Isikiɛɛ 11:1-25
11 Okoŋ mi nyina Mɛlɛkaa heelu ya choo choo, mbo kua a ya o chiɛi Chɛhowa wo, o dio kpaki muli hɔlla ba paaleŋ le chaŋ ndo wo. Puaa 25 wa o dio kpaki koŋ sondoo. Nduyɛ Chaasanaya po Asɔ wo, a Pɛlataya po Bɛnaya wo wa nda tɛɛŋ. Nda wa waŋ banaa le waŋnda ni.
2 Mbo dimul la aa: “Po wanachioo, puaa haa cho sɔɔŋ wɔɔŋndoŋ kɛɛsiaa ni, ma wa waŋnda silala wɔɔŋndaŋ kioo o chioo hoo niŋ.*
3 A cho dimioo aa: ‘Baa o cho teleŋndo le cho hoo le chiɛilaŋ taŋgullo le? Chioo hoo* cho kpɛɛnɛi yawɛi* ni, mi naŋ wa visioŋ.’
4 “Lelaŋ po wanachioo, dimul nda. Dimul nda a nyɛ cho nda hunɔɔ yɔŋnɔŋndo okɔɔ.”
5 Okoŋ mi nyina Chɛhowa wo tual la choo. Mi Mɛlɛka dimul la aa: “Dimul nda aa, ‘Nyɛ Chɛhowa dimi wo cho hoo ni: “Oo waŋnda Isɔluɛi, nyɛ nya dimi wo cho tonya, nduyɛ I sina yiyaŋnda nyalaŋ.*
6 La tosa mi wanaa bɔɔbɔɔ sɔla piɔmndo o chioo hoo niŋ, nduyɛ mi la pei nɛila ndɔla bɛndulaŋ cha a waŋ vilɛiya.”’”
7 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Dialuŋ vilɛi nya tiu o chioo hoo niŋndoŋ cho visioŋ ni, nduyɛ chioo cho kpɛɛnɛi yawɛi ni. Kɛ nya, a cho nya soli o chioo hoo niŋ.’”
8 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘La yɔŋ siooŋnde le muɛi faŋnde, kɛ a muɛi faŋnde ya cho nya chiŋalaŋ ni.’
9 ‘I cho nya soli o chioo hoo niŋ, mi mal nya mialla o ba, nduyɛ mi kilul nya yamɛi.
10 Muɛi faŋnde cho nya diu. I cho nya yamɛi kilul o pɛŋgulaŋ Isɔluɛi, okoŋ mi la sina maa ya cho Chɛhowa ni.
11 O cho le nya le chioo cho wa kpɛɛnɛi yawɛi le, nduyɛ o cho nya le cho wa visioŋ leniŋ te. I cho nya yamɛi kilul o pɛŋgulaŋ Isɔluɛi,
12 okoŋ mi la sina maa ya cho Chɛhowa ni. Kanifuule la tul nɛila nila chɔmaalaŋ kɔɔli le, nduyɛ la bii sawala nilaŋ te. Kɛ mi la muliŋ sɔɔŋ tosaa mɛɛ lɛŋii balu nya ve tosa yɛ.’”
13 Dimioo nuaa I chii yooŋgoo dimi, mi Pɛlataya po Bɛnaya wo wu. Okoŋ mi baŋ wulaŋ mi fuuluu hɔlla lɛŋ, nduyɛ mi chaŋ choo choo kpeleŋ aa: “Kpokoo Chɛhowa, Mɛlɛka Kpuluŋguma Bɛndoo! Baa a cho pa wanaa lo haa yoomu o Isɔluɛi niŋnda kpou tɛɛmbuu?”
14 Mi Chɛhowa dimul la vɛlɛ aa:
15 “Po wanachioo, waŋnda Chulusalɛm dimul wanayaŋ numndoŋ a nɔ dioo le lɛŋndeŋ baŋaa wa vɛlɛ a waŋnda Isɔluɛi kpou aa: ‘La faŋaŋ Chɛhowa kɔɔli. Le naa lɛŋndeŋ le cho ni, nduyɛ naa nda ke leŋ ni le mi le wa nyɛm kɛŋ naa.’
16 Lelaŋ dimul nda aa: ‘Nyɛ Chɛhowa Mɛlɛka Kpuluŋguma Bɛndoo dimi wo cho hoo ni: “Mi che bɛɛ mi saŋ nda landaŋ o lɛŋnde niŋ kaala cheleŋ tɛɛŋ, kɛ o teleŋ biŋgi bɛŋgu I cho simnɔŋ chiɛi diandaa le nda o lɛŋii nda cho ve niŋ.”’
17 “Dimul nda aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho nya vɛlɛ soli waŋnda tɛɛŋ o lɛŋii ya sɛŋi nya ve niŋ, mi chuuŋgiaa nya naapilɛ, nduyɛ mi ke nya lɛŋnde Isɔluɛi leŋ.
18 A cho miiŋgu loŋ ma faaŋiaa piɔmaa ndaa nɔɔlɛiya a kaala ndala nɔɔlɛilaŋ kpou.
19 I cho kɔlta ndalaŋ mɔɔsa naapilɛ,* mi dɔu nda yiyaŋ sɛnɛiyo o lakɔl. I cho kɔl cho nda niŋ maa pou wo faŋa, mi ke nda kɔl cho maa i visi wo,*
20 le halikpeŋ ma diikuŋ sawala nilaŋ, nduyɛ ma tol nɛila nila chɔmaalaŋ kɔɔli. Okoŋ a cho simnɔŋ wanaa niaa, mi ya simnuŋ Mɛlɛka ndaa.”’
21 “‘“Kɛ wanaa kɛɛ kpooŋ le piɔmaa ndaa nɔɔlɛiya a kaala ndala nɔɔlɛilaŋ malɔɔ wa, I cho tosa ma sɔla fulamakɔɔlila wɔɔŋ wɔɔŋndaŋ.” Ya Chɛhowa, Mɛlɛka Kpuluŋguma Bɛndoo dimi lende ni.’”
22 Okoŋ, mi chɛlɔbiiya pɛɛŋga kumbaŋnda ndalaŋ ma chaŋ o hueiye niŋ. Kandulaŋ la wa nda ikɛi kpɛɛluŋ, nduyɛ naŋɔɔ bɛndu Mɛlɛka Isɔluɛiya wa nda choo.
23 Mi naŋɔɔ bɛndu Chɛhowa wo faŋaŋ chioo choo, mbo kɔ sim o pembii bɛnduei choo ba paaleŋ le chaŋ ndo.
24 Mi nyina Mɛlɛkaa heelu ya choo choo o yilaŋnde niŋ, mbo kua a ya Kaadiaa naa waŋnda wa o biyɔɔ niŋ nda. Okoŋ, mi yilaŋii ya wa chɔɔ ve i mɛɛlu.
25 Nduyɛ, mi kandu wanaa wa o biyɔɔ niŋnda dimullo nyɛ o nyɛ Chɛhowa chɔm ya.
Tɛɛsiaalaŋ
^ Ɔɔ “a chioo hoo okɔɔ.”
^ Hibuluiye, “Ndu,” Chulusalɛm, naa Chuuwa ndaa yiyaŋ maa nyɛ o nyɛ cho nda yɔŋnɔŋ te wa.
^ Ɔɔ “kpɛɛnɛi nɔ sondoo kpayaŋ nde.”
^ Ɔɔ “sɔɔŋ nya cho tuunɔŋndo o lakɔl loŋ.”
^ Hibuluiye, “I cho nda ke kɔllo o pilɛ.”
^ Koŋ cho ni, kɔl cho chɔ chɔ le nɛi chɔmaa Mɛlɛkaa chɛlɔɔ wo.
