Isikiɛɛ 13:1-23
13 Mi Chɛhowa suaa vɛlɛ naa ya chua aa:
2 “Po wanachioo, dimul wanaa suaa le Mɛlɛka o Isɔluɛi niŋnda, vɛlɛ a wanaa kɛɛsiaa huuloŋ a ba nda wa* a nyɛ cho nda hunɔɔ yɔŋnɔŋ ndo okɔɔ aa, ‘La yaŋ nilaŋ o nyɛ Chɛhowa dimi wo.
3 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Kpundɔɔ cho le diɔmaa suaa le Mɛlɛka wa, a cho yiyaŋnda ndalaŋ tolɔɔ kɔɔli le huuloŋ dimioo wa, mi che bɛɛ a chi nyɛ o nyɛ le!
4 Oo Isɔluɛi, wanaa num aa suaa le Mɛlɛka wa simnuŋ maa siifaa o bembelaŋ tɛɛŋ.
5 Nya wanaa suaa le Mɛlɛka wa kue niŋ le fondaŋnda nda pesi pesi o kpaki lapouwo laŋ miŋgioo taŋgullo le waŋnda Isɔluɛi le, yɔŋii Isɔluɛiya lo isisi le sɔŋgɔɔ o paale Chɛhowa leŋ choo.”
6 “A che yilaŋuŋ lachoowaŋ, nduyɛ ma dimi choolaŋ aa, ‘Nyɛ Chɛhowa dimi wo cho hoo ni,’ kɛ o kpeekpei niŋ o cho Chɛhowa le vem nda le. Nduyɛ ma chal chumndo le mi nyɛ nda dimi wo yɔŋnuŋ.
7 La che yilaŋii lachoowɛi nduyɛ mi la dimi choolaŋ a ndi okɔɔ aa, ‘Nyɛ Chɛhowa dimi wo cho hoo ni,’ lende le? Kɛ o kpeekpei niŋ I dimi nyɛ o nyɛ le”’
8 “‘Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “‘Le mɛɛ nya dimi choolaŋ, nduyɛ mi yilaŋuŋ nya che woŋ wa yilaŋuŋ lachoowaŋ yɛ, I cho nya chiŋalaŋ.’ Ya Chɛhowa, Mɛlɛka Kpuluŋguma Bɛndoo dimi lende ni.”
9 I cho wanaa suaa le Mɛlɛka ma cha yilaŋuŋ lachoowaŋ nduyɛ ma dimi choolaŋ a muŋ okɔɔ wa chiŋalaŋ. A ve niŋ wanaa ya dimul sɔɔŋ nuŋ nda tɛɛŋ te. I poonyiaa nda niŋ diolaŋ o yau Isɔluɛiya niŋ te, kɛlɛŋgaa niŋ te ma miiŋgu o lɛŋnde Isɔluɛi leŋ niŋ. Okoŋ a cho sina maa ya cho Chɛhowa, Mɛlɛka Kpuluŋguma Bɛndoo ni.
10 I cho sɔɔŋ muŋ kpou tosa le mɛɛ nda cho wanaa niaa hɔlla hiŋndo yɛ, ma dimi aa, “Kɔl nyuloo cho!” Kɛ o kpeekpei niŋ, kɔl nyulu cho le. Te a taŋgul pɛ chiɛiyo a nyɛm fɛtu fɛtoŋ, nda suu muŋ pɔu humboo.’*
11 “Dimul wanaa cho pɔu humboo suiyo wa maa o cho komba. Piɔɔ bɛndoo cho sia, mi looŋ kpuŋgbaŋ deli, nduyɛ mi hueiyii bɛnduei hɔŋ mbo komba wɔlɔ wɔlɔ.
12 Te o komba pɛ, a cho nya nyuna aa, ‘Ɔɔ chiɛi nya suu pɛi pɔuwo wo?’
13 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho tosa mi hueiyii bɛnduei hɔŋ le mɛɛ ya dɔɔnuŋ tumbe yɛ, mi piɔɔ bɛndoo sia le mɛɛ ya tambu kɔl tau yɛ, nduyɛ mi looŋ kpuŋgbaŋ deli le nya tɛɛmbuuwo, le mɛɛ ya tuulu kɔl ŋama ŋama yɛ.
14 I cho chiɛi nya suu pɔu humboo wo tɛɛmbuu, mi tusi ndu lɛŋ mɔlɔ mɔlɔ, okoŋ mi chiyii nduɛi fula chieeŋ deŋ. Te chioo komba pɛ, la cho tambei sɔla. Okoŋ, la cho sina maa ya cho Chɛhowa ni.’
15 “‘Te I dɔɔnuŋ pɛ tumbe o kala kala a chiɛiyo hoo vɛlɛ a wanaa suu ndu pɔu humboo wa, I cho num dimul aa: “Chiɛiyo cho lɛ le, nduyɛ wanaa suu ndu pɔuwo wa bɛɛ cho lɛ le.
16 Wanaa ndaa suaa le Mɛlɛka o Isɔluɛi niŋnda cho lɛ le. Nda ndaa dimi huuloŋ a Chulusalɛm okɔɔ ni, nduyɛ ma cha yilaŋuŋ kɔl nyuloŋ a ndu okɔɔ, mi che bɛɛ kɔl nyulu cho le.”’ Ya Chɛhowa, Mɛlɛka Kpuluŋguma Bɛndoo dimi lende ni.
17 “Kɛ num po wanachioo, mulul chuaa laanduaa Isɔluɛi hɔlla, a cho huuluŋ lachoowaŋ dimioo wa, okoŋ ma dimul nda nyɛ cho hunɔɔ yɔŋnɔŋ a nda wo.
18 Dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Kpundɔɔ cho le waŋ laanduaa suandu kolala ipɛŋgɛlaŋ le yiinɔŋndo o laba,* nduyɛ ma suandu kolala waaŋgaala sul wana o wana o lebol taŋ, le halikpeŋ ma tɛɛmbuu yoomula waŋnda chieeya wa. Baa yoomula wanaa niaa nya cho nuuviaa ni le laŋ tɛɛmbuuwo, nduyɛ mi la kindiŋ le yoomula nyalaŋ mandaa?
19 Baa la yeema mi la nɔɔliaa diola nilaŋ wanaa niaa tɛɛŋ le baliiyoŋ baa cha vɛlɛ a beedii* biŋgi biŋgi nda dema wo? Choola nya cho wanaa niaa dimullo nduyɛ ma yaŋ nya nilaŋ ndaŋ la tosa, mi la wa wanaa nɔ ma sɔla piɔm te wa diyɔɔ, nduyɛ mi la mɛi wanaa nɔ ma sɔla piɔmndo wa yoomu.”’
20 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Oo waŋ laanduaa, I tul kolala nyala ipɛŋgɛlaŋ leyɛ. Laŋ nya soliŋ kpeku ni le waŋnda yaŋɔɔleŋ yeŋndo, mɛɛ nda yeŋ nuaa youwa yaŋɔɔleŋ yɛ. I cho laŋ nya sɛɛsiaa o laba, nduyɛ mi piŋi wanaa nya cho yaŋɔɔleŋ yeŋndo, mɛɛ nda yeŋ nuaa youwa yaŋɔɔleŋ yɛ.
21 I cho kolala waaŋgaala nya yiinuŋ o lebol taŋ tɛɛmbuu, nduyɛ mi piŋi wanaa niaa nya o ba. La nɔla lɛ niŋ mi la yeŋ nda yaŋɔɔleŋ le nda biyɔɔ le. Okoŋ, la cho sina maa ya cho Chɛhowa ni.
22 Kanifuule la tɛɛmbuu wana cho sakpo wo kɔllo a choola nyalaŋ, mi che bɛɛ I ve ndu suɛi wɔɔŋ tosal te. Nduyɛ mi la luei wanaa dɛnɛ wɔɔŋnda yoomuaŋ, le halikpeŋ a mulul yɔŋnda ndala wɔɔŋndaŋ kɔɔ ma wa yoomu le.
23 Lelaŋ, nya waŋ laanduaa haa la chi lɛ niŋ yilaŋuŋ lachoowaŋ nduyɛ mi la vem yawalaŋ te. I cho wanaa niaa piŋi nya o ba, okoŋ mi la sina maa ya cho Chɛhowa ni.’”
Tɛɛsiaalaŋ
^ Ɔɔ “kɛɛsiaŋ huuloŋ o kɔl la.”
^ Koŋ cho ni, kpaki kindu le wo taŋgullo chiɛiniŋ ma suu ndu pɔu humboo le chɔmndo maa o kendu poŋ.
^ Koŋ cho ni, kolala ŋpɛŋgala nda yiinuŋ o bala lɔɔlaŋ le maŋgaliaalaŋ tosaa laŋ.
^ Ɔɔ “bulu.”
