Ikilisiaati 9:1-18
9 Mɛɛ ya yiyaŋ o sɔɔŋ muŋ choo kpou, mi mɛɛlu sina maa wana sakpo ni, wana taasi ni, vɛlɛ a walta nda tosa laŋ kpou, la cho Mɛlɛka tonyaa o ba. Waŋnda chieeya sina mɛɛ kpɛ kaalaa a yɛletulaaleŋ le wa tuupa ma vialuŋ yɛ le.
2 Wana sakpo ni, wana dɛnɛ wɔɔŋ ni, wana kɛndɛ ni, wana diandaa ni, wana dindu le wo ni, wana soli salaa wo ni, wana soli sala le wo ni, nda kpou mɛɛlula pilɛlaŋ kpe nda nɔ ni.* Mɛɛ wana kɛndɔɔ mɛɛlu yɛ koni wana dɛnɛ wɔɔŋndo bɛɛ mɛɛlu ni. Nduyɛ, mɛɛ wana chua buŋgɛi yo mɛɛlu yɛ koni wana nɔ siooŋnde le buŋgɛi chuaa wo bɛɛ mɛɛlu ni.
3 Suɛi kɔl tambɛi yɔŋnuŋ o chieeŋndo choo ve cho hei ni: Le mɛɛ waŋnda chieeya kpou nɔ mɛɛlula pilɛlaŋ yɛ,* dɛnɛ wɔɔŋndo cho nda o piaa o lakɔl cha. Seemaa nda o piaa o lakɔl cha boondii nda cho yoomu ve, okoŋ kɔɔli ma viŋnuŋ!
4 Tiindaŋndo cho le wanaa cho yoomu wa, kanifuule tuŋ cho yoomu wo bɛnda mbo hiau kpɔkuŋ* vi wo.
5 Wanaa cho yoomu wa sina maa a cho wu, kɛ wanaa vi niŋnda sina nyɛ o nyɛ le, nduyɛ a nɔ lɛ tɔnɔ o tɔnɔ le. Kanifuule, wana o wana loonuŋ ndɛ a nda okɔɔ le.
6 Nduyɛ kaala ndaa, yɛle ndale tulaaleŋ, a paŋala ndaa bɛɛ kpou tambu. A nɔla lɛ nyɛ o nyɛ tosa o chieeŋndo choo le.
7 Lelaŋ kɔ dio nyɛdiaa numndo a nyaale, ma kol muɛima numndaŋ a kɔl kɛndɛ. Kanifuule, Mɛlɛka tonyaa hini kɔl a walta numndaŋ.
8 Maa nyɛ chuɛɛnaŋ numndo wa teleŋ o teleŋ o humbu fo.* Nduyɛ, puɛɛnuŋ le chuɛiyaŋ suiiŋndo o lebol te.
9 Tuei palɛi yoomu num fondo fuu ve kpou yeela nya laa num kaalaa latulu, palɛi yoomu fondo Mɛlɛka ke num o chieeŋndo choo ve. Tɔnɔ ŋ sɔla o yoomu numndo niŋ le wali kala kala ŋ tosa o chieeŋndo choo wo cho koŋ ni.
10 Nyɛ o nyɛ ba numndo nɔla pɛ tosaa, tosa ndu a kpaaya numndo kpou. Kanifuule naa ŋ cho kɔlaŋ o Sɛiyo* niŋnda, wali cho loŋ te, kɛɛsiaa cho loŋ te, kɔl kalu cho loŋ te, nduyɛ taasi cho loŋ te.
11 Mi cha vɛlɛ suɛi cheleŋ o chieeŋndo choo, ndi cho ni maa, wana nyaanuŋ nyaanɔŋ bɛndoo wo, o ve ko wana tasoo o kiltaŋ niŋ te. Wana nɔ kpaayaa wo yim ko chɔuwo le. Wana nɔ taasioo wo sɔla ko nyɛdiaa le dioo le. Wana dɛnɛ sinaa sɔla ko sullo le. Nduyɛ wanaa kɔl kaluaa sɔla ko batiuwaa le. Kanifuule, mi sɔɔŋ nda ve kɔl te woŋ yɔŋnuŋ nda kpou a teleŋ nda ve kɔl te wo.
12 Wanachioo sina teleŋ ndɔɔ le. Mɛɛ suuwa hau nuaa o yala yɔɔyaa, nduyɛ mi youwa hau o yaŋɔɔleŋ yɛ, lende chuauwaa ŋwaŋnda chiee hau a teleŋ kpundɔɔ ni, te o komal nda pɛ o lepilɛ niŋ kpe.
13 Nyɛ cheleŋ ya che vɛlɛ a taasioo okɔɔ o chieeŋndo choo mbo bii ya kɔndɔfili wo cho hoo ni:
14 Chiee pɔmbɔɔ pum wa, ndoo nɔ wanaa bɔɔ leniŋ te. Okoŋ, mi masa kpaaya bɛndoo huŋ le ndu chiŋalaŋndo a sɔŋgɔɔ. Mbo taŋgul kpakila kala kalalaŋ le ndu dɔwɔɔ o piŋndo niŋ.
15 Wana bala fondo pilɛ wa o chioo hoo niŋ, taasioo pila ndoo nɔ ni. Nduyɛ, mbo piŋi chioo hoo a taasi ndɔɔ. Kɛ wana o wana loonuŋ a wana bala fondo koŋ okɔɔ le.
16 Okoŋ mi dimuluŋ aa: ‘Taasioo bɛnda mbo hiau kpaaya bɛndoo. Kɛ a koŋ kpou, ma pɛɛsa taasi wana bala fondoo. A chue nyɛ o dimi wo o sɔvɛ le.’
17 O bɛnda mi wana yaŋ nilaŋ o diomnda wana taasioo dimi o bɛɛŋ bɛɛŋ ndo niŋndaŋ, mbo hiau deŋi wana cho masaa diɔmnda choo wo.
18 Taasioo bɛnda mbo hiau nyɛm chɔuwoŋ, kɛ wana dɛnɛ wɔɔŋndo o pilɛ kpe, o nɔla mbo tɛɛmbuu nyɛm kɛndɛŋ bɔɔbɔɔ.
Tɛɛsiaalaŋ
^ Ɔɔ “nyɛ pilɔɔ kpe yɔŋnuŋ nda ni.”
^ Ɔɔ “nyɛpilɔɔ yɔŋnuŋ nda yɛ.”
^ Ɔɔ “yalakana.”
^ Koŋ cho ni, nyɛ chuɛɛnaŋ kɛndɛ kɛndɛ chɔm maa a cho a kɔl kɛndɛ wo, o cho nyɛla imɔnɔ le.
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
