalaŋ
^ Ɔɔ “yalakana.”
^ Ɔɔ “yalakanaa.”
^ Hibuluiye, “wanaa kialaa ŋyamaa.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “yoltaŋ.”
