Isikiɛɛ 10:1-22
10 I wa tofaa, mi cha nyɔɔ o pɛŋgɛlaŋ chɛlɔbiiya choo naŋ chaa pou safaluɛɛ wo ni. Wanaa che ndu pɛ aa kpeŋgbei* lemasaa ni.
2 Okoŋ mi tuɛi mbo dimul po wa o doviaŋ o nyɛla humbulaŋ niŋndo aa: “Luɛi o kandulaŋ tɛɛŋ o chɛlɔbiiya bɛŋgu, ma kɔndu dɛŋgultaŋ chɛlɔbiiya tɛɛŋ ma pei balaŋ cha cha, ma sɛŋi laŋ chioo choo.” I wa tofaa mbo luɛi.
3 Chɛlɔbiiya wa isisi o ba kɛndɔɔ choo o chiɛi Mɛlɛkaa mi poo hoo luɛi, nduyɛ mi yumbu yumboo kumbu luŋ balu chiɛi Mɛlɛkaa wo kpu.
4 Okoŋ mi naŋɔɔ bɛndu Chɛhowa wo faŋaŋ chɛlɔbiiya choo, mbo kɔ sim o dio le luɛiyɔɔ o chiɛi Mɛlɛkaa. Mi yumbu yumboo kumbu chiɛi Mɛlɛkaa kpu, nduyɛ mi paŋgele naŋɔɔ bɛndu Chɛhowa wo tiu silɔ o luŋ chiɛi Mɛlɛkaa.
5 Wanaa lo o luŋ chiɛi Mɛlɛkaa o bɛɛ pɔ, ma tuei bɔɔluu kumbaŋnda chɛlɔbiiya wa laŋ, naŋ chaa Mɛlɛka Kpaaya Kpou Kpou Wo cho suɛi ni.
6 Okoŋ mbo dimul po wa o doviaŋ o nyɛla humbulaŋ niŋndo aa: “Kɔ luɛi o kandulaŋ tɛɛŋ, ma kɔndu yiŋnde cho chɛlɔbiiya tɛɛŋ ndeŋ.” Nduyɛ mbo luɛi mbo sim kandoo o pilɛ ikɛi.
7 Okoŋ mi cha mi chɛlɔbiiya haa o pilɛ siɛndi baa mbo kuandu yiŋnde wa nda tɛɛŋ ndeŋ. Mbo kuandu dɛŋgultaŋ latiŋ mbo duau wana wa o doviaŋ o nyɛla humbulaŋ niŋndo o laba. Nduyɛ mi ndu fula a laŋ o bɛɛ.
8 Chɛlɔbiiya haa ndaa nɔ nyɛlaŋ o kumbaŋnda ndalaŋ bɛŋgu maa bala wanachiee.
9 Mɛɛ ya wa tofaa, mi cha kandulaŋ la hiɔɔlu chɛlɔbiiya ikɛi. Chɛlɔbiinɔ kɛ kɛ kandoo o pilɛ wa ndu ikɛi. Nduyɛ wanaa che kandulaŋ ndaŋ wolioo pɛ, naŋ chaa pou kilisoluɛi yo ni.
10 Velaŋndo pila kandula hiɔɔlu laŋ laa velaŋ ni, nduyɛ wanaa che laŋ pɛ aa kandu cheleŋ cho o kandoo niŋ ni.
11 Kandulaŋ ndaŋ la tiuba mi la kuɛ o kpeŋguŋ hiɔɔloŋ i kɛ kɛ choo, la muliŋ te. Kanifuule naa la muli bolle le kɔlaŋ nda, loŋ la kua ni, la muliŋ te.
12 Chɛlɔbiiya haa, kɔɔla ndalaŋ, bala ndalaŋ, kumbaŋnda ndalaŋ, kandula ndala hiɔɔlu laŋ kpou, hɔltaŋ la wa la tiuwaa lechoo silɔ.
13 Mi tuɛinuŋ diomndo ya o lani mbo wa dimioo aa: “Kandulaŋ! La hiou lachi a kɔlaŋ!”
14 O kɛ kɛ* ndoo nɔ hɔlla a hiɔɔlu. Hɔlaa tasiaa hɔlaa chɛlɔbiinɔɔ, hɔlaa diiŋ nduaa hɔlaa wanachioo, hɔlaa yaa nduaa hɔlaa kpɔkuŋndo,* nduyɛ hɔlaa hiɔɔluaa hɔlaa kowɔɔ.
15 Mi chɛlɔbiiya haa ndaa chɛŋ o hueiye niŋ. Nyaa yoomaa piliaa haa kpe yaa che ni o pioo Kiba.
16 Te chɛlɔbiiya kuɛ pɛ, kandulaŋ bɛɛ la kuɛ a nda latulu. Te a pɛɛŋga pɛ kumbaŋnda ndalaŋ ma chɛŋ o hueiye niŋ, kandulaŋ bɛɛ la chɛŋ a nda latulu. La feŋaŋ nda ikɛi le.
17 Te a sim pɛ, kandulaŋ bɛɛ la sim. Te a hel pɛ choo choo, kandulaŋ bɛɛ la hel choo choo a nda latulu. Kanifuule, nyina Mɛlɛka wa wallo a nyaa yoomaa haa wo wa wallo a kandulaŋ ndaŋ ni.
18 Mi naŋɔɔ bɛndu Chɛhowa wo faŋaŋ o dio cho le luɛiyɔɔ o chiɛi Mɛlɛkaa wo, mbo chal chɛlɔbiiya choo.
19 I wa tofaa mi chɛlɔbiiya pɛɛŋga kumbaŋnda ndalaŋ ma chaŋ o hueiye niŋ. Nduyɛ kandulaŋ bɛɛ la wa a nda latulu, mɛɛ nda chɛŋ o hueiye niŋ. Ma kɔ tol o dio kpakioo le luɛiyɔɔ o chiɛi Chɛhowa wo niŋ ba paaleŋ le chaŋ ndo. Naŋɔɔ bɛndu Mɛlɛka Isɔluɛiya wa nda choo.
20 Nyaa yoomaa piliaa haa kpe ya che o pioo Kiba ni, o kpeŋgbei lemasa Mɛlɛka Isɔluɛiya bɛŋgu. Okoŋ, mi sina maa chɛlɔbiiya nda cho ni.
21 Nda hiɔɔlu kpou ndaa nɔ hɔlla a hiɔɔlu, kumbaŋndaŋ la hiɔɔlu, vɛlɛ a nyɛlaŋ nda o kumbaŋndaŋ bɛŋgu maa bala wanachiee.
22 Nduyɛ, hɔlaa ndaa wa maa hɔlaa ya che o pioo Kiba wa. O kɛ kɛ kɔlaŋ lachi sakpo.
