Isikiɛɛ 22:1-31
22 Mi Chɛhowa suaa vɛlɛ naa ya chua aa:
2 “Kɛ num po wanachioo, a cho pa o bɛɛndiaŋ le ma kilul chiee diu hoo waŋnda chieeya wo yamɛi, nduyɛ ma chɔm ndu sɔɔŋ nɔɔlɛi o tosa woŋ kpou?
3 Dimul ndu aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Num chiee tala hoo kooma wanaa numnda nduyɛ ma toosiaa piɔmaa nɔɔlɛiya* le numpila nɔɔliaa wo, teleŋ numndo cho hunɔɔ.
4 Kooma wanaa ŋ diu wa ma cho num o lebol, nduyɛ piɔmaa num aa nɔɔlɛiyaa ŋ toosiaa wa tosa ma simnuŋ o nɔɔlɛi. A kelu palɛi numnde i biŋgi, nduyɛ wɔsila numndaŋ la fuuluu o mɛɛlulaŋ. Le saboo hoo, I cho tosa mi waŋnda o lɛŋnde niŋ kpou chua num chɔdɔ, nduyɛ ma siiŋguu num nyɛ mamaa.
5 Num nɔɔliaa hoo diola numndaŋ nduyɛ mi wooluŋ wooluŋndo wa o piaa cha o num niŋndo, lɛŋii balu numnde a wanaa cho landaŋ a numnda cho num mamɔɔ.
6 Bolle yuŋgu kɛ kɛ o Isɔluɛi niŋ cho kpaaya ndɔɔ soliŋndo kpeku le waŋnda diuwo.
7 Wanaa cho o chioo hoo niŋnda cho finyaa ndaa a kalaa ndaa biyɔɔ wɔɔŋndo. A cho nyɛm mialaa cho nda tɛɛŋ nda chuaa a kaka, nduyɛ ma wa chuaambuaa nɔ ŋfinya le wa* a waŋ laanduaa vii piaanduaa wa biyɔɔ wɔɔŋndo.”’”
8 “‘A chua fondaŋnda nila diandaalaŋ chɔdɔ, nduyɛ ma nɔɔliaa palɛi nii pɛŋgiɛi.
9 Wanaa cho o num niŋnda cho waŋnda choolaŋ nyiinduuwo le nda diuwo. A cho nyɛm lasooluu woŋ dioo o pembuŋ bɛndoŋ choo, nduyɛ ma tosa kaa nɔɔlɛi suu o suu o num niŋ.
10 A cho kpelela finyaa ndaa nɔɔliaa,* nduyɛ ma wa hinilaŋ a waŋ laanduaa cho o teleŋ ndaa niŋnda.
11 Waŋnda cho suundaa a laandaa pilaa, mi haa wa hinilaŋ a laandaa puaa ndaa ma nɔɔliaa nda. Acheleŋnda wa hinilaŋ a yemaa ndaa nda fula finya pilɔɔ wa.
12 Wanaa numnda cho luɛiyɔɔla niŋndaŋ biyɔɔ, ma diu waŋnda. A cho waŋnda kueelaŋ wuuwo, ma handu nyɛ lechoo le tɔnɔɔ sɔlaa, nduyɛ ma dia kaniŋ* pilaŋ a lediɔɔmu. A tonya, la puɛɛnuŋ a ya okɔɔ pɔli.’ Ya Chɛhowa, Mɛlɛka Kpuluŋguma Bɛndoo dimi lende ni.
13 “‘I tɛm balaŋ a kɔl tambeiyo le tɔnɔ nya cho sɔlaa o kafalaŋ choo wo vɛlɛ a wanaa nya cho diuwo wa.
14 Baa a hiau niŋ pa lachi a kɔl simulaa nɔɔ, vɛlɛ a simndaŋ yi a dialuŋ kala o paale ya cho num chiŋalaŋ ndeŋ choo? I cho num chiŋalaŋ, Ya Chɛhowa pila dimi lende ni.
15 I cho nda puusiaa mi sɛŋi nda o lɛŋnde niŋ kaala cheleŋ tɛɛŋ, nduyɛ mi tosa mi sɔɔŋ nɔɔlɛi nda cho tosaa woŋ mɛɛlu.
16 A cho tambu labɛɛ lɛŋnde o hɔl, okoŋ ma sina maa ya cho Chɛhowa ni.’”
17 Mi Chɛhowa suaa vɛlɛ naa ya chua aa:
18 “Po wanachioo, waŋnda Isɔluɛi simnuŋ nyɛ fondoo ya o hɔl. Nda kpou cho ko mɛɛ chiliŋii siaŋɛi,* chiliŋii leemu leemuei, chiliŋnde, vɛlɛ a liiye wa nuaa o yiŋnde tondoleŋ niŋ yɛ. A simnuŋ maa nɔɔ fula o kanii humbuei yo.
19 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Le mɛɛ nya kpou simnuŋ maa nyɛ fondo yɛ, I cho nya chuuŋgiaa naapilɛ Chulusalɛm.
20 Mɛɛ nda chuuŋgiaa nuaa kanii humbuei, chiliŋii siaŋɛi, chiliŋnde, liiye, a chiliŋii leemu leemuei naapilɛ ma wou o tondo leyiŋndo niŋ, ma sɛndi yiŋndeŋ le muŋ teeŋgiaa yɛ, lende ya cho nya chuuŋgiaa naapilɛ ni mi hulu nya tumbe nuu a kɔl ni tuuwo choo mi la teŋga.
21 I cho nya chuuŋgiaa naapilɛ mi sɛndi nya tumbe nuu choo maa leyiŋ, okoŋ mi la teŋga o Chulusalɛm niŋ.
22 Mɛɛ kanii humbuei teŋga nuaa o tondo leyiŋndo niŋ yɛ, lende nya cho teŋga o Chulusalɛm niŋ ni. Okoŋ la cho sina maa ya Chɛhowa, ya hulu nya kɔl ni tuuwo choo ni.’”
23 Mi Chɛhowa suaa vɛlɛ naa ya chua aa:
24 “Po wanachioo, dimul ndu aa: ‘A cho wa o nɔɔlɛi, nduyɛ piɔɔ se niŋ o num choo o paale nile kɔl tuuleŋ choo le.
25 Wanaa suaa le num nda yiinaŋ naapilɛ le waŋnda* tɛɛmbuuwo, mɛɛ kpɔkuŋ* cho pɛɛliaa wo sɛɛsiaa nuaa visioo yɛ. A cho waŋnda nyɛm kiɔɔŋ a nyɛm baa kalaŋ poondiaa o laba. A tosa mi waŋ laanduaa bɔɔbɔɔ vii piaanduaa.
26 Wanaa num aa soliaa lasalaa tɛɛmbuu sawala nilaŋ, ma wa hiouwɔɔ lachi a fondaŋnda nila diandaa laŋ nɔɔliaa. A chɔm teŋgeŋndo nyɛ diandaa tɛɛŋ a nyɛ cho o diandaa le wo le. A kɛɛ le waŋnda teŋgeŋndo chɔmndo nyɛ nɔɔlɛiyo tɛɛŋ a nyɛ diandaa. A kɛɛ le palɛi nii pɛŋgiɛi biyɔɔ, nduyɛ hei tosa mi simnuŋ wana nɔɔlɛi nda tɛɛŋ.
27 Laŋgbaa num aa kalla cho ko mɛɛ tiwolla sɛɛsiaa nuaa visioo yɛ. Ma soli koowaŋ, nduyɛ ma diu waŋnda le nyɔɔŋ sɔlaa o kafalaŋ choo.
28 Wanaa num aa suaa le Mɛlɛka wa sui kaala ndala wɔɔŋndaŋ pɔu humboo. A cho yilaŋuŋ lachoowaŋ chɔɔ, nduyɛ ma viam yawala lachoowalaŋ ma dimi aa: “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni,” mi che bɛɛ o cho Chɛhowa pila le soo le.
29 Wanaa cho o lɛŋndeŋ niŋnda cho nyɛm pilaŋ dioo a lediɔɔmu nduyɛ ma tosa viileŋ. A cho wanaa bala fonduaa biyɔɔ wɔɔŋndo, ma dia nyɛm mialaa cho nda tɛɛŋ nda a lediɔɔmu, nduyɛ ma kɛɛ le nda dila ndalaŋ kioo.’
30 “‘I wa hɔlteŋ keeliaa le wana ya sɔla nda tɛɛŋ le mbo miŋgi kpaki lapouwo taŋgul lo, ɔɔ wana sim ya lachi maa kpaki le lɛŋnde ndɔleŋ mandaa yɔŋii ya tɛɛmbuu leŋ ndo. Kɛ I seeluŋ wana o wana le.
31 Lelaŋ I cho dɔɔnɔŋ tumbe a nda o kala kala, nduyɛ mi kɔl ni tuu cho maa leyiŋ ndo basu nda tɛɛ. I cho tosa ma sɔla fulamakɔɔlila wɔɔŋndaŋ le nyɛ nda tosa wo.’ Ya Chɛhowa, Mɛlɛka Kpuluŋguma Bɛndoo dimi lende ni.”
Tɛɛsiaalaŋ
^ Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ ma soliŋ ndu kpeku le nyɔɔ pɛɛsaa.
^ Ɔɔ “viiya.”
^ Hibuluiye, “A cho finyaa ndaa solioo o bɛɛ tum fondo.”
^ Ɔɔ “woliŋ.”
^ Ɔɔ “kapaa.”
^ Ɔɔ “yoomulaŋ.”
^ Ɔɔ “yalakana.”
