Isikiɛɛ 2:1-10
2 Okoŋ mbo dimul la aa: “Po wanachioo,* chɔŋ ma sim okoŋ mi soo o numndo.”
2 Mɛɛ o soo o ya lo, mi nyina Mɛlɛkaa tual la choo, mi chaŋ mi sim, le halikpeŋ mi tuei wana wa suɛi o ya lo wo.
3 Mbo hiau lachi a suɛi naa ya chua aa: “Po wanachioo, I cho num viomɔɔ o waŋnda Isɔluɛi lo, wanaa bolii kalaa simul la haa wa. Nda a finyaa ndaa mamaa, a cho hiouwɔɔ lachi a hakioo tosaa a ya haaa a paale hauleŋ ndeŋ.
4 I cho num viomɔɔ o chuauwaa bolii kalaa haa lo. Nduyɛ dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni.’
5 Kɛ wanaa kaŋ nda nda, wanaa bolii kalaa nda cho ni. Lelaŋ o yɔŋ bɛɛ ma yaŋ nilaŋ ɔɔ ma yeŋ lani le, a cho sina maa wana suaa le Mɛlɛka wo wa nda tɛɛŋ.
6 “Kɛ num po wanachioo, yɔŋ isiooŋ le nda le. Nduyɛ yɔŋ isiooŋ le nyɛ nda cho wa dimioo wo le, o yɔŋ bɛɛ mi yɔɔŋ balu num silɔ nduyɛ ma wa ŋgeemaa tɛɛŋ. Siooŋii bii num le nyɛ nda cho wa dimioo wo le, nduyɛ yɔŋ isiooŋ le hɔlaa nda cho num wa solullo wa le. Kanifuule, wanaa bolii kalaa nda cho ni.
7 Dimul nda nyɛ ya cho num dimullo, o yɔŋ bɛɛ ma yaŋ nilaŋ ɔɔ ma kɛɛ. Kanifuule, wanaa bolii kalaa nda cho ni.
8 “Kɛ num po wanachioo, yaŋ nilaŋ o nyɛ ya cho num dimullo wo. Simnuŋ wana bolle kala maa wanaa bolii kalaa haa le. Kumbi sondoo ma de nyɛ ya cho num kioo wo.”
9 Mɛɛ ya tofa, mi cha mi waŋndo siɛndi ya baa lachi, a yau simbulaa ndu o ba.
10 Mɛɛ o pɛŋgɛla ya ndu lachi, mi cha poonyiaa leniŋ a o kɔɔ. Chonduŋ ŋmɔnɔŋ a diomnda chaŋ imɔnɔlaŋ la wa la poonyiaa leniŋ ni.
Tɛɛsiaalaŋ
^ Fondaŋ tasoo cho hoo ni naa diomndaŋ ndaŋ “po wanachioo” cho wa. Nduyɛ, la cho bɛmbɔɔ 93 o yau Isikiɛɛ wo niŋ.
