Ikilisiaati 3:1-22
3 Teleŋndo cho le nyɛ o nyɛ fee.Nduyɛ nyɛ o nyɛ tosaŋ o chieeŋndo choo, teleŋndo cho le ndu.
2 Teleŋndo cho le violɔŋndo, nduyɛ teleŋndo cho le piɔmndo.Teleŋndo cho le tɔlɔɔ, nduyɛ teleŋndo cho le suŋgɔɔ.
3 Teleŋndo cho le diyɔɔ, nduyɛ teleŋndo cho le siŋgioo.Teleŋndo cho le piɔlɔɔ, nduyɛ teleŋndo cho le taŋgullo.
4 Teleŋndo cho le chaŋndo, nduyɛ teleŋndo cho le mamɔɔ.Teleŋndo cho le mɔnɛi biyɔɔ, nduyɛ teleŋndo cho le yolaŋ.*
5 Teleŋndo cho le poutaŋ vii viiyo, nduyɛ teleŋndo cho le laŋ diyɔɔ naapilɛ.Teleŋndo cho le demulaŋndo, nduyɛ teleŋndo cho le kiɔɔ demulaŋndo.
6 Teleŋndo cho le nuuviaa, nduyɛ teleŋndo cho le mi nyɔɔ lo.Teleŋndo cho le kɛsioo, nduyɛ teleŋndo cho le viouwɔɔ.
7 Teleŋndo cho le sɛɛsaa, nduyɛ teleŋndo cho le sɔndɔɔ.Teleŋndo cho le meiyo, nduyɛ teleŋndo cho le suɛi.
8 Teleŋndo cho le kaalaa, nduyɛ teleŋndo cho le yɛleŋ tullo.Teleŋndo cho le chɔuwo, nduyɛ teleŋndo cho le kɔl nyuloo.
9 Tɔnɔ yɛɛ wana wallo sɔla yɛ o saŋga ndɔɔ niŋ kpou?
10 I che niŋ walta Mɛlɛka ke waŋnda chieeya le tosaa laŋ, le halikpeŋ ma wa a tuandaŋ o laŋ niŋ.
11 Mɛlɛka toosiaa nyɛ o nyɛ fee o kɛndɛ kɛndɛ* a teleŋ ndɔɔ. Nduyɛ, mbo duau nda o kɔl le ma wa yoomu le fɛɛŋ a fɛɛŋ. Kɛ a koŋ kpou, waŋnda chieeya nɔla ma chii sina walta Mɛlɛka tonyaa tosa chɔŋ o kandɔŋndo haaa o mɛɛlulaŋ ndo le.
12 Mi mɛɛlu sina maa nyɛ bɛnda le nda wo cho waa a kɔl kɛndɛ ni, nduyɛ ma tosa sɔɔŋ kɛndɔŋ teleŋ nda cho yoomu wo.
13 Nduyɛ mi cha vɛlɛ maa wana o wana nɔ mbo de, mbo kol, nduyɛ mbo de saŋga ndɔɔ kpou tɔnɔ. Ke fula Mɛlɛka o ba wo o cho ni.
14 Nduyɛ mi sina vɛlɛ maa nyɛ o nyɛ Mɛlɛka tonyaa toosiaa, o cho wa le fɛɛŋ a fɛɛŋ. Nyɛ o nyɛ Mɛlɛka toosiaa, wana hendu lechoo le nduyɛ wana feŋa lechoo le. Mɛlɛka tonyaa toosiaa nyɔɔŋ muŋ o nɛiyo hoo choo le mi waŋnda chieeya nɔ siooŋnde le ndu.
15 Nyɛ o nyɛ cho yɔŋnɔŋndo, o yɔŋnuŋ niŋ paandu. Nduyɛ nyɛ nɔ le yɔŋnɔŋndo wo bɛɛ, o yɔŋnuŋ niŋ. Kɛ wanaa nda tusi nyɛpalaa choo wa, mi Mɛlɛka tonyaa nuuviaa sɔɔŋ kɛndɔŋ nda o ŋdial.
16 I che niŋ vɛlɛ sɔɔŋ muŋ yɔŋnɔŋndo o chieeŋndo choo: Naa sandei nɔ mi i wa wa, ma miŋgi dɛnɛ wɔɔŋndo loŋ. Nduyɛ, ma miŋgi dɛnɛ wɔɔŋndo naa sakpoyɛi nɔ mi i wa wa.
17 Le hei, mi dimi o kɔl niŋ aa: “Mɛlɛka tonyaa cho wanaa sakpuaa a wanaa dɛnɛ wɔɔŋnda yamɛi kilul. Kanifuule, teleŋndo cho le mi nyɛ o nyɛ yɔŋnuŋ.”
18 Mi dimi o kɔl niŋ a waŋnda chieeya okɔɔ maa, Mɛlɛka tonyaa cho nda tofa le nda chɔmndo maa mɛɛ visiaa cho yɛ koni nda bɛɛ cho ni.
19 Kanifuule wanachioo a visioo te a vi pɛ, fulamakɔɔli pilɔɔ kpe nda sɔla ni. Mɛɛ waŋnda chieeya wu yɛ, lende koni visiaa bɛɛ wu ni. Nduyɛ, yoomu pilɔɔ kpe nda kpou nɔ ni. Lelaŋ, wanachioo cho o sɔvɛ mbo hiau visioo le. Nda kpou, nyɛ fondoo fuu nda cho ni.
20 Nda kpou, fondaŋ pilɔɔ kpe nda cho kɔlaŋ ni. O puuloo niŋ nda fula ni, nduyɛ o puuloo niŋ nda cho miiŋgu ni.
21 Nɛɛ kpeekpei sina yɛ te o choo choo niŋ yoomu wanachioo kua ni, nduyɛ mi yoomu visioo tol o lɛŋndeŋ bɛŋgu?
22 Nduyɛ, mi saaluŋ maa nyɛ kinɛi bɛnda le wanachioo wo cho saŋga ndɔɔ dioo tɔnɔ ni. Paawa* ndɔɔ cho koŋ ni. Kanifuule te o vi pɛ, nɛɛnɛ nɔla yɛ mbo chɔm ndu nyɛ cho koma yɔŋnɔŋ ndu kɔɔli wo?
