Isikiɛɛ 17:1-24
17 Mi Chɛhowa suaa vɛlɛ naa ya chua aa:
2 “Po wanachioo, dimi taloo a waŋnda Isɔluɛi okɔɔ, nduyɛ ma tɛɛsiaa ndu.
3 Dimi aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Kowɛ bɛndu pilɛ chɛŋ ni, mbo kua Lebanɔŋ mbo kɔ yom yɔm sida wo bolleŋ. Kowɔɔ hoo ndoo nɔ kumbaŋnda bɛndulaŋ, a bɔɔla vilɛila kɛndɛ kɛndɛla nɔ kɔɔle yɛ yɛ leŋ ndaŋ.
4 Mɛɛ o yem ndu bolleŋ kpɔsu, mbo kua a ndu o lɛŋnde wanaa leyulaa* niŋ, mbo kɔ chɔŋ ndu o chiee nda bɛndoo niŋ.
5 Mbo chua kulle ipum o lɛŋnde leŋ niŋ, mbo tual ndi o lɛŋnde kɛndɛleŋ choo, mɛɛ nda tual nuaa yɔm wilo wo o mɛŋndaŋ ikɛi yɛ.
6 Mi kulle hei wul, mi i simnuŋ yɔm makilepii kɛndɛ kɛndɛ, okoŋ mbo pɛŋgɛlaŋ toolo toolo. Mi che bɛɛ mi puunduŋ ndɔŋ luɛi lɛŋ di, kɛ o pɛŋgɛla pei le. Mi yɔm makilepiiyo hoo piɛsi okoŋ mbo soli lɛuwoŋ.
7 “‘“Kɛ mi kowɛ bɛndu cheleŋ fula. Ndu bɛɛ ndoo nɔ kumbaŋnda bɛndulaŋ a bɔɔla vilɛilaŋ. Yɔm makilepiiyo hoo lo o fondaŋ o wa o tualaa wo, mbo yɔŋ puunduŋ ndɔŋ chɔ chɔ o kowɔɔ hoo lo. Mbo pɛŋgɛla pei nduɛi o ndu lo le mbo pɔɔliaa ndu.
8 O wa niŋ o tualaa o lɛŋnde kɛndɛ kɛndɛleŋ choo naa mɛŋndaŋ ma cho tau wa, le halikpeŋ mbo soli lɛuwoŋ, mbo kom, nduyɛ mbo simnuŋ yɔm makilepii bɛndu bɛndu.”’
9 “Dimi aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Baa yɔmndo hoo fula niŋ pa leniŋ? Baa waŋndo kili niŋ puunduŋ ndɔŋ mi komɔɔ ndɔɔ sɛ nduyɛ mi pei nduɛi vesa le? Te o vesa pɛ, wana mayoomu ɔɔ wanaa bɔɔ yeemaŋ niŋ le ndu suŋgɔɔ le.
10 Mi che bɛɛ ma kɔ tɔl ndu naa cheleŋ, kɛ baa o fula niŋ pa leniŋ? Hueiyii fula ba paaleŋ le chaŋ ndo ve cho hɔŋ, mbo vesa sɛɛŋ. O cho lo o fondaŋ o villo mbo vesa.”’”
11 Mi Chɛhowa suaa vɛlɛ naa ya chua aa:
12 “Yandii dimul wanaa bolii kalaa haa aa, ‘Baa la sina nyɛ sɔɔŋ muŋ simndo le?’ Dimul nda aa, ‘Masaa le Babilɔŋ huŋ bii masaa le Chulusalɛm a laŋgbaa nduaa kalla mbo kuaŋnuŋ a nda Babilɔŋ.
13 Okoŋ kɔɔli, mbo chua wana pilɛ* o chiɛi lemasaa niŋ, mbo yii kpemaa a ndu, nduyɛ mbo tosa mbo mɛnaŋ. Mbo kuaŋnuŋ a wanaa pɛlnuŋ ladio o lɛŋndeŋ niŋnda,
14 le halikpeŋ mi masaleŋ le tol toolo, le nɔla mi le fula tɔɔ le. Nyɛ kinɛi tosa mi le hiou lachi a waa wo cho loo o kpema o yii a ndu wo choo ni.
15 Kɛ mi masaa le Chuda simul masaa le Babilɔŋ. Mbo yɔŋ waŋnda Ichipi le ma ke ndu suaa a puaa chɔuwa kunda bɛndoo. Baa o cho pa batiuwaa sɔla? Baa a tusi niŋ wana cho hei tosaa wo nyɛpalaa choo le? Baa o nɔla pa mbo tɛɛmbuu kpema nda yii a ndu wo mbo hɛluŋ?’
16 “‘“Mɛɛ i cho kpendekele maa I cho yoomu yɛ, o cho wu Babilɔŋ, naa masa* siiŋguu ndu* masaa wo cho wa. Masa koŋ o tɛɛmbuu kpema o yii a ndu, mbo mɛnaŋ po wo ni.” Ya Chɛhowa, Mɛlɛka Kpuluŋguma Bɛndoo dimi lende ni.
17 “Te a taŋgul pɛ kpakioo nduyɛ ma dɔu nda o piŋndo niŋ le nda diuwo, mɛɛ mɛɛ puaa chɔuwaa kpaaya bɛnduaa Feloo wa wa faŋga, a nɔla niŋ ma mala nda o chɔuwo le.
18 O tɛɛmbuu kpema nda yii a ndu mbo mɛnaŋ po wo. Mi che bɛɛ mbo chua buŋgɛi, kɛ mbo tosa sɔɔŋ muŋ kpou. Le hei, o heluŋ te.”’
19 “‘Lelaŋ, nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Mɛɛ i cho kpendekele maa I cho yoomu yɛ, I cho ndu nyɛpalaa tusi choo le mɛɛ o tɛɛmbuu kpema ya yii a ndu mbo mɛnaŋ po wo yɛ.
20 I cho ndu yala ni ledoosoo wuu choo mbo hau leniŋ. I cho lakɔ a ndu Babilɔŋ mi kilul ndu yamɛi loŋ, le mɛɛ o kɛɛ lo lechoo wo chɔmndo o ya lo yɛ.
21 A cho puaa nduaa chɔuwaa cho nyaanɔŋ nda diu diu a muɛi faŋnde. Nduyɛ, mi a cho lo yoomu wa saŋnuŋ ba o ba fee. Okoŋ la cho sina maa ya Chɛhowa, yapila kɛsɛ soo ni.”’
22 “‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho lɛuvii lendei yomɔɔ o yɔm sida wo bolleŋ mi tɔl ndi. Yapila kpeekpei cho ndi yomɔɔ ni, mi tɔl ndi o pembii vilɛi bɛnduei choo.
23 I cho lɛuve hei tɔlɔɔ o pembii bɛnduii vilɛiye choo Isɔluɛi. O cho lɛuwoŋ soli miŋ pɛŋgɛlaŋ, mbo kom, nduyɛ mbo simnuŋ yɔm sida tɔɔma bɛndu. Youwaa suu o suu cho wa challe o lɛuwuŋ ndɔŋ le wunduma nduaŋ.
24 Nduyɛ yɔmnde yondoo niŋ kpou cho sina maa, ya Chɛhowa, yapila tusi yɔm wa o vilɛiyo toolo ni, nduyɛ mi heelu yɔm wa toolo wo. Ya veesiaa yɔm wa puiyo wo ni, nduyɛ mi tosa mi yɔm wa o vesɛiyo wo pui. Ya Chɛhowa, yapila dimi ni nduyɛ mi tosa ndi.”’”
Tɛɛsiaalaŋ
^ Hibuluiye, “lɛŋnde Kenaŋ ndeŋ.”
^ Hibuluiye, “kulle.”
^ Koŋ cho ni, Nɛbukanɛɛsa.
^ Koŋ cho ni, Sɛdikaya.
