Hoosiaa 5:1-15
-
Mɛlɛka kilul waŋnda Ifiluem a waŋnda Isɔluɛi yamɛi (1-15)
5 “Nya wanaa soliaa lasalaa, la tuei nyɛ ya cho dimioo wo.Nya waŋnda Isɔluɛi, la yaŋ nilaŋ.Nya wanaa fula o yuŋgu lemasaa choo wa bɛɛ, la yaŋ nilaŋ.Nyɛpalaa cho le nya,Kanifuule yaŋɔɔleŋ nya cho le waŋnda Misipa ni,Nduyɛ, mi la tuandu yalaa Tabɔɔ choo.
2 A cho nyaanɔŋ nda,* a cho nda diu tau tau.Nduyɛ, nda kpou I cho nda silaa.
3 I sina Ifiluem,Nduyɛ Isɔluɛi viŋnuŋ ya le.
Num Ifiluem, a yiŋnuŋ yikpi o kaa suundɛi* suu o suu niŋ.Isɔluɛi simnuŋ o nɔɔlɛi.
4 Sɔɔŋ nda tosa woŋ chɛl lɛ nda ma miiŋgu Mɛlɛka ndaa o ibuŋ te,Kanifuule, kaa suundɛiyo* cho nda o piaa cha o koowaŋ niŋ.Nduyɛ, a sina lɛ Chɛhowa le.
5 Kaa heelaŋ waŋnda Isɔluɛi chɔm kpendekele maa wanaa yɔŋ wɔɔŋnda nda cho ni.Haki waŋnda Isɔluɛi a o Ifiluem ndo tosa ma del,Nduyɛ mi Chuda bɛɛ del a nda latulu.
6 A chua chɔluaa ndaa ma kua Chɛhowa nuuviaa,Kɛ a seeluŋ ndu le,
Kanifuule o faŋaŋ nda kɔɔli.
7 A lo o buŋgɛi nda chuel Chɛhowa ve choo le,Kanifuule, a velu chuauwaa cho le ndu le wa.
O paŋgii pilɛ bɛŋgu, ndapila a nyɛm kɛŋ ndaŋ* kpou cho tambei sɔla.
8 La hɔŋ buloo Kibiya a Luama.
Num Bɛŋjamiŋ, sim puaa chɔuwa lachi mi la kɔ yonda le chɔuwo Bɛti-aviŋ!
9 Num Ifiluem, siooŋnde cho waŋnda kpou biyɔɔ, le nyɛpalaa cho num tolɔɔ choo wo.
I chii kaalaŋ Isɔluɛi dimul nyɛ nɔ le yɔŋnɔŋndo wo.
10 Waŋ banaa o Chuda niŋ cho ko maa wanaa hiau pɛŋgula lɛŋnde ndaleŋ nda.
I cho nda kɔl ni tuuwo hulɔɔ choo maa mamɛŋ.
11 Dɛnɛ palaa tol Ifiluem choo, nduyɛ o nɔ mbo sɔla tambei,Kanifuule o kɛɛsiaa mbo tual yaamɔɔnɔ ndɔɔ kɔɔli.
12 Mi simnuŋ maa dɛlu le Ifiluem.Nduyɛ, mi simnuŋ maa nyɛ siouwɛi le waŋnda Chuda.
13 Mɛɛ Ifiluem del a naa, nduyɛ mi pauwo del Chuda,Mi Ifiluem kua Asiiliaa, okoŋ mbo yooŋgu le masa bɛndoo.
Kɛ o nɔla mbo siŋgi naa Ifiluem ndo le,Nduyɛ o nɔla mbo chiɔu pau Chuda wo le.
14 I cho simnɔŋ maa kpɔkuŋ* fɔŋndɔ le Ifiluem,Nduyɛ, mi simnuŋ maa kpɔkuŋ dialuŋ kala le waŋnda Chuda.
Yapila cho nda sɛɛsiaa ni mi kuɛŋnuŋ.I cho lakɔŋnɔŋ a nda, nduyɛ wana o wana nɔla niŋ nda piŋi le.
15 I cho miiŋgɔŋ o fondaŋ nuu, mi lo loŋ haaa ma sɔla nyɛpalaa le hakila ndalaŋ.A cho chɔnɔŋ ma sim ya lachi* le mi mala nda.
Teleŋ nda cho koŋ wa o nyɛpalaa niŋndo, a cho ya nuuviaa.”
Tɛɛsiaalaŋ
^ Ɔɔ “Wanaa nila kaluaa.”
^ Ɔɔ “luei balaŋ o kaa ihini nɔɔlɛi.”
^ Ɔɔ “kaa ihini nɔɔlɛiyo.”
^ Ɔɔ “chiɔɔŋ ndaŋ.”
^ Ɔɔ “yalakana.”
^ Hibuluiye “o hɔl.”
