Isikiɛɛ 14:1-23
14 Mi waŋ banaa apum o Isɔluɛi niŋ huŋ ma chal la lachi.
2 Okoŋ mi Chɛhowa suaa naa ya chua aa:
3 “Po wanachioo, puaa haa kɛɛsiaŋ o lakɔl le piɔmaa ndaa nɔɔlɛiya* tolɔɔ kɔɔli, nduyɛ a kɛsi pou boŋaa le mi waŋnda tosa hakioo. Le yɛɛnɛ mi chɛl nda ma nyuna ya?
4 Dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Te Isɔluɛinɔɔ kɛɛsiaŋ pɛ o kɔl le piɔmaa nduaa nɔɔlɛiya tolɔɔ kɔɔli, nduyɛ mbo kɛsi pou boŋaa tosa mi waŋnda tosa hakioo wo, okoŋ mbo huŋ nyuna wana suaa le Mɛlɛka wo le malaa, ya Chɛhowa, I cho ndu mulul a mɛɛ kpɛ piɔmaa nduaa nɔɔlɛiya cho yɛ.
5 I cho tosa mi siooŋii bɛnduei pɛ waŋnda Isɔluɛi o lakɔl cha. Kanifuule, a mal la ma muliŋ piɔmaa ndaa nɔɔlɛiya sooluuwo.”’
6 “Lelaŋ dimul waŋnda Isɔluɛi aa, ‘Nyɛ Chɛhowa Mɛlɛka Kpuluŋguma Bɛndoo dimi wo cho hoo ni: “La mal piɔmaa nyaa nɔɔlɛiya sooluuwo, nduyɛ mi la soli balaŋ o sɔɔŋ nɔɔlɛi nya cho tosaa woŋ niŋ, okoŋ mi la miiŋgu ya o ibuŋ.
7 Te Isɔluɛinɔ kɛ kɛ ɔɔ mial cho nya tɛɛŋ o lɛŋnde Isɔluɛi leŋ niŋndo faŋaŋ ya kɔɔli pɛ, nduyɛ mbo kɛɛsiaŋ o kɔl le piɔmaa nduaa nɔɔlɛiya tolɔɔ kɔɔli, mbo kɛsi pou boŋaa tosa mi waŋnda tosa hakioo wo, okoŋ mbo nyuna wana suaa le Mɛlɛka wo, ya Chɛhowa, yapila kɛsɛ cho ndu mulul ni.
8 I cho wana koŋ nyɛpalaa tusi choo, nduyɛ mi keŋ wa maa tamasi a taloo. I cho ndu faŋa wanaa niaa tɛɛŋ bau, okoŋ la cho sina maa ya cho Chɛhowa ni.”’
9 “‘Kɛ te wana suaa le Mɛlɛka wo hiŋnuŋ pɛ hɔlla mbo muli, mɛɛ ya Chɛhowa, ya hui ndu koŋ ni. I cho ba nuu siɛndi mi tɛɛmbuu ndu wanaa niaa tɛɛŋ, Isɔluɛiya.
10 A cho fulamakɔɔlila wɔɔŋndaŋ sɔla. Wana nyuna wo ni, wana suaa le Mɛlɛka wo ni, fulamakɔɔlila pilalaŋ kpe nda cho sɔla ni,
11 le halikpeŋ mi waŋnda Isɔluɛi pɛŋgi kɔlaŋ levil a ya, nduyɛ ma pɛŋgi ndapila nɔɔliaa a hakila nda cho tosaa laŋ kpou. Okoŋ a cho simnɔŋ wanaa ni, mi ya simnuŋ Mɛlɛka nda.’ Ya Chɛhowa, Mɛlɛka Kpuluŋguma Bɛndoo dimi lende ni.”
12 Mi Chɛhowa suaa vɛlɛ naa ya chua aa:
13 “Po wanachioo, te waŋnda o lɛŋndeŋ niŋ kɛɛ ya pɛ lo lechoo wo chɔmndo ma tosa hakioo a ya, I cho ba nuu siɛndi mi tɛɛmbuu nyɛdiaa ndaa, mi tusi nda yima bɛnduaŋ choo, nduyɛ mi diu waŋnda chieeya a visiaa cho loŋ nda.”
14 “‘O yɔŋ bɛɛ mi puaa yaa wa haa, Nuuwa, Daaniɛɛ, a Choobu ndaa wa o lɛŋnde leŋ niŋ, ndapila kinɛi nda wa piŋi ni, le mɛɛ nda cho sakpo yɛ.’ Ya Chɛhowa, Mɛlɛka Kpuluŋguma Bɛndoo dimi lende ni.”
15 “‘Te I yɔŋ pɛ visiaa biyaa ma kei o lɛŋndeŋ niŋ, ma tɛɛmbuu wana o wana cho loŋ mi le lo fondo fuu,* okoŋ wana o wana kue lɛ loŋ te, le mɛɛ visiaa biyaa cho loŋ yɛ.
16 Mɛɛ i cho kpendekele maa I cho yoomu yɛ, o yɔŋ bɛɛ mi puaa yaa wa haa ndaa wa o lɛŋnde leŋ niŋ, a ve tiuba le yoomula puaa ndaa ɔɔ chuaa ndaa laanduaa piŋi le. Ndapila kinɛi nda wa piŋi ni, nduyɛ mi lɛŋndeŋ lee lo pɔm.’ Ya Chɛhowa, Mɛlɛka Kpuluŋguma Bɛndoo dimi lende ni,”
17 “‘Ɔɔ te o yɔŋ pɛ mi yɔŋ muɛi faŋnde o lɛŋndeŋ niŋ, mi dimi aa: “Muɛi faŋnde, kɔ balu o lɛŋndeŋ niŋ,” okoŋ mi i diu waŋnda chieeya a visiaa,
18 mɛɛ i cho kpendekele maa I cho yoomu yɛ, o yɔŋ bɛɛ mi puaa yaa wa haa ndaa wa o lɛŋnde leŋ niŋ, a ve tiuba le yoomula puaa ndaa ɔɔ chuaa ndaa laanduaa piŋi le. Ndapila kinɛi nda wa piŋi ni.’ Ya Chɛhowa, Mɛlɛka Kpuluŋguma Bɛndoo dimi lende ni.”
19 “‘Te I yɔŋ pɛ naala taŋ waŋnda laŋ o lɛŋndeŋ niŋ, nduyɛ mi dɔɔnuŋ tumbe o kala kala okoŋ mi diu waŋnda chieeya a visiaa cho leniŋ nda,
20 mɛɛ i cho kpendekele maa I cho yoomu yɛ, o yɔŋ bɛɛ mi puaa yaa wa haa, Nuuwa, Daaniɛɛ, a Choobu ndaa wa o lɛŋnde leŋ niŋ, a ve tiuba le yoomula puaa ndaa ɔɔ chuaa ndaa laanduaa piŋi le. Ndapila kinɛi nda wa piŋi ni, le mɛɛ nda cho sakpo yɛ.’ Ya Chɛhowa, Mɛlɛka Kpuluŋguma Bɛndoo dimi lende ni.”
21 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Lende i wa niŋ ni te I yɔŋ pɛ kpundɛla hiɔɔlu laŋ ndaŋ, muɛi faŋnde, yima bɛnduaŋ, visiaa biyaa, a naala taŋ waŋnda laŋ le Chulusalɛm tɛɛmbuuwo, okoŋ mi diu waŋnda chieeya a visiaa cho leniŋ nda.
22 Kɛ apum cho lo yoomu ma nyaanuŋ, nduyɛ chuauwaa ndaa piaanduaa a chuauwaa ndaa laanduaa cho wa nda tɛɛŋ. A cho hunɔɔ o nya lo, nduyɛ te la che pɛ kaala ndalaŋ a sɔɔŋ wɔɔŋ nda cho wa tosaa woŋ, la cho kɔl dɛɛniaa sɔla le kpundɛ ya tusi Chulusalɛm choo wo, vɛlɛ a nyɛ o nyɛ ya tosa a ndu.’”
23 “‘La cho kɔl dɛɛniaa sɔla te la che pɛ kaala ndalaŋ a sɔɔŋ wɔɔŋ nda cho wa tosaa woŋ, okoŋ mi la sina maa o cho o fondo fuuwo choo le ya tosa nyɛ ya tosal nda wo le.’ Ya Chɛhowa, Mɛlɛka Kpuluŋguma Bɛndoo dimi lende ni.”
Tɛɛsiaalaŋ
^ Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ ma soliŋ ndu kpeku le nyɔɔ pɛɛsaa.
^ Ɔɔ “mi le viikuu chuauwa.”
