Hoosiaa 4:1-19
4 Nya waŋnda Isɔluɛi, la tuei nyɛ Chɛhowa dimi wo,Chɛhowa nɔ le wanaa cho o lɛŋndeŋ ndeŋ niŋnda yamɛi kilullo.Kanifuule, tonyaa, kaala lo lechoo wo, a sinapɛŋgu cho a Mɛlɛka okɔɔ wo cho o lɛŋndeŋ ndeŋ niŋ te.
2 Buŋgaŋ lachoowaŋ, choolaŋ, diyɔɔlaŋ,Viileŋ, a kaa suundɛiyo cho o tiuwaa ba o ba fee.Nduyɛ, a cho hiouwɔɔ lachi tuŋ a waŋnda diuwo.
3 Le saboo hoo, chaŋndaŋ la wa niŋ o lɛŋndeŋ ndeŋ niŋ.Nduyɛ, wana o wana cho o lɛŋndeŋ ndeŋ niŋ cho wou kpandeŋ.Visiaa yonduaa, youwaa balu choo choo wa,A suwaa cho o pee mɛŋma ihɛllo niŋnda kpou cho piɔmndo sɔla.
4 “Lelaŋ, maa wana o wana simul nya ɔɔ mbo kindiŋ le nya miŋgi o nɛi le,Kanifuule, la cho ko maa wanaa simul wana soliaa lasalaa wa.
5 La lo niŋ kɔlaŋ ipala deŋ mi la boŋ,Wana suaa le Mɛlɛka wo bɛɛ cho boŋ, naŋ chaa o nyumndaŋ niŋ o cho kɔlaŋ ni.
I cho tosa mi kala nya mei doŋ.*
6 I cho tosa mi wanaa niaa mei doŋ,* kanifuule a sina ya le.
Le mɛɛ nda kɛɛ ya sinaa yɛ,Ya bɛɛ I cho nda kɛɛ, a cho lɛ wa wanaa niaa soliaa lasala le.Le mɛɛ nya puɛɛnuŋ a sawala* Mɛlɛka nyaa yɛ,Ya bɛɛ I cho puɛɛnɔŋ a chuauwaa nyaa.
7 Mɛɛ nda hiau lachi a kuiyo fau, lende koni nda tosa hakioo a ya ni.
I cho tosa mi bɛɛle ndaleŋ le simnuŋ siɔmbulaŋ.*
8 O haki wanaa niaa tosa wo niŋ nda sɔla o diaa ni.Nduyɛ, a yeema mi waŋnda hiou lachi a hakilaŋ tosaa.
9 Nyɛ ya cho waŋnda tosal lo, ndu koni ya cho wanaa soliaa lasalaa tosal ni.I cho nda nyɛpalaa tusi choo le kaala ndalaŋ.Nduyɛ nyɛ o nyɛ nda tosa, a cho hunɔɔ paawaa* sɔla le ndu.
10 A wa niŋ nyɛdiaa dioo, kɛ a pim niŋ te.
A wa niŋ kaa suundɛi* suu o suu tosaa, kɛ a vilu niŋ ŋchuau le,Kanifuule, a chɔm lebɛɛ kposoŋ le Chɛhowa le.
11 Suundaa,* muɛima paanduaŋ a muɛima sɛnɛiyaŋ,Ma tosa a nɔ lɛ iyeema le o kɛndɔɔ tosaa le.*
12 Wanaa niaa nyuna piɔmaa ndaa iyɔmnda le nɛi chɔmaa,Ma wa tosaa nyɛ tinda ndaa* dimul nda le tosaa wo.Kanifuule, yeemɛi nda nɔ le suundaa* ve tosa ma mal nɛi nuu,Nduyɛ mi kaa nda suundɛiyo* tosa ma kɛɛ Mɛlɛka ndaa diikɔŋndo.
13 O pembuŋ bɛndoŋ choo nda kua salalaŋ solioo ni,Nduyɛ ma lom vɛlɛ salalaŋ o pembuŋ pɔmbɔŋ choo,O yɔmii oki ve bɛŋgu, yɔmii sitoluɛɛ ve, a o yɔm bɛndu kɛ kɛ bɛŋgu,Le mɛɛ i nɔ wunduma kɛndiaŋ yɛ.
Le saboo hoo chuaa nyaa laanduaa luɛi tiɔmɔɔ* ni,Nduyɛ mi laandaa puaa nyaa bɛɛ luɛi suundaa.
14 I tusi niŋ chuaa nyaa laanduaa nyɛpalaa choo le tiɔmɔɔ nda cho wo* le,Nduyɛ, I tusi niŋ laandaa puaa nyaa nyɛpalaa choo le suunda nda cho wo le.
Kanifuule puaa cho kɔlaŋ a waŋ laanduaa tiamaa latulu,Nduyɛ ma kua salalaŋ solioo a wanaa suundɛiya o maaŋndaŋ.*Wanaa nɔ haa sinapɛŋgu le wa cho hunɔɔ tambei sɔla.
15 Num Isɔluɛi, mi che bɛɛ a cho suundaa,*Kɛ maa Chuda tosa hakioo maa num te fɔ.
I yeema nya mi la kuɛ Kikaa ɔɔ Bɛti-aviŋ te,Nduyɛ, la mɛnaŋ a Chɛhowa Mɛlɛka cho yoomu wo le.
16 Waŋnda Isɔluɛi luɛi bolle kalaleŋ, mɛɛ nauwo luɛi nuaa bolle kalaleŋ yɛ.
Baa Chɛhowa cho pa hiouwɔɔ lachi a nda mandaa, mɛɛ nda manda nuaa saa fɔŋndɔɔ o fondaŋ bil kɛndɛ kɛndɔɔ yɛ?
17 Ifiluem muliŋ piɔmnda sooluuwo.
La mal ndu o ba ndɔɔ choo!
18 Te a chii pɛ muɛima ndaŋ* kolɔɔ,A muliŋ kaa suundɛiyo* tosaa.
Nduyɛ, wanaa cho Ifiluem chilaŋ* nda kaala bɔɔ sɔɔŋ lasiɔmboŋ tosaa.
19 Hueiye cho ndu simbu simbuu,* mi i kuɛŋnuŋ a ndu.Nduyɛ siɔmbulaŋ la cho nda biyɔɔ a salala ndalaŋ.”
Tɛɛsiaalaŋ
^ Ɔɔ “sɔla tambei.”
^ Ɔɔ “sɔla tambei.”
^ Ɔɔ “pɛɛkula.”
^ Ɔɔ naapum, “A tosa mi bɛɛle nileŋ le simnuŋ siɔmbulaŋ.”
^ Ɔɔ “salaa.”
^ Ɔɔ “kaa ihini nɔɔlɛi.”
^ Ɔɔ “kaa ihini nɔɔlɛiyo.”
^ Hibuluiiye “Faŋa nda kɔltaŋ.”
^ Ɔɔ “kaa ihini nɔɔlɛiyo.”
^ Ɔɔ “kaa nda ihini nɔɔlɛiyo.”
^ Ɔɔ “tinda wana viamaa yawaa.”
^ Ɔɔ “kaa ihini nɔɔlɛiyo tosaa le kaniei.”
^ Ɔɔ “kaa ihini nɔɔlɛi nda cho tosaa wo.”
^ Wanaa suundɛiya o maaŋndaŋ: Nda cho waŋ piaanduaa a waŋ laanduaa ndaa kei tiɔmɔɔ ndoo chiɛɛliaŋ a piɛile lachoowaleŋ ndo wa ni.
^ Ɔɔ “kaa ihini nɔɔlɛiyo.”
^ Ɔɔ “muɛima nda toosiaa a witiiyoŋ ndaŋ.”
^ Ɔɔ “kaa ihini nɔɔlɛiyo.”
^ Hibuluiye “boola chɔulaŋ.”
^ Ɔɔ “cho ndu basɔɔ.”
