Hoosiaa 7:1-16
7 “A teleŋ ya cho Isɔluɛi chiɔu wo,Haki Ifiluem ndo cho chɔmnɔŋ kpendekele,Nduyɛ mi dɛnɛ wɔɔŋ Sameeliaa wo bɛɛ chɔmnuŋ.
A cho hiouwɔɔ lachi a waŋnda huiyo,Ma luɛi chiɛila pilalaŋ niŋ ma chiimbuu nyɛm ndaŋ, nduyɛ ma del waŋnda choo o nɛilaŋ.
2 Kɛ a yiyaŋ bɛɛ pɛŋ maa dɛnɛ wɔɔŋ nda cho tosaa wo kpou, I cho ndu loonɔŋndo le.
Nyɛ o nyɛ wɔɔŋ nda cho tosaa, o cho nda o balaa silɔ.I cho ndu chɔɔ kpou.
3 Ma tosa mi masaa dɔɔnuŋ nyaale a dɛnɛ nda wɔɔŋndo,Nduyɛ, ma nɛŋi laŋgbaa ndaa kalla kɔllo a choola ndalaŋ.
4 Nda kpou wanaa suundɛiya nda cho ni.Mɛɛ wana luamaa beediiyo* kiisuu nuaa yiŋndeŋ o nyɛ luamaa beediiyo niŋ mbo tuulu yɛ, lende nda cho a tuu ni.O kiisuu pɛ, o muliŋ kpeyaŋndo lindaa nduyɛ o beeŋguu lɛ leŋ te haaa mbo chuu helɔɔ.
5 O paale kɔl kɛndɛle masa naa choo, laŋgbaa kalla cho delɔɔ a naa,Kanifuule, muɛiyaŋ ma cho tosa ma dɔɔnuŋ tumbe.
O tosa chaŋyɛi a wanaa mam ndu wa.
6 Kɔltaŋ nda la tuu kpɛi, mɛɛ fondaŋ luamaa beediiyo tuulu nuaa yɛ.
Ichɔl pii pii wana luamaa beediiyo waŋnuŋ o luaŋ.Nduyɛ te paaleŋ le sɛ pɛ, yiŋndeŋ le kinduŋ o fondaŋ luamaa beediiyo.
7 Nda kpou cho a tuu kpɛi maa fondaŋ luamaa beedii.A chii wanaa cho nda chilaŋ* nda diu kpou.
Nduyɛ masaa ndaa kpou del.Wana pilɛ bɛɛ nda tɛɛŋ nyuna ya le mala le.
8 Ifiluem muuliaŋ a kayii cheleŋnde.
Ifiluem cho ko maa kato nda kɛɛ mulioo wo.
9 Wanaa lekaawa poonda kpaaya ndɔɔ, kɛ o cho o sina choo le.
Yiiŋnde ndu o lebol simnuŋ yuluŋnde kpu, kɛ o cho pɛŋ bila biyɔɔ le.
10 Kaa heelaŋ waŋnda Isɔluɛi chɔm kpendekele maa wanaa yɔŋ wɔɔŋnda nda cho ni,Kɛ ma kɛɛ le Chɛhowa Mɛlɛka ndaa miiŋgoo o ibuŋ.A koŋ kpou, ma kɛɛ ndu nyunaa le malaa.
11 Ifiluem cho ko maa piiŋ diɔm nɛi hui le wo.*
A nyuna waŋnda Ichipi a haa Asiiliaa le nda malaa.
12 Ba o ba nda kɔ, I cho nda yala nuu wuu choo.
I cho nda tusi, mɛɛ nda tusi nuaa youwaa balu choo choo wa yɛ.
I cho nda nyɛpalaa tusi choo, a mɛɛ yaa dimul nda yɛ.
13 Kpundɔɔ cho le nda, kanifuule a mal la ma kuaŋnuŋ.
Tambei cho le nda, kanifuule a tosa hakioo a ya.
I wa o bɛɛndiaŋ le nda baŋaa, kɛ ma dimi choolaŋ a ya okɔɔ.
14 Mi che bɛɛ a wa koŋullo o kpelela ndalaŋ choo,Kɛ o ve a kɔlta ndalaŋ kpou le nda wa ya nyunaa le malaa le.
A cho dialuŋ ndaŋ tɛɛndiaa, le halikpeŋ ma sɔla kulloŋ a muɛima sɛnɛiyaŋ.Waŋnda haa simul la.
15 Mi che bɛɛ mi sila nda, nduyɛ mi luei nda yoomuaŋ,Kɛ ma simul la, ma hiau vɛlɛ lachi a sɔɔŋ wɔɔŋndoŋ tosaa.
16 A mal piɛile tonyaleŋ, ma muliŋ kɔlaŋ o nɛi cheleŋ ndo choo.*Ma simnuŋ wanaa fonduaa, kanifuule a wa ko mɛɛ chiɔuleŋ le yɔŋyɔla nuaa yɛ.
A cho hunɔɔ laŋgbaa ndaa kalla diu diu a muɛi faŋnde le sɔɔŋ wɔɔŋ fula nda o lasondo woŋ.
Le hei, waŋnda cho nda hunɔɔ mamɔɔ o lɛŋnde Ichipi leŋ niŋ.”
Tɛɛsiaalaŋ
^ Ɔɔ “buloo.”
^ Hibuluiye “wanaa kialaa ŋyamaa.”
^ Hibuluiye, “nɔ kɔl niŋ te wo.”
^ Koŋ cho ni, piɛile lachoowaleŋ.
