Hoosiaa 14:1-9
14 “Nya waŋnda Isɔluɛi, la miiŋgu Chɛhowa Mɛlɛka nyaa o ibuŋ,Kanifuule hakila nyalaŋ la tosa mi la faŋaŋ o nɛi ndɔɔ choo.
2 La miiŋgu Chɛhowa o ibuŋ,Mi la dimul ndu aa, ‘Yandii, mal naa haki le yɔŋnda naala wɔɔŋndaŋ, nduyɛ ma chɛl o kɛndɛ naŋ tosa wo,Mɛɛ naŋ soli nuaa nauwaa fɔŋnduaa salaa yɛ, lende naŋ cho num wa saŋgalaa a lasondo ni.
3 Asiiliaa cho naa piŋi le.
Ŋ hel lɛ niŋ o suaa choo miŋ nyaanuŋ a nda le,Nduyɛ, fɛɛŋ bɛɛ ŋ cho lɛ wali naŋ tosa a laba wo veelu aa, “Mɛlɛka naa” le.Kanifuule, wanaa nɔ ŋfinya le wa, num tuiinuŋ nda inyiɛɛ ni.’
4 I cho tosa ma miiŋgu ya o ibuŋ, nduyɛ a kɛɛ lɛ ya le.
I cho nda kaala a kɔl nuu kpou,Kanifuule tumbe yaa dɔɔnuŋ a nda wo pɔlul.
5 I cho simnɔŋ maa mɔm le Isɔluɛi.O cho wa maa bil lapeeŋge,Nduyɛ mi puunduŋ ndɔŋ luɛi lɛŋ maa yɔmnde Lebanɔŋ.
6 Lɛuwuŋ ndɔŋ cho pɛŋgɛlaŋ,Naŋɔɔ ndɔɔ cho wa maa yɔm ɔlifiiyo,Nduyɛ chuŋ ndɔɔ cho wa maa yɔmnde Lebanɔŋ.
7 A cho vɛlɛ miiŋgu o wunduma nduaŋ bɛŋgu.
A cho wa kulloŋ tɔlɔɔ, nduyɛ miŋ kom maa makilepii.
Tɔɔ ndɔɔ wa niŋ ko maa muɛiyaŋ Lebanɔŋ.
8 Ifiluem cho nyuna aa, ‘Mako yɛɛ ya nɔ yɛ vɛlɛ a piɔmnda?’
I cho ndu mulul, nduyɛ mi wa ndu hɔlteŋ choo.
I cho wa maa yɔm chunipa cho puiyo tɛɛ tɛɛ wo.
Ya o ba kɔmnde nyaleŋ le wa niŋ fulaa ni.”
9 Nɛɛnɛ nɔ yɛ taasioo? Mɛɛ o bii sɔɔŋ muŋ bila.
Nɛɛnɛ nɔ yɛ kɔl kaloo? Mɛɛ o kindiŋ mbo sina muŋ.
Nɛila Chɛhowa laŋ la cho sakpo,Nduyɛ, wanaa cho sakpo wa kua o laŋ choo ni.Kɛ te wanaa dɛnɛ wɔɔŋnda kuɛ pɛ lechoo, a boŋi boŋi.
