Hoosiaa 9:1-17
9 “Nya waŋnda Isɔluɛi, la duaunuŋ nyaale le.La duaunuŋ nyaale maa waŋnda a piliaa le,
Kanifuule suundaa* tosa mi la faŋaŋ Mɛlɛka nyaa o ibuŋ.
La kaala paawa* nya sɔla o suundaa niŋ o yasaba luaa ŋkullo wo.
2 Isɔluɛiya sɔla lɛ niŋ o diaa o yasaba luaa ŋkullo, a o doolala mamuɛi niŋ te,Nduyɛ a sɔla niŋ muɛima sɛnɛi le.
3 Waŋnda Isɔluɛi cho lɛ hiouwɔɔ lachi a waa o lɛŋnde Chɛhowa leŋ niŋ te.Kɛ, Ifiluem cho miiŋgu Ichipi,Nduyɛ, a cho wa nyɛ nɔɔlɛiyo dioo o Asiiliaa niŋ.
4 Waŋnda Isɔluɛi cho lɛ wa salala mamuɛilaŋ soli o Chɛhowa lo le,Kanifuule la nɛŋi ndu kɔl te.
Salala ndalaŋ la cho ko maa nyɛdiaa* biisi.Wanaa cho ndu dioo wa kpou cho simnɔŋ a nɔɔlɛi,
Kanifuule nyɛdiaa hoo le ndapila kinɛi o cho ni.A nɔ ma luei ndu o chiɛi Chɛhowa wo niŋ te.
5 Yɛɛnɛ nya cho yɛ tosa o paale nya bii niŋ bɔŋaŋndo* leŋ choo,Paale nya cho bɔŋaŋndo biyɔɔ le Chɛhowa leŋ?
6 A cho nyaanɔŋ le tambii nda nɔ le sɔlaa ve.
Ichipi cho nda chuuŋgiaa naapilɛ, nduyɛ mi Mɛmfisi kumbu nda.
Bil ŋyɔɔ cho nyɛm ndaŋ sɔvɛ nda toosiaa a kaniŋ humboŋ ndoŋ kumbɔɔ kpu,Nduyɛ mi yɔɔŋ tiu o tɛndiila ndalaŋ niŋ kpou.
7 Palɛi nya duaunuŋ niŋ kona ve i cho fuuluu.Palɛi nyɛpalaa tual niŋ nya choo ve i cho fuuluu,Nduyɛ waŋnda Isɔluɛi cho ndi sina.
Wana nda suaa le Mɛlɛka wo cho simnɔŋ diɔmndo, nduyɛ mi wana sɔla yooŋgulaŋ Mɛlɛka o ba wo seema.Le hei, I bii num tɔɔyaŋ tau, kanifuule yɔŋ num wɔɔŋndo cho bɔɔ.”
8 Wana mɛŋgɛlaa Ifiluem ndo wa a Mɛlɛka nuu latulu.
Kɛ nɛila wanaa suaa le ndu wa kpou, la cho ko maa yaŋɔɔla doosunɔ youwa.Yaamɔɔleŋ le cho o chiɛi Mɛlɛka ndɔɔ niŋ.
9 Isɔluɛiya yiŋnuŋ yikpi o yɔŋ wɔɔŋndo niŋ, mɛɛ waŋnda Kibiya ndaa tosa teleŋ koŋ yɛ.
O cho yɔŋ nda wɔɔŋndo loonɔŋ, nduyɛ mbo tusi nda nyɛpalaa choo le hakila ndalaŋ.
10 “Mɛɛ wana saaluŋ nuaa kilepiiyaŋ o pollo niŋ yɛ, lende ya saaluŋ waŋnda Isɔluɛi ni.
Mɛɛ wana cha nuaa fikiima diuwaa ma tasiaŋ o yɔm mafikiiyo choo yɛ, lende yaa che finyaa nyaa mamaa ni.
Kɛ, ma tualnuŋ Baal cho Piɔɔ wo kɔɔli,Ma yɔŋguŋ o nyɛ lasiɔmboo* loNduyɛ ma simnuŋ nyɛ wɔɔŋ wɔɔŋ, maa nyɛ nda kaala koŋ ndo.
11 Tɔɔ kɛndɛ Ifiluem ndo kuɛŋnuŋ maa you.Wana lanɔ kɛ kɛ vilu lɛ niŋ te, foli* kilaŋ lɛ niŋ ndu le, kɛlɛŋgaa niŋ te mbo chua folioo.
12 O yɔŋ bɛɛ mi ndaa nɔ niŋ paandu chuauwa,I cho nda chuauwaa kaŋ poondiaa o ba, o pilɛ bɛɛ lo le.A tonya, kpundɔɔ cho wa le nda te I faŋa nda pɛ ba nuu choo!
13 Ifiluem wa ko ya o hɔl maa Taaya, teleŋ o wa o fondaŋ bil kɛndɛ kɛndɔɔ wo.Ifiluem nɔ mbo soli chuauwaa nduaa le ma diu diu nda.”
14 Oo Chɛhowa, ke nda nyɛ ŋ nɔ le nda kioo wo.Tosa ma simnuŋ wanaa viikaa, nduyɛ ma veesiaa nda mɛɛyaŋ.
15 “Dɛnɛ wɔɔŋ ndaa kpou, o Kikaa niŋ nda wa ndu tosaa ni, nduyɛ loŋ ya tul nda leyɛ ni.
I cho nda soli o ya lo chiɛiniŋ le sɔɔŋ ndaŋ wɔɔŋndoŋ.
I cho lɛ nɔ kaala kposoŋ le nda le,Kanifuule laŋgbaa ndaa kalla kpou simnuŋ wanaa nila kalu.
16 Ifiluem cho kioŋndo sɔla.
Puunduŋ ndɔŋ cho vesa sɛɛŋ, o kum lɛ le.
O yɔŋ bɛɛ ma velu, I cho chuauwaa ndaa kaalaa kaŋ diu diu.”
17 Mɛlɛka nuu cho nda kɛɛ,Kanifuule a tui ndu diom te.Nduyɛ, a cho simnɔŋ wanaa kelaŋ nda o lɛŋnde niŋ.
Tɛɛsiaalaŋ
^ Ɔɔ “kaa ihini nɔɔlɛiyo.”
^ Ɔɔ “Sala.”
^ Hibuluiye “beediiyo” ɔɔ “buloo.”
^ Ɔɔ “tosa dunyɛi.”
^ Ɔɔ “mɛlɛka lasiɔmboo.”
^ Ɔɔ “yol.”
