Hoosiaa 6:1-11
6 “La huŋ miŋ miiŋguŋ Chɛhowa o ibuŋ,Kanifuule ndu sɛɛsiaa naa ni, kɛ o cho naa chiɔu.
Ndu booluu naa ni, kɛ o cho pauvii nɛi yiu yiu.
2 Te palɛi i ŋiiŋ hiou pɛ, o cho naa miŋgi yoomuaŋ ke.
O paale yaa ndɔ leŋ choo, o cho naa miŋgi yoomu,Okoŋ, miŋ wa yoomu ndu o hɔl.
3 Ŋ cho Chɛhowa sina, ŋ cho kindiŋ kpoke le ndu sinaa.
Hunɔɔ ndɔɔ cho wa mɛɛ paaleŋ le fula nuaa idii yɛ.O cho hunɔɔ o naa lo mɛɛ piɔɔ sia nuaa yɛ,Mɛɛ mɛɛ piɔɔ lesiallo sia nuaa mbo pɔɔliaa lɛŋndeŋ kpou yɛ.”
4 “Yɛɛnɛ ya tosa yɛ a num Ifiluem?
Yɛɛnɛ ya tosa yɛ a num Chuda?
Kaala lo lechoo nyaa cho ko maa yumbu yumbu,O cho ko vɛlɛ maa mɔm nɛi kiolu le wo.
5 Le saboo hoo, I cho nda diu diu* sanaa a wanaa suaa le ya wa.I cho nda diu diu a diomnda cho ya wa fulaa o sondo laŋ.
Nduyɛ, yamɛi ya kilul nya niŋnde cho wa maa nyɛ teŋgaa.
6 Kanifuule, I yeema kaala lo lechoo wo* mbo hiau salalaŋ solioo.Nduyɛ, Mɛlɛka sinaa bɛnda mbo hiau salala luamaa laŋ.
7 Kɛ maa wanaa yɔŋ wɔɔŋnda, a tɛɛmbuu kpema ya yii a nda wo,
Nduyɛ ma kɛɛ le loo o buŋgɛi nda chuel la ve choo o lɛŋnde ndaleŋ niŋ.
8 Kiliaadi simnuŋ chiee wanaa dɛnɛ wɔɔŋnda.O cho o piaa cha a foofola kooma wanaa nda diu diu wa.
9 Wanaa soliaa lasalaa simnuŋ mɛɛ wanaa wɔɔŋnda viaŋnuŋ nuaa le waŋndo delɔɔ choo yɛ.
A cho waŋnda diuwo o nɛi kuɛ Siɛkɛm ndo.Kaa ndaa cho bɔɔ suɛi lasiɔmbu.
10 I che dɛnɛ wɔɔŋ waŋnda Isɔluɛi cho tosaa wo.
Loŋ Ifiluem cho kaa suundɛiyo tosaa ni,Nduyɛ mi Isɔluɛi simnuŋ o nɔɔlɛi.
11 Lelaŋ, num Chuda, teleŋndo kɛɛsiaŋ le num kouwɔɔ.I cho wanaa niaa kuɛ o biyɔɔ niŋnda miŋgi chuuŋgiaa naapilɛ.”
