Ikilisiaati 10:1-20
10 Mɛɛ peŋgiaa vilɛiya tosa nuaa mi chuɛima chuŋ kɛndiaŋ ma tambu, nduyɛ mi ma fula chuŋ wɔɔŋndo yɛ, lende koni diɔmii taaniŋnde tosa ni mi taasi waŋndo a bɛɛle ndɔleŋ le tambu.
2 Mi kɔl wana taasioo yɛɛ ndu o nɛi kɛndɔɔ choo,* kɛ diɔmndo ndu, o nɛi wɔɔŋndo* choo kɔl ndɔɔ yaa ndu ni.
3 Nɛi o nɛi diɔmndo kuɛ pɛ choo, o nɔ kɔl kalu le, nduyɛ mbo tosa mi wana o wana sina maa diɔmndo o cho ni.
4 Te masaa tuulu kɔl a num pɛ, faŋaŋ o fondaŋ numndo le. Kanifuule, kaa mɔɔsɔlɔɔ wo tosa ma fafaŋ luɛiyɔɔ o hakila bɛndulaŋ niŋ.
5 Mi cha vɛlɛ suɛi kɔl tambɛi cheleŋ o chieeŋndo choo, ndi cho yɛ biondɔŋnda wanaa cho o kpaayaa choo wa tosa laŋ ni.
6 Diɔmnda cho o foofola filioŋnda bɔɔbɔɔ, kɛ mi wanaa kɔl kaluaa* wa o foofola pɔmbɔlaŋ.
7 I che niŋ buɛiya kɔlaŋ o suaa choo, kɛ mi waŋ banaa wa kɔlaŋ a ŋpelu naŋ chaa buɛiya ni.
8 Wana o wana tou pɛ sooŋndo, ndupila cho delɔɔ leniŋ. Nduyɛ wana o wana buli pɛ tɛɛŋgei o kpakioo, kɛuwo tiuba mbo lɔwa ndu.
9 Wana kala poutaŋ ndo, pouwo tiuba mbo yɔŋul ndu. Nduyɛ wana tɛɛndiaa yɔmnde wo, yɔmndo tiuba mbo yɔŋul ndu.*
10 Te chuei bumbula pɛ ma chiɛɛŋa ndi le, mɛɛ ma dɔu yoomuaŋ tau le wallo a ndi. Kɛ taasioo mala le ma sɔla batiuwaa.
11 Te kɛuwo lɔwa pɛ waŋndo tuupa mi wana nɔ ndu kpaayaa choo wo dɔu ndu o mandaa bɛŋgu, mɛɛ tɔnɔ o tɔnɔ cho le wana nɔ ndu kpaayaa choo wo le.*
12 Diomnda fula wana taasioo o sondo laŋ, mi la nɛŋi wana kɔllo. Kɛ diomnda fula diɔmndo o sondo laŋ, laŋ la tɛɛmbuu ndu ni.
13 Diomnda tasela fula ndu o sondo laŋ, diɔmnde kposoŋ la wa ni. Nduyɛ sɔɔŋ seemɛi huŋ a kpundɔɔ woŋ mɛɛlu ndu fula o sondo ni.
14 Kɛ mi diɔmndo hiou lachi a suɛi tuŋ.
Wanachioo sina nyɛ cho yɔŋnɔŋ o chilaŋ niŋndo le. Nɛɛnɛ nɔla yɛ mbo dimul ndu nyɛ cho yɔŋnɔŋndo te o vi pɛ?
15 Wali kala kala diɔmndo tosa wo mbo yɔɔkpiaa ndu, o nɔla pɛŋ mbo saaluŋ nɛiyo le kɔlaŋ o chiee bɛndoo niŋ te.
16 Kpundɔɔ pila i wa le lɛŋndeŋ ni te masaa wa pɛ poombɔɔ, okoŋ mi laŋgbaa kalla kandu dunyaŋ ndaŋ tosaa idii!
17 Kɔl kɛndɔɔ wa bɔɔ o lɛŋndeŋ niŋ, te po laŋunɔ kalaa simnuŋ pɛ masaa. Mi laŋgbaa kalla de nyɛdiaa a teleŋ o bɛnda ma de ndu wo, le ma sɔla yoomuaŋ. Kɛ o cho le ma yiŋnuŋ o kolɔɔ bɛndoo niŋ te!
18 Te waŋndo hiu pɛ siɛlɛiye, yɔmii cho o yindɔ chiɛi ndɔɔ ve cho delɔɔ. Nduyɛ te o tosa nyɛ o nyɛ le, mɛŋndaŋ ma cho kei o yindɔ koŋ mi ma luɛi o ndu lo chiɛiniŋ.
19 Mi nyɛdiaa* tosa mi waŋndo mam, nduyɛ mi muɛiyaŋ ma tosa mi waŋndo tuei yoomoo yeela. Kɛ kaniei* soli bahawɛi kɛ kɛ ni.
20 O yiyaŋ numndo niŋ bɛɛ,* mɛna masaa le.* Nduyɛ wa bɛɛ o kpele numndo choo, mɛna wana sulaa le. Kanifuule, youwo* nɔla mbo tuei nyɛ ŋ dimi wo, ɔɔ nyɛ labɔɔ cheleŋ Mɛlɛka toosiaa wo nɔla mbo kɔ miŋgi sondo o nyɛ ŋ dimi wo choo.
Tɛɛsiaalaŋ
^ Hibuluiye, “o ba ndɔ kɛndɔɔ choo.”
^ Hibuluiye, “o ba ndɔ miallo choo.”
^ Hibuluiye, “wanaa sulaa.”
^ Ɔɔ naapum, “o nɔ mbo wa yekeŋ.”
^ Hibuluiye, “wana duau diɔɔmule kɛu koŋ o mandaa bɛŋgu wo le.”
^ Hibuluiye, “beediiyo ɔɔ buloo.”
^ Ɔɔ “woliei.”
^ Ɔɔ naapum, “O kpele numndo choo bɛɛ.”
^ Ɔɔ “handu masaa sendioo choo le.”
^ Hibuluiye, “nyɛ yoomaa balu o choo choo niŋndo.”
