Isikiɛɛ 1:1-28
1 O wɔsii 30 niŋ, paŋgii hiɔɔluei malɔ le ŋuɛɛnu, I wa wanaa nda bii le kɔlaŋ o chɛleŋ niŋnda tɛɛŋ o pioo Kiba ikɛi, mi choo choo kumbiŋ, okoŋ mi kandu yilaŋuŋ Mɛlɛkaŋ chɔɔ.
2 O paale ŋuɛɛnu leŋ choo o paŋgii keŋ niŋ, koŋ cho ni, wɔsi ŋuɛɛnu ndɔ Masaa Chɛhowakiŋ wa o biyɔɔ niŋndo,
3 mi Chɛhowa suaa o Isikiɛɛ* lo po Busai yo, wana soliaa lasalaa, o pioo Kiba ikɛi o lɛŋnde Kaadiaŋnda niŋ. Loŋ kpaaya Chɛhowa wo tol ndu choo ni.
4 Mɛɛ ya chua hɔlla, mi cha hueiyii bɛndu bɛnduei chɔnɔŋndo ba luaŋ ndo. Paŋgele bɛndoo wa yumbu yumbu ikpuŋgbaa a nyɛ ŋualalɛi ŋualalɛiyo o balaa silɔ. Nduyɛ o nyɛ ŋualalɛi ŋualalɛi koŋ tɛɛŋ, nyɔɔ wa ŋɛlɛŋgi ŋɛlɛŋgi naŋ chaa kooliiye a kanii humbuei ni.
5 Nyaa yoomaa a hiɔɔlu wa o nyɛ ŋualalɛi ŋualalɛiyo hoo tɛɛŋ, nduyɛ o kɛ kɛ wanaa che ndu pɛ aa wanachioo ni.
6 O kɛ kɛ ndoo nɔ hɔlla a hiɔɔlu a kumbaŋndaŋ la hiɔɔlu.
7 Peloŋ wa nda sakpo, nduyɛ peloŋ wa nda naŋ chaa buukula nauwo ni. A wa ŋɛlɛŋgi ŋɛlɛŋgi naŋ chaa chiliŋii siaŋɛi* nda teeŋgiaa ve ni.
8 O kumbaŋnda ndalaŋ bɛŋgu, ndaa nɔ bala wanachioo o kpeŋguŋ hiɔɔloŋ kpou. Nduyɛ nda hiɔɔlu kpou, ndaa nɔ hɔlla a kumbaŋndaŋ.
9 O kɛ kɛ, kumbaŋnda ndɔlaŋ la wa kumbaŋnda chaaŋ ndɔ laŋ pilaŋndo. Te a wa pɛ kɔlaŋ, a muliŋ te. O kɛ kɛ kɔlaŋ lachi sakpo.
10 Nyaa yoomaa hiɔɔluaa haa, mɛɛ o kɛ kɛ ndoo nɔ hɔlla yɛ cho hoo ni: Hɔlaa wanachioo a hɔlaa kpɔkuŋndo* kpeŋgii ba kɛndɛi, a hɔlaa nauwo kpeŋgii ba mialle. Nduyɛ, o kɛ kɛ ndoo nɔ hɔlaa kowɔɔ.
11 Lende hɔlaa ndaa wa ni. Kumbaŋnda ndalaŋ la wa la pɛɛŋgaa nda choo. O kɛ kɛ ndoo nɔ kumbaŋndaŋ la tiɔɔŋ la bɔŋaa choo choo, a kumbaŋndaŋ la tiɔɔŋ le dialuŋ ndɔŋ kumbɔɔ.
12 O kɛ kɛ kɔlaŋ lachi sakpo. Ba o ba nyina Mɛlɛkaa ndoo yeema nda pɛ ma kuɛ, loŋ ndaa kua ni. Te a wa pɛ kɔlaŋ, a muliŋ te.
13 Nyaa yoomaa haa, wanaa che nda pɛ aa dɛŋgultaŋ ni. Nyɔɔ wa hiŋnɔŋndo nda tɛɛŋ maa latɛŋgɛ tɛŋgɛ, nduyɛ mi nyɛ ŋualalɛi ŋualalɛiyo wa kioloo o yiŋnde leŋ niŋ.
14 Te nyaa yoomaa haa ndaa wa pɛ kɔlaŋ a miiŋgoo, mi nyɔɔ wa kioloo naŋ chaa nyɛ ŋualalɛi ŋualalɛiyo ni.
15 Mɛɛ ya wa nyaa yoomaa haa tofaa, mi cha kandoo o lɛŋndeŋ choo nyɛ yoomaa kɛ kɛ ikɛi, a ndaa nɔ haa hɔlla a hiɔɔlu wa.
16 Kandula hiɔɔlu laŋ ndaŋ la wa wolioo naŋ chaa pou kilisoluɛi yo, nduyɛ velaŋndo pila laa velaŋ ni. Mɛɛ o kɛ kɛ wa yɛ, wanaa che ndu pɛ aa kandu cheleŋ cho o kandoo niŋ ni.
17 Kandulaŋ ndaŋ la tiuba mi la kuɛ o kpeŋguŋ hiɔɔloŋ i kɛ kɛ choo. Nduyɛ te la wa pɛ kɔlaŋ, la muliŋ te.
18 Chiliŋuŋ wa kandulaŋ ndaŋ tɛɛŋ ndoŋ wa choŋjoloŋ. Nduyɛ wanaa che muŋ pɛ, siooŋnde bii num. Chiliŋuŋ kandula hiɔɔlu laŋ ndaŋ kpou, muŋ nɔ hɔltaŋ la balaa silɔ.
19 Ba o ba nyaa yoomaa haa ndaa wa pɛ kɔlaŋ, kandulaŋ ndaŋ bɛɛ laa kuɛ a nda latulu. Nduyɛ te a heelu pɛ nyaa yoomaa haa choo choo, kandulaŋ bɛɛ la chɛŋ.
20 Nyaa yoomaa haa, ba o ba nyina Mɛlɛkaa ndoo yeema nda pɛ ma kuɛ, loŋ ndaa kua ni. Mi kandulaŋ ndaŋ la hel choo choo a nyaa yoomaa haa latulu. Kanifuule, nyina Mɛlɛka wa wallo a nyaa yoomaa haa wo wa wallo a kandulaŋ ndaŋ ni.
21 Te nyaa yoomaa kuɛ pɛ, kandulaŋ bɛɛ la kuɛ. Nduyɛ te a sim pɛ, kandulaŋ bɛɛ la sim. Te a heelu nda pɛ choo choo, kandulaŋ bɛɛ la hel a nda latulu. Kanifuule, nyina Mɛlɛka wa wallo a nyaa yoomaa haa wo wa wallo a kandulaŋ ndaŋ ni.
22 Nyɔɔ wa o pɛŋgɛlaŋ nyaa yoomaa haa choo o kuaŋnaŋ kɛ kɛ. Nduyɛ wanaa che ndu iŋɛlɛŋgi ŋɛlɛŋgiei pɛ, naŋ chaa mɛŋma ikpuŋgbaŋ ni.
23 Nyaa yoomaa haa wa o nyɛ pɛŋgɛlaŋ koŋ ndo bɛŋgu ma siɛndi kumbaŋnda ndalaŋ sakpo, mi o kɛ kɛ pilaŋ chaaŋ ndɔ. O kɛ kɛ ndoo nɔ kumbaŋndaŋ la tiɔɔŋ le dialuŋ ndɔŋ kumbɔɔ kpeŋgei i pilɛ, a kumbaŋndaŋ la tiɔɔŋ le ndu kumbɔɔ kpeŋgei i pilɛi.
24 Mi tuɛi bɔɔluu kumbaŋnda ndalaŋ naŋ chaa bal bɛndoo cho hiouwɔɔ ni, nduyɛ naŋ chaa diom Mɛlɛka Kpaaya Kpou Kpou Wo ni. Te a wa pɛ kɔlaŋ, wana cha ko bɛɛ aa bɔɔluu puaa chɔuwa ni. Te a sim pɛ, a tusi kumbaŋnda ndalaŋ.
25 Diomndo wa fulaa lekɔɔli, o nyɛ wa nda koŋ o pɛŋgɛlaŋ choo wo. (Te a sim pɛ, a tusi kumbaŋnda ndalaŋ.)
26 Nyɔɔ wa o nyɛ wa nda koŋ o pɛŋgɛlaŋ choo wo choo, naŋ chaa pou safaluɛɛ wo ni. Nduyɛ, wanaa che ndu pɛ aa kpeŋgbei* lemasaa ni. Nyɔɔ wa ichali o kpeŋgbei lemasaa hoo choo, wanaa che ndu pɛ aa wanachioo ni.
27 Nduyɛ nyɔɔ hoo chɔŋ pɛŋgu chaŋnda hel luaŋ, o wa ŋɛlɛŋgi ŋɛlɛŋgi naŋ chaa kooliiye a kanii humbuei ni. Nduyɛ chɔŋ o chaŋnda tol amatou, mi cha nyɔɔ o velaŋ a yiŋndeŋ ndo. Paŋgeloo wa ndu o balaa silɔ,
28 mɛɛ mɛɛ niŋginaŋgaa hini nuaa yɛ te piɔɔ wa pɛ siaa. Lende paŋgele ndoo balu ndu silɔ wo wa ni. Paŋgeloo hoo wa ko maa naŋɔɔ bɛndu Chɛhowa wo. Mɛɛ ya che paŋgeloo hoo, mi baŋ wulaŋ, mi fuuluu hɔlla lɛŋ. Okoŋ, mi tuɛi waŋndo suɛi.
Tɛɛsiaalaŋ
^ Diolaŋ ndaŋ la sim, “Mɛlɛka Luei Yoomuaŋ Ni.”
^ Ɔɔ “kapaa.”
^ Ɔɔ “yalakanaa.”
^ Ɔɔ “kpɛŋɛ.”
