Isikiɛɛ 12:1-28
12 Mi Chɛhowa suaa vɛlɛ naa ya chua aa:
2 “Po wanachioo, wanaa bolii kalaa tɛɛŋ ŋ cho ni. A nɔ hɔltaŋ le chɔɔ, kɛ a chi le. A nɔ nilaŋ le tueiyɔɔ, kɛ a tuii le. Kanifuule, wanaa bolii kalaa nda cho ni.
3 Kɛ num po wanachioo, bɛɛndiaa bɔndii numndo le kɔlaŋ o chɛleŋ niŋ. Nduyɛ a cho num wa tofaa ipala deŋ, ma kuɛ o chɛleŋ niŋ. A cho num wa tofaa ma mal chiɛi numndo, ma kuɛ o chɛleŋ niŋ o fondaŋ cheleŋ. Kɛlɛŋgaa dɔɔ ma dɔu ndi taasi mi che bɛɛ wanaa bolii kalaa nda cho ni.
4 A cho num wa tofaa ipala deŋ ma soli bɔndii numndo o bɛɛ le kɔlaŋ o chɛleŋ niŋ. Nduyɛ ichɔllo a cho num wa tofaa ma mal le kɔlaŋ, naŋ chaa wana nda cho kɔlaŋ o chɛleŋ niŋndo ni.
5 “A cho num wa tofaa ma buli tɛɛŋgei o chiɛiyo, nduyɛ ma soli wolɔɔla numndaŋ o tɛɛŋgii keŋ.
6 A cho wa tofaa, ma handuŋ wolɔɔla numndaŋ o choŋgu, ma kuɛ a laŋ o nyumndaŋ niŋ. Kuumbuŋ nyɔɔ o hɔl yɔŋii ŋ wa chɔɔ lɛŋ. Kanifuule, num ya cho soliŋ kpeku ni maa tamasi le waŋnda Isɔluɛi.”
7 Mi tosa mɛɛ o dimul la yɛ. Mi soli bɔndii nuu o bɛɛ ipalaa, maa bɔndii wana cho kɔlaŋ o chɛleŋ niŋndo. Nduyɛ a paale yɔŋgaŋndeŋ, mi buli sooŋndo o chiɛiyo a ba. Mɛɛ nyumndaŋ ma tol, mi chua wolɔɔla nilaŋ o choŋgu, mi kua a laŋ nda o hɔl kpendekele.
8 Idiiyo, mi Chɛhowa suaa vɛlɛ o ya lo aa:
9 “Po wanachioo, mi wanaa bolii kalaa o Isɔluɛi niŋ nyuna num aa, ‘Yɛɛnɛ ŋ cho yɛ tosaa, lende le?’
10 Dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Yooŋgoo cho hoo ni le wana cho bolleŋ o Chulusalɛm niŋndo, vɛlɛ a Isɔluɛiyaa cho o chioo hoo niŋnda kpou.”’
11 “Dimul nda maa tamasioo ŋ cho le nda ni. Mɛɛ i yɔŋnuŋ a num yɛ, lende koni i cho yɔŋnɔŋ a nda ni. A cho nda biyɔɔ, ma kuɛ a nda o chɛleŋ niŋ.
12 Wana cho nda bolleŋ ndo cho handɔŋ wolɔɔla ndɔlaŋ o choŋgu, okoŋ mbo mal le kɔŋndaŋ a nyumndaŋ. O cho tɛɛŋgei buli o chiɛiyo, mbo soli wolɔɔla ndɔlaŋ o tɛɛŋgii keŋ. O cho nyɔɔ kuumbɔŋ o hɔl yɔŋii o chɔ lɛŋ.
13 I cho ndu yala ni ledoosoo wuu choo, mi bii ndu. Okoŋ mi kuɛ a ndu Babilɔŋ o lɛŋnde Kaadiaŋnda niŋ, kɛ o cho leŋ chɔ le. Nduyɛ, loŋ o cho wu ni.
14 Wanaa balu ndu wa kpou, wanaa nduaa malaa ni, puaa nduaa chɔuwa ni, I cho nda sɛŋi ba o ba fee. I cho muɛi faŋnde yɔŋ, mi i tisa nda kɔɔli.
15 Te I puusiaa nda pɛ mi sɛŋi nda o lɛŋnde niŋ kaala cheleŋ tɛɛŋ, okoŋ a cho sina maa ya cho Chɛhowa ni.
16 Kɛ I cho tosa mi muɛi faŋnde, yima bɛnduaŋ, a naala taŋ waŋnda laŋ la mɛi a tiŋ yoomu, le halikpeŋ ma dimul wanaa nda cho kɔlaŋ tɛɛŋ nda a kaala ndala nɔɔlɛilaŋ okɔɔ, okoŋ a cho sina maa ya cho Chɛhowa ni.”
17 Mi Chɛhowa suaa vɛlɛ o ya lo aa:
18 “Po wanachioo, dio nyɛdiaa* numndo a nyiiyaa kpa kpa, nduyɛ ma kol mɛŋndaŋ a kɔl tambɛiyo vɛlɛ a buulaŋndo.
19 Dimul waŋnda o lɛŋndeŋ niŋ aa: ‘Nyɛ Chɛhowa, Mɛlɛka Kpuluŋguma Bɛndoo dimul waŋnda Chulusalɛm o lɛŋnde Isɔluɛi leŋ niŋndo cho hoo ni: “A cho nyɛdiaa ndaa dio a buulaŋndo, nduyɛ ma kol mɛŋma ndaŋ a siooŋii bɛnduei. Kanifuule lɛŋnde ndaleŋ le cho tambei sɔla mi le lo pɔm, le mɛɛ wanaa kaala sɔŋgɔlaŋ nda cho a piaa leniŋ cha yɛ.
20 Chieeŋ bɛnduŋ waŋnda cho leniŋ ndoŋ cho tambei sɔla, nduyɛ mi lɛŋndeŋ le lo fondo. Okoŋ, la cho sina maa ya cho Chɛhowa ni.”’”
21 Mi Chɛhowa suaa vɛlɛ naa ya chua aa:
22 “Po wanachioo, mi tuei nya tale pum dimioo o Isɔluɛi niŋ aa, ‘Paale huŋ ko le hiau, kɛ yilaŋii kɛ kɛ peeluŋ ndɔ le,’ lende le?
23 Lelaŋ dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho tosa mi tale nda dimi koŋ o Isɔluɛi niŋndo mɛɛlu, fɛɛŋ bɛɛ a soliŋ lɛ ndu niŋ kpeku le.”’ Kɛ dimul nda aa, ‘Palɛi cho niŋ kpɛɛluŋ, le mi yilaŋii kɛ kɛ peeluŋ.’
24 Fɛɛŋ bɛɛ yilaŋuŋ lachoowaŋ ɔɔ yawala nda viam le waŋnda huiyo laŋ la ve lɛ niŋ waŋnda Isɔluɛi tɛɛŋ te.
25 ‘“Kanifuule ya Chɛhowa, I cho isɔɔ. Nduyɛ nyɛ o nyɛ ya dimi pɛ, o doonuŋ niŋ tamala le peelɔŋndo le. Oo nya wanaa bolii kalaa haa, nyɛ o nyɛ ya dimi pɛ o palɛi nyɛi niŋ, I cho ndu tosa.” Ya Chɛhowa, Mɛlɛka Kpuluŋguma Bɛndoo dimi lende ni.’”
26 Mi Chɛhowa suaa vɛlɛ naa ya chua aa:
27 “Po wanachioo, nyɛ waŋnda Isɔluɛi cho dimioo wo cho hoo ni, ‘Yilaŋii o che keŋ nde i peeluŋ niŋ suŋ suŋ te. A chilaŋ okɔɔ pɔ nyɛ o cho koŋ dimioo wo cho ni.’
28 Lelaŋ dimul nda aa, ‘Nyɛ Chɛhowa Mɛlɛka Kpuluŋguma Bɛndoo dimi wo cho hoo ni: “‘Nyɛ o nyɛ ya dimi nɔ le peelɔŋndo, nduyɛ o doonuŋ niŋ tamala le peelɔŋndo le. Ya Chɛhowa, Mɛlɛka Kpuluŋguma Bɛndoo dimi lende ni.”’”
Tɛɛsiaalaŋ
^ Ɔɔ “beedii ɔɔ bulu.”
